نبشتہ کار ـ واجُل دشتی
جنگ بے رھم بیت، جنگ دوستیگ ءُ مِھروانیں مردماں اَچ تو سِند اِیت- تئی ھنکین ءُ میتگ، شھر ءُ دیار لوگ ءُ جاگہ کُل تباہ ءُ ویران بنت بلے راستی ایش اِنت کہ جنگ ایمنی ءُ آجوئی اِنت- آجوئی، ایمنی، وشھالی ءُ وتواکی ءِ ھاترا جنگ الّمی ءُ اژدری اِنت- پہ وتی آجوئی ءُ وتی زمین ءِ وت واھُند بوگ ءَ اے کُربانی ءُ اے سرانی کیمت ھچّے نہ اِنت-
بلوچ ءِ وتواکی ءِ جنگ کہ اشی ءِ تہ ءَ ھزارانی کچ ءَ ورناھانی ھون ھوار اَنت، زالبولانی ھون ءُ ھید ھوار اَنت، مات ءُ کماشانی سگ ءُ اوپار ھوار اَنت یک انچیں جاگھے ءَ سربوتگ کہ مردم پہ دلجم ءُ سدّکی گوْش اِیت کہ اے جنگ ایرموش نہ بیت ءُ بلوچ راج پروش نہ وارت- جنگ ءِ اے سیمسراں داں سرکنگ ءَ ھما ورناھانی کِرد اِنت کہ آھاں دژمن ءِ ایردستی نہ منّ اِتگ ءُ گھگیری ءِ راہ ءَ گچین کنان ءَ کوہ ءُ اگار بنجل ءُ ھنکین کتگ اَنت-
شھید کِیا چہ ھما سنگتاں یکّے اَت کہ اے جنگ ءِ میزرینگ ءَ آئی ءِ ھید، ھون ءُ جپاکشی ھوار اَنت- آ چہ ھما سنگتان اَت کہ آئی ءَ گپ کم ءُ کار گیش کُت، مدام تو دیست کہ پند ءَ اَت سپر جنگ ءَ اَت- مزنبند، سُھریں کوہ ءُ شیراز ءِ چُشیں شیپ ءُ کئورے نیست اَت کہ آئی ءَ نہ گول اِتگ اَت- جوانیں اکس کشّے ءَ ھوار ھجّامے اَت سنگتاں ھرچ جاگہ کہ ڈیک وارت اگاں سنگتانی اوتاگ ءَ شُت گڈا آئی ءِ دو سےَ روچ سنگتانی مود ءُ ریشانی ٹاپ کنگ ءَ شُت- سنگتانی کُمک کنگ، ھمراداری ءُ ھمکوپگی ءَ مدام ساڈی اَت تو ھچبر نہ دیست کہ کِیا بُرز کپتگ ءُ کوکار ءَ اِنت یاکہ سنگتے ءَ گوں اڈ اِتگ- آئی ءَ پیشداروک ءُ وتگلائیں مردم دوست نہ بوت- گل ءِ کرپشن کنوک، گل ءِ بے رھبندی ءُ بے رھبندیں سنگتانی سر ءَ زھر اَت ءُ مدام گْوشت ئِے کہ انچو تاوان مارا اشاں داتگ دژمن ءَ ھم نہ داتگ-
کِیا من اوّلی رند ءَ دوھزار شانزدہ ءَ دیستگ اَت اپریل ءِ ماہ اَت من ءَ سنگتے ءَ پون کت کہ باندا سُھب ءَ مئے واستہ ڈبی یے پروش ءِ تیر، مُرگ ءُ دگہ لھتے سامان بہ زور ءُ بیا، دومی سُھب ءَ من ءُ شھید دُرجان ءَ سنگتانی سامان زرت اَنت ءُ دیم پہ ھمایاں شُت اِیں کہ تیراندسک ءِ روکپتی نیمگ ءَ جُمپے ءِ سر ءَ دو سنگت مئے ودار ءَ اَت کہ آھانی توک ءَ یکّے کِیا اَت، اوّلی دُچار کپگ ھمدا بوت پد ءَ گڈا مدام ھال ءُ اھوال بوت ءُ وھد وھد ءِ سر دُچار کپت اِیں، کِیا ءَ سنگت سک دوست اِت اَنت اِنچو وھد ءَ اوتاگ ءُ پنداں سنگتانی ھمراہ بوتگ بلے یک سنگتے نہ گوش اِیت کہ کِیا گوں من دلگران بوتگ-
کِیا جنگول ءُ چِنّکیں سنگتے اَت اے ھند ءُ دمگانی گیشتریں ٹوھیں ءُ جوانیں جنگاں آئی ءَ بھر زرتگ اَت، بازیں جاگھاں دُژمن ءِ انگر ءِ پروشگ ءُ دژمن ءَ بے سوب کنگ ءَ ھم سوبین بوتگ اَت، ھمے جنگی چِنّکی ءِ سوْب ءَ دژمن ءِ ڈرون میزائل اُرش ءَ ٹپّی بوگ ءَ پد ھم باز پند ءَ درکئیت- آ ھون ءَ ریچان بیت ءُ دور رؤت بلے دژمن ءِ جنگی بالگرد پیسر ءَ چہ کوھانی سر ءَ کمانڈوز ایرگیج اَنت ءُ جھلی لشکر ھم سر بیت ءُ کوھانی سر ءَ سنگر گیپت گڈا کِیا گوں ھمیشاں دپ کپ اِیت داں دیراں جنگ دنت، جنگ ءِ میان ءَ چار پنچ سنگر مٹّینیت ءُ دژمن ءَ گوں میڑ دنت ءُ گُڈی ءَ لشکر آئی ءِ سنگر ءَ راکٹ ءُ ایل ایم جی ءِ سر ءَ نشانگ کنت ءُ آئی ءَ شھید کنت-
اے راستیں گپے کہ سنگتانی رؤگ مردم ءَ سک درد بیت ءُ پہ گل ءَ ٹوھیں تاوانے ھم بلے ھمے ھون ءُ کُربانی مئے آجوئی ءِ مانزمان اَنت، سنگتانی ھمے ندْر بوگ پہ آ دگہ جنگولاں دیم ءَ جنزگ ءِ سکین اَنت- وت ءَ پہ زمین کُربان کنگ ءِ نِھاد ءَ ھما مردم زانت کہ آئی ءَ گوں وتی زمین ءَ بے کساس مِھر اِنت، ھمے مِھر کُربان بوگ ءِ سکین ءَ دنت- زمین ءِ مِھر ءُ آجوئی ءِ کیمت ءَ اے ھون ءُ سر تُشے ھم نہ اَنت-
