ھمگام بلوچی
27 مارچ پہ بلوچستان ءُ پہ بلوچ راج ءَ سیاہ ءُ شومیں روچے کہ ھمے شومیں روچ ءَ بزاں 27مارچ 1948ءَ انگریزانی اڈ کرتگیں ملک پاکستان ءَ بلوچستان ءِ سرءَ ارش کتگ ءُ زور گپتگ ءُ بلوچستان ءِ پجار وتی ملک ءِ نام ءَ کتگ کہ مرچی دنیا ءِ تہ ءَ بلوچانی پجار پاکستانی انت بلوچ راج ءَ زانگ لوٹ ایت کہ بلوچستان پاکستان ءِ بھرے نہ بوتگ نہ بلوچستان ھندوستان ءِ بھرے بوتگ نہ کہ بلوچستان ایران ءِ بھرے بوتگ نہ کہ بلوچستان اوگانستان ءِ بھرے بوتگ بلکیں بلوچستان یک وت واجھیں ھند ءُ دمگے بوتگ کہ بلوچستان ءِ ھمک دمگ ءَ یک ھاکمے بوتگ ءُ بلوچستان آجو بوتگ ءُ بلوچستان چہ کدیم ءَ بلوچستان ءِ نندوک بوتگ انت انچوش کہ اے دگہ راج وتی سرزمینانی سر ءَ راجے ءِ دروشم ءَ آتکگ ءُ جھمنند بوتگ انت ھمے پیم ءَ بلوچستان ءِ نندوک انت ءُ بلوچ راج ءَ زانگ لوٹ ایت کہ بلوچ نہ ارب انت نہ چہ ھلب شام ءَ آتکگ انت راجدپتری راستی ایش انت کہ بلوچ راج 7000 ھپت ھزار سال پیش چہ مھتر ایسا ءَ اے سرزمین ءِ سرءَ نندوک بوتگ انت ءُ مھرگڑہ ءِ دمب ءُ نشان اِے شاھدی ءَ دیگ ءَ انت ءُ رند چہ مھتر ایسا ءَ579 سالءَ رند اسلام آتکگ کہ مرچی اسلام ءِ آیگ ءَ 1441سال انت ءُ رجب ءِ ماہ انت بزاں بلوچ راج ءَ اے سرزمین ءِ سر ءَ 9020
سال انت ءُ انگت یکے بگوش ایت کہ بلوچ ارب انت یا چہ ھلبءَ آتکگ انت گُڑا اے دژمنانی چال انت، ھلب ءَ ھما مردم آتکگ کہ آ اسلامی لشکر ءِ ھمراہ بوتگ وھدیکہ اود ءِ جاور ھراب بوتگ انت بلوچ لشکر ءَ واتر کتگ ءُ بلوچستان ءَ آتکگ انت ، بلوچ راج ءَ زانگ لوٹ ایت کہ بلوچستان آجوئیں ملکے بوتگ ءُ انگریزاں بلوچستان سے بھر ءَ بھر کتگ ءُ ایران ءُ اوگانستان ءُ پاکستان ءِ زوراکاں بلوچستان ءِ سرزمین ءِ سر ءَ پہ زور ارش کتگ ءُ بلوچستان اش ایرجیگ کتگ ءُ ھمے پیم رمس 27 مارچ ءَ پاکستان ءِ لشکر ءَ بلوچستان ءِ سر ءَ ارش کتگ ءُ ھان کلات دست گیر کتگ ءُ لسبیلہ ءِ جام ءُ ھاران ءِ نوشروانی ءُ کیچ نواب پیسرءَ لگور بوتگ انت ءُ وتی دیم اش سیاہ کتگ ءُ وتی نپ ءُ چارکلدار ءَ پاکستان ءِ گلامی اش من اتگ ،بلے ھان کلات ءِ برات میر ابدل کریم ءَ ھما روچ ءَ پاکستان ءِ گلامی نہ من اتگ ءُ گوں سرمچاراں پاکستان ءِ لشکر ءَ جنگ داتگ ءُ اے ھما جنگ کہ سرمچار کوھان انت ءُ وتی ساہ ءُ ارواہ ءَ بلوچستان ءِ آجوئی ءِ ھاتر ءَ ندر کنگ ءَ انت،،
او منی بلوچ راج شما دلپروش مہ بہ اِت ءُ وتی وت واجھی ءُ آجوئی ھاتر ءَ جھد بہ کن ات ءُ وتی دژمن ءِ پروش دیگ ءَ شمارا سبر ءُ بلوچی ھمت یکجا کنگی انت ءُ وتی سْرپانی تہ ءَ تپاکی آرگی انت ءُ زوراکانی ھمک چال ءِ دیم ءَ شمارا گوارچے دارگی انت ءُ دومی بلوچستان ءِ آجوئی بلوچ راج ءِ راجکماشانی زانت ءُ بلوچ سرمچارانی جوانیں جنگ ءُ ھور ءُ تپاکی ءِ سر ءَ اِنت,کہ مئے راجکماش وتی شترنج ءِ دانگاں جوانیں وڑے ءَ ایر کت اَنت ءُ دنیا ءِ جاوراں ھالاں سرپد انت گُڑا سوب مئیگ بیت مئے باسک ءُ باھڑ تیار