تبلیسی (ہمگام نیوز ) مانیٹرنگ ڈیسک کے مطابق جارجیا کی داخلی سلامتی سروس نے دارالحکومت تبلیسی میں تین چینی شہریوں کو گرفتار کیا ہے جو مبینہ طور پر تقریباً دو کلوگرام یورینیم غیر قانونی طور پر خریدنے کی کوشش کر رہے تھے۔
حکام کے مطابق ملزمان اس مواد کے عوض چار لاکھ امریکی ڈالر ادا کرنے کا ارادہ رکھتے تھے اور اسے روس کے راستے چین منتقل کرنے کی منصوبہ بندی کر رہے تھے۔
بیان میں بتایا گیا کہ برآمد کیا گیا مواد جوہری نوعیت کا ہے، تاہم اس کے ممکنہ استعمال یا مقصد کے بارے میں تفصیل فراہم نہیں کی گئی۔
سیکیورٹی حکام کا کہنا ہے کہ گرفتار افراد پر ایسے الزامات عائد کیے گئے ہیں جن کے تحت انہیں دس سال تک قید کی سزا ہو سکتی ہے۔
یاد رہے کہ سوویت یونین کے خاتمے کے بعد سے جارجیا سمیت کئی سابقہ سوویت ریاستیں جوہری مواد کی غیر قانونی تجارت کے چیلنجز کا سامنا کر رہی ہیں۔
