ھمگام بلوچی
13نومبر شھیدانی روچ انت
نبشتہ کار : (اے ـ ج)
13نومبر شھیدانی روچ انت ءُ ھمک زندگیں راج وتی شھیدانی سر ءَ پھر ءُ شان کن اَنت ، ھمے پیم ءَ بلوچستان ءِ راج پھازیں سراں ھمے روچ ءَ وتی سر پہ بلوچستان ءَ ندر کُتگ اَنت ھنچوش کہ راجدپتر ءَ نبشتہ اِنت کہ 13 نومبر 1839 ءَ انگریزاں آزاتیں بلوچستان ءِ سر ءَ اُرش کُتگ میر مھراب ھان ءُ میربلوچ ھان گوں ھمراھاں شھید کُتگ اَنت ءُ بلوچستان ءِ سر ءَ ھاکمی کُتگ پدا 1947 ءَ انگریز ءِ دراھگ ءَ رند بلوچستان آجو بیت 11 اگست 1947 ءَ چہ دھلی ریڈیو ءَ بلوچستان ءِ آجوئی جار جنگ بیت بلوچستان یک آجوئیں ملکے بیت انچوش کہ شما سھیگ اِت بازیں سردار اِے آجوئی ءِ دیم ءَ ڈنگر ءُ کنٹگ بنت ءُ تنیگہ اِشانی چک ءُ نماسگ بلوچ راج ءِ آجوئی ءِ دیم ءَ دیوال اَنت، ھما وھد ءَ سردار جاموٹ جام گلام کادر، نواب ھبیب اللہ نوشیروانی، نواب بائیان گچکی ءَ پاکستان ءِ زوراکانی ھمراھداری کتگ ءُ بلوچستان کہ آجوئیں ملکے بوتگ کہ 27 مارچ 1948 پاکستان ءَ بلوچستان سر ءَ ارش کُتگ ءُ ھان کلات دست گیر کتگ ءُ پہ زور دست رند پرماتگ ءُ بلوچستان زور گوں پاکستان ءَ ھوار کتگ ءُ ھمے پیم ءَ روایرشتی بلوچستان کہ آجو بوتگ ءُ میردوست مھمد ھان ھاکم بوتگ انگریزانی روگ ءَ رند ایران ءِ زوراکاں روایرشتی بلوچستان ءِ سر ءَ ارش کتگ ءُ بلوچستان ءِ آجوئی گُٹ گیر کتگ ءُ میر دوست مھمدھان تھران ءَ لوٹائینتگ ءُ پاھو داتگ۔ یک بھرے انگریزاں اوگانستان ءَ ھوار کتگ بزاں بلوچستان سے جاگہ ءَ بھر اِنت ءُ بلوچستان ءِ مھلوک درامدیں راجانی گلام اِنت ءُ بلوچستان ءِ مال ءُ مڈیانی ھدابُند درّی اَنت بلوچ راج چمدار ءُ بزگ اِنت ھمے بزگی ءُ چمداری ھاتر ءَ بلوچ راج ءِ سرمچاراں چہ 13 نومبر 1839 وتی ھیشی سراں ندر کنان اَنت تاں مروچیگیں روچ ءَ وتی سراں پہ بلوچستان ءَ ندر کنان اَنت ھمے شھیدانی ھاتر ءَ ما وت ءَ چہ اے زوراکاں چون بہ رکین ایں چون وت ءَ شوھاز بہ کنیں گُڑا بیا اِت وت ءَ شوھاز کن ایں
وتی جند ءِ شوھازگ ءُ
دود ءُ ربیدگانی زندگ دارگ راج
ءُ ٹک ءُ کُٹمانی سر ءَ اِنت ھما وھد ءَ کہ ما وتی واجہ وت بوتگ ایں مئے دود ءُ ربیدگ زندگ بوتگ اَنت مئے پچ ءُ پوشاک مئے وتی ڈول ءَ بوتگ اَنت بلے ھمے سد سال ءِ تہ ءَ کہ ما ایرجیگ کنگ بوتگ ایں ءُ مئے ھست ءُ نیست دژمن ءُ بدواھانی دست ءَ کپتگ اَنت کم کم ءَ آیاں چہ وتی رپک ءُ ھنر ءُ مکاریاں مئے دود ءُ ربیدگانی گاری ءُ بیگواھی ءِ باز جھد ءَ کُتگ بلے بلوچ راج ءِ بامرداں باز جھد کُتگ کہ مئے دود ءُ ربیدگ گار مہ بنت آیاں وتی سر کربان کتگ وت ءَ پہ بلوچستان ءِ ھاتر ءَ ندر کتگ بلے انگت مئے باز چیز آ رنگ ءُ دورشم ءَ نہ اَنت کہ پیسرا بوُتگ اَنت.
