ھمگام بلوچی
بلوچ زمین ءِ واھُنداں ! گُلامی ءِ زندمان ءِ تہ ءَ راجانی ھَستمان ءُ بَکاہ مُدام گار ءُ بیگواہ بوئگ ءِ یک تُرسناکیں تُرسّے ءِ تہ ءَ بنت ، چی ءَ کہ گُلامی راجانی ھَستمان ءِ روتگانی بُرگ ءِ جھد ءَ کنت ۔ گُلامیں راجانی گوْر ءَ زندگ بوئگ ءُ وتی راجی بَکا ءِ رکّینگ ءِ یکیں راہ دیم ءِ زوراک ءِ زلم ، ناروائی ءُ پندلانی دیم ءِ اوشتگ بیت اِیں۔ یک راجے ھما وھد ءَ زورآور ءُ ھاکمانی پندلانی دیما داشت کت کنت کہ آئی ءِ تہ ءَ زانت ءُ سرپدی ءَ ھوار شَھُوری (شعوری) ورناھانی یک مُھکمیں ٹولی یے بہ بیت ایں۔ چی ءَ کہ ورنا ءُ نودربر راجی زندمان ءِ روتگ زانگ بنت۔ ایشیا، اپریکہ، لاتینی امریکہ ءُ ایدگہ جھان ءِ ایردستیں راجانی راجی آجوئی ءِ جُنزانی تہ ءَ مارا ھزاراں ورناھانی کار، کرد ءُ ابدمانیں کربانی دیما کاینت کہ آ کَس مروچی دپتر ءِ تہ ءَ پِگری بنیات ءَ ابدمان اَنت ءُ آھانی گلامیں راج آجوئی ءُ وتواکی ءِ زندمان گوازینگ ءَ اَنت۔بلوچ راجی آجوئی ءِ اے جُنز ءِ تہ ءَ بی ایس او آزاتءِ باسک ءُ سنگتانی کِرد ھم چو روچ ءَ سَھر ءَ اِنت۔ بی ایس او آزات یک پُر ایمینیں سیاسی گلے ءِ بستار ءَ وتی جوڑ بوئگ ءِ بندات ءَ بگر داں روچ ءِ مروچی بلوچ ورنا ءُ نودربرانی پِگری، شَھُوری ءُ تالیمی (تعلیمی) رِدّ ءَ ردوم دیگ ءَ ھوار، بلوچ چاگرد ءِ تہ ءَ راجی سِنچ ءُ زانت ءِ پیداک کنگ ءِ ھاترا جُد ءُ جُھد کنگ ءَ اِنت۔ گوستگیں چیزے سالاں اے جد ءُ جھد ءِ تہ ءَ بی ایس او آزات ءِ ھزاراں نامی ئیں ءُ گُمنامیں پِگّری سنگت ءُ رھشون آوار جنگ ءُ نمیران کنگ بوتگ اَنت ءُ بے کساس داں مروچی ءَ زورآورءِ ٹارچرسیلانی تہ ءَ بندیگ اَنت۔ ھمے پگری سنگت ءُ رھشونانی تہ ءَ بی ایس او آزات ءِ گوستگیں کماش زاھد بلوچ ھم ھوار اِنت۔
شرپ مندیں وانوکاں ! بلوچ نودربر گَل آزات ءِ گوستگیں سروک زاھد بلوچ گوں ھزاراں بلوچ پرزندانی ھواری ءَ چہ بازیں سال ءُ مُدّتاں زورآوریں اِستان پاکستان ءِ بندیگ جاھانی تہ ءَ بندیگ اِنت۔ زاھد بلوچ 18مارچ 2014 ءَ بلوچستانءِ دمَگ شال ءَ ھما وھد ءَ چہ زروگریں اِستانءِ لشکر ءُ آئی ءِ چیریں کارندھانی دست ءَ آوار جنگ بوت کہ آ گَل ءِ کارانی ھاترا تر ءُ تابءَ اَت۔ چہ بی ایس او آزات ءِ نیمگ ءَ گل ءِ کَماش زاھد بلوچ ءِ بیگوائی ءِ ھلاپ ءَ شُد ھڑتالی بُنجل، پُرایمنیں زھرشانی ءُ روانک، سیمینار ءُ جتا جتائیں مراگش برجم دارگ بوت، اِشاں ھوار میاں استمانی انسانی ھکّانی گل ءُ ادارھانی گوْر ءَ ھم کماش زاھد بلوچ ءِ بیگواھی ءِ ھلاپ ءَ توار سر کنگ بوتگ، اشی ءَ ابید انسانی ھکّانی ھاترا کار کنوکیں بازیں میاں استمانی جھگیران ءَ چہ گل ءِ نیمگ ءَ نِمدی ءُ کلوہ ھم دیم دیگ بوتگ۔ ادا ایش ھم زانگ بہ بیت کہ زاھد بلوچ ءِ بیگواھی ءَ پد گل ءِ شد ھڑتالی بُنجل ھم ھما وھداں ھلاس کنگ بوت کہ میاں اُستمانی انسانی ھکانی گل ءِ نیمگ ءَ گَل ءَ اے باوری دیگ بوت کہ زاھد بلوچ چہ بندیگ جاہ ءَ یل ءَ کنائینگ بیت۔ بَلے چہ ایشاں ابید ھم زاھد بلوچ انگت بندیگ جاھانی تہ ءَ بندیگ اِنت۔
بلوچ راج ! زورآوریں استان مدام ایردستیں راجانی سائنسی ءُ آشوبی راہ ءُ درانی دیمءَ اڑاند بنت، آ زان اَنت کہ مئے زورگری ءَ پروش ھما آشوب دنت کہ آئی ءَ را سِکّگ ءُ دربرگ ءِ ھیال ءُ لیکہ گون بہ بیت۔ پمیشکہ مروچی بی ایس او آزات ءُ ورناھانی سیاست ءِ سرا بندش جنگ بوتگ۔ گل ءِ بے کساس باسک آوار جنگ ءُ نمیران کنگ بوتگ اَنت ، باز ماں بندیگ جاھانی تہ ءَ بندیگ اَنت۔ مئے گوں وتی راج ءِ ھمک پِڑّ ءِ مردماں گوں دزبندی اِنت انچوشکہ ھمک وھداں شما گوں وتی نودربر ءُ ورناھاں ھمگام ، ھمتوار ءُ ھم کُمک بوتگ اِت مروچی ءُ دیمترا ھم وتی کچّ ءِ پرز ءَ مُدام پِیلّو بہ کن اِت۔ گلامیں راجانی مستریں تاکت راجی یکمشتی ءُ یکجائی اِنت، مئے یکمُشتی مئے راجی وشھالیں بانداتے ءِ مانزمان بیت۔ بیا اِت توار چست کن اِیں زاھد بلوچ ءَ ھوار ھر ھما بلوچ پرزندانی ھاترا کہ بلوچ بوئگ ءِ جرم ءَ زور آوریں استان ءِ بندیگ جاھانی تہ ءَ زند ءُ مَرگ ءِ میان ءَ زندگی گوازینگ ءَ اَنت۔
