ھمگام بلوچی
مئے لچہ کار ءُ نبیسوک باز اَنت بلے آیانی کتاب پرچہ کم اَنت؟ اِے یک جُستے!!!! مئے لچہ کار ءُ ادیب ءُ دانشوراں کتاب باز نبشتہ کُتگ بلے اے بنگپ ءِ پُژدر ءَ پد ءَ جُستے درکیت ھرچ گپ ءِ پژدر ءَ دگہ داستانے درکیت اے بلوچی لبزانک ءِ مستریں جیڑہ اِنت ءُ دومی لبزانک ءُ راجکاری یک دومی ءَ گوں ھمگرنچ اَنت ءُ لبزانک ءَ چہ راجکاری بنگیج بیت ءُ چاگرد ءِ تہ ءَ یک جنزے کار اِیت ۔ مئے لبزانک تہ ءَ لچہ کاری باز دیم ءَ شُتگ باز کتاب شنگ بوتگ بلے!!!! بلے،،،ھمے بلے پُشت ءَ پد ءَ یک جستے کیت کہ دل ءَ باز نہ دلسَر ءُ دلتپرکہ کنت ءُ دومی ندکار ءُ ادیباں رم کاری یا رم نویسی ءِ پرچا دلگوش نہ داتگ ءُ پرچا کم نبشتہ کنگ بوتگ ءُ جوانیں کتاب پرچا دیم ءَ نیاتکگ اے دگہ جستے !!!!! ھنچوشکہ رم نویسی ءِ لوٹ نرم نازرکیں ھیالانی درنگازی ءُ چاگرد ءِ چست ءُ ایر ءُ اِے دگہ تھرانی سر ءَ وتی مارشت ءُ زانت ءِ بور ءِ تاچگ ءِ نام اِنت ءُ بلوچی لبزانک ءِ تہ ءَ رم نویسی آ پیم ءَ دیم ءَ نہ شُتگ کہ مردم بہ گوش اِیت کہ درستیں تھرانی تہ ءَ رم نویسی بوتگ بلے ھمے دھے سال بیت کہ مئے ادیب ءُ ندکار رم ءِ نیمگ ءَ دلگوش دئیگ ءَ اَنت ءُ آزمانک ءُ نبشتانک نبشتہ کنگ ءَ اَنت ءُ بازیں آزمانکی کتابے شنگ بوتگ ءُ ھمک ماھتاکانی تہ ءَ جوانیں آزمانک ءُ نبشتانک ءُ گیدی داستاں ءُ گُلگِدار ءُ سرگوست ءُ چاگرد ءِ جاورانی ھال ءُ جاورھال اِش مان اَنت ءُ مئے بلوچی ءِ رم نویسی میدان سک مزن ءُ پراہ اِنت اُمیت کن اِیں کہ مئے ادیب ءُ ندکار وتی ند ءَ دوست نہ دار اَنت ءُ پہ بلوچی زبان ءِ دیمروی ءِ ھاتر ءَ ادب ءِ درستیں تھرانی تہ ءَ وتی سسّا ءُ ھیالاں درشان کن اَنت. دلگوش کرزیں گپے کہ مئے ادیب ءُ زانتکارانی مالی جاور ھم اے وڑ نہ اَنت کہ آ وتی کتاباں شنگ بہ کن اَنت اگاں یکے وتی کتاب ءَ شنگ کنت آ کتاب ءِ بھا کنگ چہ شنگ کنگ ءَ گران تر اِنت ءُ گپ جنوک ءُ بلوچی زبان ءِ دوست باز اَنت بلے 500 دانگ کتاب ءِ زورگ ءَ تیار نہ اَنت .