بلوچ ءَ مردینی شالے بوتگ کہ آ وَهد ءَ مئے بلوچانی کوٹ ءِ بدل بوتگ اَنت مروچی گار ءُ بیگواہ اَنت چی ءَ کہ اے شال ءَ ما بلوچاں وت جوان کُتگ مئے بلوچ راج ءِ گُد گواپ بوتگ اَنت کہ جولاھگ اِش گوشتگ اَنت آیاں وت یک دارے اڈ کُرتگ کہ آئی ءِ نام چِھر بوتگ گوں همے چِھر ءَ پژم اِش رستگ ءُ تاب داتگ ، بندیک اِش جواں کُرتگ ، جنینی ءُ مردینی گُد اِش گوپتگ ، جنین آدماں ھم ھمے چِھر ءِ سر ءَ پژم ءُ مود تاب داتگ اَنت ءُ جُل ، نالدان ، ھرُجین ، شِیکِن ، پرزونک ، گدان ءُ کونٹ اِش گوپتگ ءُ دگہ چیز اِش هم اَڈ کتگ ءُ گوپتگ اَنت .
مئے راج ءِ دود ءُ ربیدگ ءِ زندگ دارگ ءِ واست ءَ مئے جنین آدماں باز جھد کُتگ مئے جنین آدم انگت وتی دود ءُ ربیدگ داشتگ اَنت ءُ بلوچ راج ءِ جنین آدمان ءَ یک مزنیں کردے بوتگ ءُ تنیگ ءَ ھم ھست .
بلے مرچگیں روچ ءَ اَگاں ما بہ لوٹ ایں ما وتی دود ءُ ربیدگانی پاسپان بوت کن ایں ، ما دژمن ءُ بدواھانی دیمءَ داشت کن ایں ، آیانی پندل ءُ دوتل ءُ دوپوستیاں ماراِت ءُ زانت کن ایں.
مارا پہ وتی دود ءُ ربیدگ ءُ پجارءِ واست ءَ چے کنگ لوٹ اِیت ءُ مارا پہ وتی زند ءِ تک ءُ پھناتاں چونیں گامگیج زورگ لوٹ اِیت ؟
ما چوں وتی جند ءَ ءُ وتی دود ءُ ربیدگاں بہ رکین اِیں ؟ ما چوں ھما بلوچ ءُ هما بلوچی ءَ زندگ بِدار ایں ؟ ما چوں وت ءَ گوں آدگہ راجانی برابری ءَ بیار ایں؟
ما چوں وتی آجوئی ءِ سیمسراں سربہ بئیں مئے درستیں مال ءُ مڈی زوراکاں چہ ما پچ گپتگ وتی دست ءَ کتگ اَنت آ مئے گنجیں زمین ءُ لُنجیں زر ءُ نیلّیں آزمان گوں گنجاں وَتیگی کرتگ اَنت مئے نیکراھی ءُ مئے دودانی گاری ءِ رند ءَ اَنت بلے ما سھیگ نہ ایں ، ما واب ایں ، ما بے پگر ایں ، ما بے مارشت ایں ، ما ھچ سسّا نہ کن ایں ، چی ءَ کہ زوراکاں مارا ھنچو بے زانت ءُ وار ءُ بزگ ءُ نیزگار کُتگ کہ پہ لاپ ءِ شوھاز ءَ ما وت ءَ گار کُتگ ، ما وت ھم نہ زان ایں کہ مئے دود چی اَنت ؟ مئے ربیدگ چے اَنت ؟ مئے ھک چے اَنت ؟ ھمے پیم ءَ کم کم ءَ مئے دود ءُ ربیدگ گار بوان اَنت ، ما زوراکانی دام ءِ چمگ ءَ کپتگ ایں ما ھمایانی دوداں وتی کنگ ءَ اِنت ، ھمایانی وشی ءُ شادکامیاں وتی کنگ ءَ اِنت ،ھمایانی بامردانی ستا ءُ وزبتاں کنگ ءَایں ھمایانی زباناں وتی کنگ ءَ اِنت میتگ ءِ نام گاوں ءُ روستا بوتگ اَنت آپ ءِ نام پانی بوتگ ءُ ایرگیجگ ءُ ایر گیج ءِ جاگہ لائینگ ءَ اُتارو گپتگ بہ نند جاہ ءَ مئے دپاں بیھٹو درکیت ءُ مئے شھدیں زبان گاجیل اِنت ءُ ھمایانی پُچ ءُ پوشاکاں وتی کنگ ءَ اِنت ھمے سَوب ءَ مئے وتی دود ءُ ربیدگ ءُ شھدیں زبان کم کم ءَ گار ءُ بیگواہ بوان اَنت بلوچستان ءِ راجی پجار گار انت ھمے شھید مرچی مئے راجی پَجّار اَنت !!!!!!!!