بنت ما دژمن ءَ پروشت دات کنیں ما گوں تپاکی ءِ زور ءَ دژمن ءِ دیم ءَ مِڑ اِت کنیں ءُ وتی دژمنءَ لاچار کُت کنیں کہ گوں ما گپ ءُ ھبر بہ کنت ءُ وتی درآیگ ءِ جارءَ بہ جنت ءُ مئے آجوئی ءَ بہ مَنّ ایت اے وڑ ھما وھد ءَ بیت ءُ بوت کنت کہ مئے دیم گوں دژمنءَ بہ بیت ناکہ مئے دیم گوں وت براتاں بہ بیت دومی دژمن سک چالاک اِنت زانت کار اِنت آ لوٹ اِیت کہ سرمچاراں وت مہ وت ءَ وتی جیڑھانی تہ ءَ مان بہ گیشین اِیت ءُ سیمی اے پاکستانی لشکر ءَ بازیں مردگ باتن ءُ شیتانیں مردم ءُ گَل ءُ پارٹی وتی تہ ءَ آورتگ انت ءُ ھور کُتگ اَنت کہ اے بلوچ راجی جننزانی ورنا ءُ کماشاں چہ بلوچ لس مھلوکاں دور بہ کن انت اے دلار ءُ بلوچ دژمنیں پارٹی وڑ وڑیں پلینڈی گوں دژمن ءِ ھمراھی ءَ ساز انت کہ بلوچ لَس مھلوکاں چہ سرمچاراں دلپروش بہ کن انت اگاں مئے راجی جنز ءِ سرمچار ءُ کماش ءُ مستر دژمن ءِ چال ءُ چالاکیاں سرپد مہ بنت بلوچ راج وت مہ وتی جیڑھانی تہ ءَ دلگوش بنت باید انت کہ مئے راجی سرمچار ءُ راجی کماش دژمنءُ مردگ باتنانی چالاں بہ زان اَنت ءُ وتی لَس مھلوک ءَ دژمن ءِ چالاں سرپد بہ کن اَنت ءُ وتی تہ ءَ ھوری ءُ تپاکی یے بیار اَنت ءُ تپاکی مئے آجوی ءِ مان زمان اِنت لَس مھلوک راجی جنز ءِ باسک ءُ باھڑ ءُ زور اَنت زانت ءُ زانگ راجی جنز ءِ در ونت بہ بیت ءُ بلوچ سرمچارانی دیم گوں دژمن ءَ بہ بیت چے ءَ پاکستان ءِ لشکر ءَ دیر اِنت کہ بلوچانی بلوچیت لگت مال کتگ بلوچستانءِ آجوئی ءِ جنز ھما وھد ءَ دژمن ءَ پروشت دات کن انت کہ آ وتی بلوچ راج ءِ ھمک لس مھلوکاں آجوئی ءِ بارو ءَ جوانیں سرپدی بہ دنت ءُ آجوئی ءِ جنگ بلوچ راج ءَ وت ءَ کنگی اِنت ءُ ھمک ورنا ءُ پیرمرد ءُ ڈاکٹر ءُ استاد ءُ نوکدربر ءُ مکھیں مات ءُ ھاتونیں گوھار اے ھبر ءَ سرپد بہ بنت کہ پاکستان ءَ 27 مارچ ءَ بلوچستان زور گپتگ ءُ پاکستان ءَ وت ءَ ھچ وجودے نیست ،بلوچستان یک سرزمینے ءِ نام اِنت بلوچ راج ھمے سرزمین ءِ نندوک انت ءُ بلوچی بلوچانی زبان انت ۔ او منی بلوچ راج ! وتی گلامی ءَ بہ مار ءُ سرپد بہ بو کہ تئی سرزمین ءِ ھمک چیزاں پاکستان ءِ زوراک برگ انت دریا ماھیگ کوھانی سنگ مرمر ءُ زمین ءِ چیر ءِ اشکر ءُ زگال ءُ تانبہ ءُ رود ءُ تنگہ ءُ سوئی گیس ءُ گوکرت ءُ پیش ءُ دار ءُ ریک ءُ ڈل ءُ سنگ ءُ ھاکاں برگ ءُ پہ وت ماڑی ءُ آسراتی اڈ کنگ ءَ انت دگ ءُ شاھدگ ءُ وانگ جاہ ءُ شاھردبرجاہ اڈکنگ ءَ انت پہ وت ءَ ترھگس ءُ ھسپتال اڈکنگ ءَ انت بلے بلوچستان ءِ تہ ءَ نہ جوانیں وانگجاہ ھست نہ دگ ءُ شاھدگ ھست ءُ بجلی ھست ءُ نہ بلوچستان ءِ مھلوکاں سوئی گیس ءِ بھر رس ایت باید انت بلوچ راج سرپد بہ بیت ءُ پہ وتی آجوئی ءِ ھاتر ءَ بلوچ راجی جنزانی ھمراہ بہ بنت وتی آجوئی ھاتر ءَ جھد بہ کن انت اے دژمن کمزوریں دژمنے ھچ دلپروش مہ بہ اِت ءُ وتی ھک ءِ ھاتر ءَ جنگ بہ کن اِت چے ءَ ھک لوٹگی چیزے نہ انت پچ گرگی چیزے ۔
سوبیں بات بلوچ راج ءُ راجی سرمچار