رم نویسی کتاب بہ بنت یا شائری کتاب بہ بنت یا روتاک ءُ تاکبند ءُ ماھتاک بہ بنت ھما وھد ءَ دیمروی کن اَنت کہ وانوک اِش بزور اَنت ءُ بوان اَنت گُڑا زبان ءِ درستیں تھرانی دیمروئی بیت ءُ ادیب ءُ ندکارانی دلبڈی بیت ءُ زبان وتی راہ ءَ درگیجیت باید مئے بلوچ مھلوک وتی زبان ءِ کتاباں بہ زور انت بوان انت ءُ دومی مزن ھور بلوچ ادیب ءُ زانتکار وتی بلوچ ڈیھ ادیبانی دلبڈی ءَ بہ کن انت ءُ ھما ادیبے کہ آئی کتاب پہ چاپ ءُ شنگ ءَ تیار اِنت آئی مالی کمک ءَ بہ کن انت ءُ ھما چاپ ءُ شنگ بوتگیں کتاب ءَ بہ زور انت ءُ بوان انت ءُ دگر ءَ زورگ ءُ وانگ ءِ سکین ءَ بہ دینت ءُ ھما ادیب ءُ ندکار کہ ملک ءَ انت آ وتی تہ ءَ یکجھتی ءُ ھوری یے بیار اَنت ءُ ھما بلوچی ادارہ ءُ اکیڈمی کہ بلوچی زبان ءِ ھاتر ءَ کار ءَ اَنت آیاں چہ بلوچستان ھکومت ءِ نیمگ ءَ سالانہ مُز رس ایت آ اے ادیبانی کتاباں بہ زور انت ءُ کالج ءُ اسکولاں پہ ھما نوکدربر ءُ استادانی سر ءَ بھر بہ کن اَنت کہ آ پہ بلوچی ءِ سر ءَ کار ءَ اَنت ءُ وانگ ءَ اَنت بلے مئے ادارہ ءُ اکیڈمایانی مردم مدام یک ءُ دومی ءَ ڈوبار اَنت ءُ وتی وھد ءُ آتکگیں باندات ءِ ھیال نہ انت اگاں اے اکیڈمی ءُ ادارہ وتی زمہ داریاں سرپد بہ بنت 500 دانگ کتاب بھا بیت ءُ ندکار ءُ ادیبانی دلبڈی بیت بلے گپ پد ءَ ھما ایرجیگی ءُ چمداری انت ایرجیگیں ادارہ ءُ ایرجیگیں اکیڈمی کہ پگر ءُ ھیال زھن آجو نہ انت ءُ بندیگ انت ءُ ادارھانی مستر ءُ کماش ناتپاک اَنت پمے ھاتر ءَ اے ادارھانی کار نہ بوگ ءِ برابر انت اگاں اے ادارہ ءُ ادارھانی کماش وتی زمہ داریاں سرپد بہ بنت بلوچی زبان ءِ باز دیمروی بیت
گوش انت دو لچہ کار بنت درملک ءَ رواَنت یک روچے دوئیں دریا ءُ زر ءِ لمب ءُ کنارہ ءَ چکران بنت ءُ یک جاھے نند اَنت یک لچہ کارے گوش اِیت کہ منَ دوشی دوگال پِر بستگ گوش اِش دار آ گوش اِیت بگوش گُڑا آ لچہ کار اے وڑ ءَ گوش اِیت کہ
شپ تھار ماہ ءُ جن تھار دیم اِنت لیڑہ وروک اِنت ءُ کائیگر جنگول اِنت بَھر مہ بات دوست ءُ دژمن ءَ شالا
دومی لچہ کار گوش اِیت نہ لچہ اے وڑ ءَ بہ بیت جوان تر اِنت گُڑا دومی لچہ کار گوش اِیت کہ
شپ تھار بات ءُ جن تھار دیم بات لیڑہ وروک بات ءُ کائیگر جنگول بات بلے ملک وتی بات ءُ ھاکم گموار بات
وھدے کہ ملک وتیگ بیت ءُ ھاکم گموار ادیب ءُ دانشور ءُ لچہ کار ءُ لَس مھلوکانی جیڑہ گیش گیوار بنت!!!