مروچی بلوچ راج ءَ سسّا کنگی اِنت کہ آئی ءَ چے کنگی اِنت ؟ آئی ءَ وتی دود ءُ ربیدگ چوں رکینگی اَنت ؟ آئی ءَ وتی زبان چون زندگ کنگی اِنت ؟ چوں ھور ءُ تپاک بوگی اِنت ؟ وتی آجوئی چون گِرگّی اِنت دژمن ءِ پندل ءُ مکاری چون مارگی اِنت باھد اِنت ما بلوچ راج پگر ءُ سسّا بہ کنین ءُ بہ بیت کہ ما وت ءَ چوں بہ شوھازیں چوں چہ اے زوراکاں وت ءَ بہ رکین ایں ؟ مئے شھیدانی ھون ترھگ انت ءُ گوش انت کہ وتی راجی پجار ءُ وتی دود ءُ ربیدگاں گاری ءُ بیگواھی ءَ میل اِت اگاں نہ دژمناں دیر اِنت کہ وتی لانک بستگ انت مارا وتی ایرجیگ اِش کُتگ مروچی ما ھمایانی چمدارایں مئے وتی جند ءِ پجار گار اِنت ما گوں ھمایانی ناماں زانگ بیَگ ءَ اِنت مئے کوٹ ءُ کلاتانی سر ءَ ھمایانی بیرک مِکّ اِنت بلے ھمے بیرک مِکّ کنگ ءِ ھاتر ءَ راجی شھیداں وتی جان ندر کتگ اَنت کہ بلوچستان ءِ کوٹ ءُ کلاتانی سر ءَ مئے وتی راجی بیرک مک بہ بیت ما چہ وتی پجارءَ زانگ بہ بیں !!!!!!
بژن ءِ گپ اِیش اِنت کہ ماں روایرشتی بلوچستان ءَ گجراں گوں بلوچی ٹک ءُ کُٹمانی ناماں کُنّت اِنت تو وَ گوش ئے بلوچانی ناماں تیر ءُ تُپنگ گون اِنت ءُ بلوچ راج ءِ ٹک ءُ کُٹمانی نام پہ گجراں زاہ ءُ بد اَنت آ وتی وڑ ءَ بلوچاں,, پامیل,, بزاں زریات دے اَنت ءُ بلوچ وت نہ زان اَنت کہ مئے پامیلانی بہ زانت چے اَنت رودَراتکی بلوچستان ءَ هم ھمے ھساب ءَ اِنت کہ ھرچ بلوچے ءِ نام ءِ سر ءَ بلوچ نبشتگ پنجاپیانی لاپ ءِ رُوت ءُ پُپ بُن بنت ءُ گوش اَنت کہ شما وتی نامانی سر ءَ پرچے بلوچ نبشتہ کن اِت گجرانی یک جُلُی شیهائیں نیکمردے بزاں مُلایے کہ ملا ءِ نام ءَ هم نہ کرزاَنت گوشگ ءَ اَت کہ بلوچ تپاک بوُتگ اَنت کہ دہ دہ چک پیداگ بہ کن اَنت ءُ وت ءَ باز بہ کن اَنت تاں آیانی ھساب چہ شیهایاں گیشتر بہ بیت آ چہ وتی ھکومت ءَ لوٹگ ءَ اَت کہ اَگاں بلوچے ءَ دو چک ءَ گِیش پیداگ کت آیاں شناستی کاٹ (سجل ءُ شناسنامہ )مہ دے اِت بلے اے جُلّی ملایانی میار نہ اِنت میار بار بلوچ راج اِنت کہ آ وت ءَ پجاہ نیاریت آ نہ زان اَنت کہ گجراں بلوچستان