نزاناں آ کجام زانت ءِ پہمگ اِنت کہ مردم وتی سرانی چکاسگ ءَ چک ءُ پد نہ بنت۔ وتی مادریں گلزمین ءِ ھاترا وتی جاناں ببا دئینت۔ ھما نرمزار کہ وتی زند ءِ وشیانی قربانیاں پاد ءِ چیرا ایر کن آنت ءُ وتی مادریں ھاک ءِ سبزینگ ءَ وتی سھریں ھوناں چو ھور ءِ پیم ءَ تاچین اَنت۔ یک مردمۓ وھدے کہ وتی گوں زمین ءَ مہر کنت آ زمین ءِ ھمک ٹال ءِ گوماں مہر داریت آ زمین ءِ درچک ءُ دار کوہ ءُ گیاباناں یا زمین ءِ مردمانی زبان ءُ ننگ ءُ ناموس کُل آئی واستہ مہر ءِ درور بنت۔
دگنیا ءَ ھمک راج ءَ وتی رکینگ ءِ ھاترا جھد کتگ آ جھد ءِ تہا راج ءِ ھمک بھر ءِ مردماں وتی راجی مُز داتگ ءُ وت ءَ پہ دائمی نمیران کتگ۔جغرافیائی ھساب ءَ دگنیا ءِ سرا یک ٹُکُریں زمینۓ است کہ چہ بندر عباس ءَ بگر داں کوہ سلیمان ءَ ءُ ڑی جی ھان ءَ بگر ءَ داں کراچی ءَ کہ ٰبلوچستانٰ ءِ نام ءَ زانگ بیت ھمک دور ءَ سامراجی زوراکیانی آماچ بیتگ۔ بلوچ وتن ءِ رکینگ ءِ ھاترا بلوچ پسگاں اَچ وڑیں قربانیاں چہ سرگوستگیں کار کتگ۔ بلوچ سرزمین ءِ تیاب بہ بیت آئی ءِ جغرافیائی کَچ بہ بنت یاکہ بلوچ ءِ تشخص بہ بیت ھمک دورا ھمک رنگ ءَ بلوچ ءَ وتی جان داتگ ءُ زمین ءِ پہریزگ ءِ حق ادا کتگ۔پرے ھاترا بلوچ ڈیھ ءِ زمین پھازگیں نرمزارانی واستہ سینزدہ نومبر ایر کنگ بیتگ کہ ھر ھما بلوچ کہ گمنام یا زانگ بیتگ کہ وتی جان ۓ پہ ھاک ءَ ندر کتگ آوانی قربانی یات کنگ ءُ وتی راج ءَ را اے باور کنائینگ کہ شھیدانی ریتکگیں ھون پہ بلوچستان ءِ آزادی ءِ بُنشت جوڑ بنت۔ بلوچ راج وتی کلیں شھیداں کہ وتن ءِ آجوئی ءِ ھاترا قربان بیتگ اَنت سھریں دروت ءُ سلام دنت ءُ ایندگہ راجانی شھیداں کہ آھاں پہ ننگ ءُ زمین ءِ ھاترا جان داتگ آھاں ھم راستیں چمۓ ءَ چاریت۔
بلوچستان ءِ آزادی یک وابے نہ اِت کہ مھکم مہ بیت اے بلوچانی ایمان اِنت کہ یک رو چے بلوچ وتی ھاک ءِ مستر وت بیت۔ وتی زمین ءِ سرے ارچ کارست ءِ واجہ بلوچ وت بیت ھمک گلاب شنزیں بہارانی ندارگ پہ بلوچ ءَ بنت ءُ کُل طفلیں دلانی وشی پہ وتی زمین ءِ سبزگ ءَ بنت۔
بلوچستان ءِ کُل سیاسی سنگت وتی راجی شھیدانی فکر فلسفہ ءَ گس گس ءَ سر بکن اَنت ءُ آشوب ءِ مھکمی ءِ ھاترا بلوچ قومی نظریہ ءَ ہر بلوچ ءِ دل ءَ ایر بہ دئینت۔ گلزمین ءِ شھیدانی ریتکگیں ھونانی ھساب یک آزاد ءُ مھکمیں بلوچستانے ءِ شکل ءَ دژمن چہ ءَ گرگ بیت۔ یک راجی جنزۓ ءِ راھاں راست کنوکیں ھمے ھون اَنت کہ مردم ءَ را جُنز ءِ نیمگ ءَ رہادگ کن اَنت ءُ فکر ءُ فلسفہ ءَ چو سیاجی ءِ کوھاں مھکم کن اَنت۔ انچش کہ واجہ شھید گلام مھمد گشیت
من پہ مرگ گار نہ باں
مہراں کہ آوار نہ باں
یک رندۓ پدا بلوچ قوم ءِ کُل شھیداناں سھریں دروت سھریں سلام کہ آہاں وتی زند پہ وتی بلوچ ءِ آجوئی ءِ جھد ءَ قربان
ـ کتگ ءُ وت ءَ دائمی نمیران کتگ
