ھمگام نبشتانک
13 نومبر شہدائے بلوچستان ءِ روچ نام ءَ گیر آرگ بیت۔ اے روچ ءَ کلیں بلوچ راج وتی راجی بامردانی کار ءُ کرداں یاتگاریں پوشاکے گورا دینت ءُ آیاں سرچکیں دروت پیش کن انت۔ اے ہما بامرد انت کہ آیاں وتی نگرہیں سر ءُ جان پہ وتی گلزمین ءِ آجوئی ءِ ھاترا قربان کتگ انت۔ بلوچستان ہما گلزمین انت کہ آئی ءِ فرزند پہ وتی ڈیھ ءَ قربان بوھگ ءَ ہچ چک و پد نہ بوتگ انت بلکیں ھزارانی کساس ءَ اشاں پہ ڈیھ ءِ آجوئی ءِ ھاترا وتی جان ندر کتگ انت۔
دنیا ءِ تہا ہر وت واجہیں قومے وتی شہیدانی یات کنگ ءِ روچ ءَ ایر کنت۔ انچو کہ :ماں ارمانی ءَ ارمانی آں وتئی شہیدانی روچ 24 اپریل زورتگ۔ءُ بارمیں قوم ءِ 9 راہشوں شہید کنگ بیت کہ آیانی شھادت ءِ روچ 19جولائی انت کہ آ ہر سال ہمے روچ ءَ وتی شہیداں یات کن انت۔ لیبیا 16 ستمبر، ترکی 19 مارچ ءُ ویتنام جولائی 27 ءَ وتئی شہیداں یات کن انت۔
ہمے پیم ءَ بلوچ راج وتئی شہیداں ھر سال ءِ سینزدہ نومبر ءَ یات کن انت ءُ آیاں سرچکیں دروت ندر کنت ۔ آ قوم کہ وتئی شہیدانی قربانیاں قدر ءِ چم ءَ چاریت ءُ کسان، مزنیں بامردانی قربانیاں یک ھساب ءَ مان کاریت ۔ آ قوم مدان دگنیا راج داہتر ءَ ابد مان بنت ہرچہ کہ راجی فرزندانی شھیدی راجانی زندمان ءِ زمانت انت۔
بلوچستان لبریشن چارٹر ، کہ سنگت ھیربیار مری ءَ گوں وتی سنگتاں شپ روچ محنت کتگ جوڈ کتگ ، آئی ءِ تہا شھمیریں بلوچانی روچ چو اے وڈا نبشتہ انت۔
“شق 70: بلوچ آجوئی جہد ءُ دوبر آجوئی گِرگ ءِ ھاترءَ شہید بوتگیں مردمانی یاتءَ راجی روچ 13نومبر ایر کنگ بیت ۔ ھمے روچ ءَ 1839 ءَ میر محراب خان گوں وتی کنگریں سپاھیاں برطانیہ ءِ زوراکیں راجءِ اُرش ءَ چہ بلوچستان ءَ رکینگ ءِ ھاترءَ جانانءَ ندر کرت۔ ”
13نومبر ءَ کلیں شہید، ہما کہ استان پاکستانءُ ایران ءِ ھلاپ ءَ جنگ کنان ءَ شہید بوتگ انت یا برطانیہ سامراج ءِ ایردستی ءِ سانکلانی پروشگ ءِ جہد ءَ شہید بوتگ انت، یات کنگ ءُ سرچکیں دروت پیش کنگ بنت۔ اے روچ راج دپتر ءَ یک مزنیں ارزشتے ءِ واھند انت ہمے روچ ءَ بزاں 13نومبر 1839 ءَ برطانیہ سامراج گوں وتی لشکر ءَ بلوچ گلزمین ءِ سرا ارش کنت گڈا محراب خان گوں بلوچ کنگراں وتی سرڈگار ءِ پھازگ ءِ ھاترا انگریز لشکر ءِ دیما چو کوہ ِالبرز ءَ میلانک بیت ءُ وتی نگرائیں سر ءَ پہ سرزمین ءِ ھاترا ببا دانت۔
وھدے میر محراب خان گوں سنگتاں شہید بیت گڈا برطانیہ بلوچ سرزمین ءَ ( divide and Role ) والا پالیسی ءِ سرا سے جاہ ءَ بہر و بانگ کنت۔ بلوچستان پاکستان ،ایران ءُ افغانستان ءِ تھا بہر و بانگ کنگ بیت۔1871 ءَ یک بہرے گجراں دیگ بیت ، 1893 یک بہرے افغانستان ءَ ءُ 1916 ءَ ایران ءِ دست چیریں بلوچستان ءِ وت واجہی ءِ جار جنگ بیت۔ 13 سال ءَ پد ، ایران ءِ سروک رضا خان یک رندے پدا، 1928 ءَ بلوچ ءِ وت واجہی ءَ پولیت ھمے پیما 11اگست1947 ءَ مشرقی بلوچستان چہ انگریز ءِ ایردستی ءَ آجو بیت ءُ 7 ماہ ءَ پد پاکستان بلوچستان ءِ وت واجہی ءِ سرا ارش کنت ءُ 28 مارچ 1948 ءَ بلوچ راج پدا یک رندے گلام جوڈ کنگ بیت۔ 1948-58-73 ءَ گوں پاکستان ءَ سے مزنیں جنگ بیت کہ اے جنگ بلوچستان آجوئی ءِ ھاترا پاکستان ءِ ھلاپ کنگ بنت تاں مروچی آجوئی ءِ اے جنگ جاری ءُ برجاہ انت۔
بلوچ کنگراں مدامی وتئی ڈگار ءِ پھازگ ءَ وتی جانانی پرواہ نہ کتگ انت، آ جانانی قربانی انگریز سامراج ءِ ھلاپ ءَ بہ بنت، فارس ءِ یا پاکستان ءِ، بلوچاں ہروھد ءَ وتی سرچکیں ھون بلوچ گلزمین ءِ دلبند ءِ ریتکگاں، بلوچاں اِچ دری زوراورانی غلامی نہ من اتگ۔ بلوچ راج ءَ آجوئی لوٹ ءِ پدا ھزارانی کساس ءَ وتی فرزند ندر کتگ انت۔
بیا ما عہد کنیں یک زندگیں راجی ءِ پیما ما وتی شھیدانی فکر ءُ فلسفہ ءَ ہم کوپگ ءُ ہم پکر بیں۔
