میان اُستمانی جیڑہ , کُردستان پنچُمی بَھر نبشتہ کار : ابدلستار بُگٹی

ھمگام بلوچی میان اُستمانی جیڑہ: کُردستان پنچُمی بَھر نبشتہ کار: ابدلستار بُگٹی چوناھیگا ما وتی گْوستگیں بَھراں ھمئے سرپدی دات کہ اولی میان اُستمانی جنگ ءَ رَند ءَ کُرد راج ءِ ڈیھ دِگریں ملکانی لاپ ءَ چُنڈ چُنڈ ءَ پُلگ بیتگ اَنت۔ یک بَھرے ماں زِرباری ءُ رودرآتک ترکی ءِ لاپ ءَ، دومی بَھر گوریچی ایران ءَ، سیمی بَھر ماں گوریچی ایراک ءُ چارمی بَھر گوریچی شام ءِ زیردستی ءَ دوردیگ بوت انت۔ من وتی نبشتانک ءِ گْوستگیں بَھراں ایراکی کُردانی جُھد ءُ سوبین بوگ ءِ ءُ تیوگیں کردانی یکمشتی، سیاسی ءُ جنگولی کُمک ءُ واھر ءِ بارو ءَ ھم سرپدی دات رند ءَ ترکی ءِ ھلاپ ءَ پی کے کے ءِ جنگولی گَلانی جُھدانی باروا مئے نبشتانک جُنزان انت۔ انچوشکہ چہ مئے گُْوستگیں بَھر ءَ ما گْوشتگ ھُدا کرد پی کے کے ءِ سر ءَ پد وش بوت وھدے جُلشکان 2012 ءِ شام ءَ ارب آشوب ءِ آس روک بیتگ انت ءُ شام ءَ مھلوک وت جنگے (CIVIL WAR) ودی کُت انت ءُ شام ءِ اراب سنی شام ءِ پاگواجہ ڈاکٹر اسد ءِ سر ءَ زھرشانی کن انت کہ چہ سرکار ءَ دستکشی ئِے بِہ کنت بلے اسد نہ منّ ایت اش پمیشکا زھرشانی تْرُند ءُ ھونیگ بنت پد ءَ تیوگیں شام ءِ استان نزور بیتگ گْوش ئے شام جِند ءِ سرکاری لشکر بَھر ءُ نزور بوت گُڑا اے درگت ءَ شام ءِ کرد ھم پہ وتواجھی ءِ ھاتر ءَ آگاہ بوتگ انت ءُ وتی ھک ءُ اُکبال ءِ ھاتر ءِ چیر جنگی جُنز ءِ راہ ءَ جُنزان بیتگ انت۔ شام ءِ زیردستیں کرد سیاسی PYD ءِ رھشون سالہ مسلم مھمد گوں وتی جنگولی گَل YPG ءُ زالبولانی چیرجنگی گَل PYJ ءَ پی کے کے ءِ جنگولی گَلاں(HPG ،TAK ءُ YJA- 3STAR) گوں تپاکی کتگ ءُ زیت شام ءِ نیمگی کردستان چہ شام ءِ سرکاری لشکر ءَ آجوش کتگ اش گڑا ترک کُردانی سیاسی گَل پی کے کے ءُ شامی کردانی سیاسی گَل پی وائی ڈی بزان دوئیناں گوں تپاکی ءَ اود ءَ روجاو ءِ نام ءَ یک استانے اڈ کتگ اش ءُ سرکار اش بندات کت۔ پد ءَ پی کے کے ءِ جنگولی گَل HPG، HDP، TAK ءُ آئی زالبولابی سرمچاری گَل YJA -3Star ءِ سرمچار ءُ پی وائی ڈی ءِ جنگولی گَل YPG ءُ گْوھارانی جنگولی گَل YPJ درست یکمشت بیت انت ءُ ترکی ءِ ھلاپ ءَ جنگ تَرّینتگ اش۔ اَنّی پی کے کے ءِ جنگولی گَلاں گوریچی ایراک ءَ ابید گوریچی شام ءِ کوھانی سر ءَ سنگر ءُ بُندر ٹھینتگ انت۔ شام ءِ مزنیں شھر روجاوا ءُ آپرین ءِ پرگنگ تیوگی ءَ پی کے کے ءُ پی وائی ڈی ءِ جنگولی گلانی دست ءَ انت۔ گڑا مرچیگیں دگنیا ءِ رھبند ءُ ھستیں تبھروھد (Current World Policy and World Affairs) ءِ رد ءَ یک میان اُستمانی رسانکدر گْوش ایت سھودی ارب، یو اے ای ءُ اسرائیل ءُ امریکہ ھم مرچیگیں تب ھر وھد ءِ رِد ءَ پی کے کے ءُ پی وائی ڈی ءِ جنگولی گَلانی واھر کنگ ءَ انت پمیشکا 6 سارتان 2019 ءَ ترکی ءَ اے تُھمت ءُ بُھتام ءِ نیمون ءَ شامی نیمگ ءِ کُردستان ءِ سر ءَ گوں بالیگراب ءُ دِیرجنّوکیں توپاں یک کَھرواریں اُرشے بنا کُتگ کہ ترکی ءِ نیمگی کُرد سیاسی گَل پی کے کے ءِ جنگولی گَل HPG، HDP، TAK ءُ آئی جنینی سرمچارانی گَل YJA -3Star ءِ سرمچار گوریچانی ایراک ءِ دمگ ءُ کوھاں( کوہ ء سنجار ءُ کوہ ء کندیل) سَنگر ءُ بندراں اڈکنگ ءَ رَند شام ءِ نیمگی وتواجھیں کُردستان ءِ دمگ ءَ وتی سنگراں اڈ کنگ ءَ انت۔ ترکی گْوش ایت کہ شام ءِ کردانی جنگولی گَل YPG ءُ آئی ءِ جنینی گَل YPJ پی کے کے ءِ جنگولی گَلاں گوں یکمشت ءُ تپاک انت۔ چوناھیگا ترکی سَک ترس ایت کہ ایراک ءُ شام ءِ کُردانی وتواجھی ءَ رند، بیرانی ءِ دیم گوں ترکی ءَ انت۔ ترکی پمیشکا وتی رکینگ ءَ پہ بے نپ ءُ بے سیتیں تچ تاگ کنگ ءَ انت۔ بلے ترکی نہ زانت کہ کرداں نہ ایراک ءِ زالمیں ھاکم سدام ھسین ءِ دیم ءَ سر جھل کتگ ءُ نیکہ چہ شام ءِ ھاکماں ترسیتگ انت۔ چوناھیگا اے وَ راست انت کہ تیوگیں کُرد راج یک یک ءَ گلامی ءِ سانکلاں سِندگ ءَ انت ۔اولی براں 1990 ءِ ھلیج جنگ ءَ رند ایراکی کُرد بازیں کربانی ءَ پد وتواجھی ءِ گِرگ ءَ سوبین بیت انت ءُ مرشی یک جتائیں ءُ وتواجھیں ڈیھے کہ KRG /Kurdistan Regional Government ءِ نام ءَ زانگ بیت جوڈ اش کتگ ۔ پد ءَ 2011 ءِ ارب آشوب ءَ رند وھدے تیوگیں شام جنگ ءُ بیرانی یے ءِ آماچ بیتگ ات ءُ شام ءِ سرکاری لشکر وت ماں وتی ءِ جنگاں گپتگ ات ءُ اے درگت ءَ 2012 ءَ شام ءِ کرداں ھم وتی وتواجھی ءِ جار جتگ۔ مرشی گوریچانی ءُ رودرآتکی شام ءَ ایشانی وتواجھی اِنت ءُ آئی ءِ لاپ ءَ ترکی ءِ ھلاپ ءَ جُھدکاریں سیاسی گَل پی کے کے ءُ شامی کرد پی وائی ڈی یکجاھی ءَ سرکار ءَ جُنزینگ انت۔ پی کے کے ءِ جنگولی گَل HPG، HDP، TAK ءُ آئی ءِ گْوھارانی سرمچاری گَل YJA -3Star ءُ پی وائی ڈی ءِ جنگولی گَل YPG ءُ گْوھارانی گَل YPJ ھوار ءُ یک انت۔ گُڑا ما زان ایں کہ ایشی ءِ سیمسر ترکی ءِ زیر دستیں کردستان ءَ ڈیک ور انت۔ پمیشکا ترکی نّی ترس ءَ دلاپ انت کہ پی کے کے ءُ پی وائی ڈی دوئیں آیوکیں وھداں ھوار بنت ءُ ترکی ءِ ھلاپ ءَ چیر جنگے بنا کن انت۔پیش ءَ پی کے کے ایوک ءَ ترکی ءِ ھلاپ ءَ جُھد ءَ ات ءُ ایراکی کردستان ءِ کوہ ء سنجار ءُ کوہ ء کندیل ءَ ابید ایشاں دومی ھچ جاہ بندر ءُ سنگر نیست ات بلے نّی تیوگیں گوریچانی ءُ رودرآتکی شام ءِ کردستان پی کے کے ءِ جند ءِ وتواجہ ءُ ڈیھ انت۔ آپرین، تَل آبیاد، اکالے، راسلن، کمشلی، دْریک، ھسکاہ، الروج، الھاول، آنیسہ ءُ رکاہ ءِ ڈولیں مزنیں شھر ءُ کوہ پی کے کے ءُ پی وائی ڈی ءِ جنگولی گَلانی دست ءَ انت ءُ بزان اود ءَ ایشانی راج انت۔ ترکی ءَ 6 سارتان 2019 ءَ اُرش پہ اے مول مُراد ءَ بنا کت کہ ترکی ءُ شامی گوریچانی ءُ رودرآتکی شامی کردستان ءِ سیمسر ءَ کُرد میزران مہ بند انت۔ بلکین شام ءِ وت ما وت ءِ جنگ ءِ وھد ءَ ترکی ءِ نیمگ ءَ لَڈتگیں شامی اَرب آپرین، تَل آبیاد، اکالے، راسلن، کمشلی ءُ دْریک ءِ دمگاں آباد کنگ بہ بنت۔ بزاں کردانی سرزمین ءُ ڈیھ ءَ شامی سنی ئیں اراب آباد کنگ بنت۔ 30 کلومیٹر پْراھیں یک باھوٹی اتراپ ءِ بزاں Safe Zone ءِ اڈ کنگ بیت کہ کرد ترکی ءِ سیمسر ءَ مہ بنت بزان کہ دوھیں نیمگ ءِ کُردانی نیام ءَ شامی لَڈتگیں ارب آباد بنت پمیشکا ترکی گوں شام ءِ ارب یاگیاں کردستان ءِ سر ءَ اُرش کنگ ءَ انت۔ بلے کْرد YPG ءِ جارکش واجہ نوری مھمد ماں یک جارے ءَ گْوشت “کردستان مئے ڈیھ ءُ وتن انت گُڑا ما چی ءَ شامی لَڈتگیں اَرباں جاگہ بِہ دے ایں ءُ اے وَ بیت نہ کنت کہ چہ زور کَسے کیت ءُ دیگہ راجے دگریں راجے مئے کُردانی ڈیھ ءَ آباد بہ کن پمیشکا اے بیت نہ کنت کہ ترکی لکانی کَچّ ءَ لَڈتگیں ارباں بیار ایت ءُ کُردستان ءَ آباد اش بہ کنت ءُ پد ءَ اے ایمنی ءُ سلامتی ءَ لَکّیں ٹَکّ ءُ کَھول میزران نہ بنت البت ترکی میان اُستمانی راجاں ریپنّگ ءَ انت ءُ اے تیوگیں ٹکّ ءُ تمَن پد ءَ کُشگ بنت گُڑا باید انت اے شامی لَڈتگیں تمَن وتی جِند ءِ شھر ءُ دَمگاں وتر بِہ کن انت۔” گُڑا YPG ءِمزن سروگان واجہ سپیان ھمو ءُ ھاسیں جنگولی سروگان واجہ سوّن ابراھیم ءَ گوشتگ کہ کُرد وتی ماتیں وتن ءِ پھازگ ءَ زان انت ءُ ترکی ءَ را بے سوبی ابرمی نبشتہ انت۔ پی کے کے ءِ پاگواجہ سمِل بیاک ھم کرد راج ءَ را اے کڈن ءُ پنت کتگ کہ جُھد ءَ ابید ھچ را نیست انت ءُ کرد راج ءَ را ناں کہ امریکہ ءُ رودرآتکی استاناں ءُ نیکہ روس ءِ سر ءَ باور کنگی انت بلکیں وتی جُھد ءِ سر ءَ باور کنگ اَلمی انت۔ چوناھیگا ترکی ءِ شامی کردستان ءِ سر ءَ اے اولی اُرش نہ انت ایشی ءَ چہ ساری 2018 ءِ بَھاران ءِ وھد ءَ اوں ترکی ءَ گوں شامی اَرب یاگیاں روجاوا ءُ آپرین ءِ دمگاں بلاھیں اُرش کتگ ات بلے ترکی بے سوب بوتگ ات۔ مرشی میان اُستمان ءِ تیوگیں استاناں ترکی ءِ اے اُرش ءَ را لانت داتگ۔ سھودی ارب ءُ یو اے ای ءَ بیھار داتگ کہ ترکی میانجی ئیں رودرآتکی(Middle East) ءَ نوکیں شُھرتے ودی کنگ انت۔ تیوگیں ارب استاناں ھم ترکی ءِ کردانی سر ءَ اُرش ءَ را لانت داتگ ھمئے ڈول ءَ تیوگیں روایرشُتی استاناں(Western Countries) توری پرانس، انگلستانءُ جرمنی گْوش ئے یا آمریکہ ءَ گْوش ئے درست ترکی ءِ اُرش ءِ سر ءَ زَھر انت۔ ھندوستان ءَ ھم ترکی ءَ را لانت داتگ۔ بلے ترکی ھچ نہ منّ ایت۔۔ دومی نیمگ ءَ اراکی کرد رھشون واجہ مھسود بارزانی ءَ ھم ترکی ءِ اُرش ءَ لانت داتگ ءُ جنگ ءِ زیت ھلاسیءَ گوشتگ ئِے پد ءَ تیوگیں کرد جنگولی گَل ترک سرکاری لشکر ءَ سَکیں جنگی پَسّو دیگ ءَ انت ءُ دلجم انت کہ اے جنگ پہ ترکی ءَ بیرانی یے بیت ءُ گوشگ ءَ انت کہ ایراکی ءُ شامی کردستان ءِ وتواجھی ءُ آجوئی ءِ رَند ءَ اے جنگ ترکی ءَ جِیدے بدل کنت۔ گیدی ءِ بلاھیں جنگی زانوگرانی گْوشت ءُ پالانی رِد ءَ اگاں 40 ملکانی اَراب تپاکی گَل(Arab Coalition) یمن ءَ چہ 2015 ءَ بے سوب انت اود ءَ یک چیر جنگی گَلےکہ نام ئِے ھوتی انت پروش اش دات نہ کت گُڑا ترکی چون چیرجنگی ءِ بلد ءُ زَبریں کرد ءَ را ھلاس کت کنت ءُ پروش ئِے دات کنت۔ البت اے جنگ پہ ترکی ءَ جانی ءُ زَر زوالی یے بیت۔ اگاں 90،80 ءُ 2000 ءِ دَھکاں ترکی ءَ ایوکیں پی کے کے ءَ را پروش دات نہ کت وھدے آئی ءِ بُندر ءُ سنگر ایوک ءَ ایراکی کردستان ءِ دمگ کوہ سنجار ءُ کوہ کندیل ءِ لاپ ات انت بلے نّی پی کے کے ءُ وائی پی ڈی ءِ جنگولی گَل یکمشت ءُ تپاک انت تیوگیں ارب ءِ استان گوش ئے توری میان اُستمانی دِگریں استان گْوش ئے کُردانی کُمک ءَ انت۔