پہ زور گپتگ ءُ وتی کتگ بلوچ راج آیانی گلام اَنت آ ھرچے کہ گوش اَنت آیانی گپ راست اَنت وَهدے کہ بلوچ وت وت ءَ ایرانی گوش اَنت بلوچ وت وت ءَ پاکستانی ءُ اوگانی گوش اَنت میار مئے وتی جندیگ اِنت کہ ما وَت وتی پَجّار گار کتگ ءُ تپاک نہ اِیں ءُ پہ وتی براتانی کُشگ ءُ تاوان دیگ ءُ کھر کنگ ءَ تیار ءُ ساڑی ایں دژمن مارا ھرچی گوش اِیت مئے گوشاں مورے نہ وارت,,, آ بلوچ کہ بلوچ بوتگ اَنت اے گلزمین ءَ چادرے پرداتگ اَنت ما ھمے لَچی ءُ داسیاں ھست انت کہ پہ براتانی تاوان دیگ ءُ وتی براتانی ڈکّی کنگ ءَ چَک پد نہ بیں وت وتی براتانی دژمن ایں اے گجر ءُ پنجاپی ھرچی گْوش اَنت ھرچی کن اَنت اِشاں کِچ ءُ تُت پر نیست ,,او منی بلوچ برات تو وت وت ءَ پاکستانی مہ گُش تو وت وت ءَ ایرانی مہ گوش تو وت وت ءَ اوگانی مہ گوش شما بلوچ اِت شمئے ملک بلوچستان اِنت شمئے زبان بلوچی اِنت وتی بلوچی پَجّار ءَ گاری ءَ میل اِت وت ءَ بلوچ بہ زان اِت دومی ما ءُ شما چہ گجر ءُ پنجابیاں چہ جوان تریں مسلمان ایں پگر ءُ سسّا بہ کن اِت وت ءَ شوھاز اِت کہ بلکیں ما ءُ شُما وت ءَ دَرگِپت کُت چی ءَ کہ جھانی راجدپتر ءِ تہ ءَ 11 اگست 1947 ءَ مئے بلوچ راج ءِ آجوئی مَنّگ بوتگ ءُ ھما اِنت کہ زوراکاں پہ زوراکی مارا ایرجیگ ءُ گلام کتگ ءُ مئے آجوئی پچ گپتگ پمے ھاتر ءَ مئے راجی جُنزانی سرمچار کوھان اَنت باید اِنت کہ ما درست وت ءَ ھمے راجی آجوئی جنز ءِ سْرپ ءَ ھور بہ کنیں وتی تہ ءَ تپاکی یے بیار اِیں راجدپتر شاھد اِنت کہ راجانی ھوری ءُ تپاکی ءَ زوراک پروش داتگ اَنت مئے تپاکی ءُ ھوری ھم دژمن ءُ بدواہ ءُ لاپ چاراں پروش دات کنت زوراک ھرچ وڑیں زوراکی کن اَنت ءُ کنگ ءَ اَنت کہ ایرجیگیں راج چہ آیانی ترس ءُ بیم ءَ بہ ترس اَنت ھچ گُشت مہ کن اَنت بلے راجانی ھوربندی زوراکانی بیم ءُ ترس ءَ گار کن اَنت ءُ راجاں چہ زوراکاں آجو کن اَنت ,,
پادا منی میریں بلوچ مرچی مئے ءُ شمئے چکاس اِنت
شھیدانی اے روچ ءِ درگت پد ءَ سوگند ءُ مُسام کنیں آزات بلوچستان ءَ کنیں تاں مئے شھیدانی آرواہ آسودگ بہ بیت
