انڈیا میں حکام کے مطابق ریاست اتر پردیش کے ضلع کانپور میں مسافر ٹرین کے حادثے میں کم سے کم 91 افراد ہلاک ہو ئے گئے ہیں اور درجنوں زخمی ہیں۔اتوار کو مسافر ٹرین ‘اندور پٹنہ ایکسپریس’ کا حادثہ علی الصبح کانپور شہر کے قریب پوکھرایاں کے پاس میں ہوا۔ حادثے کے وجہ سے مسافر ٹرین کے 14 ڈبے پٹری سے اتر گئے۔اس حادثے میں سو سے زیادہ افراد زخمی ہوئے ہیں جبکہ جائے وقوعہ سے ملبہ ہٹانے اور امدادی کارراوئياں جاری ہیں۔ریاست کے جی ڈی پی جاوید احمد نے میڈیا سے بات چیت میں بتایا کہ اب بھی دو بوگیاں ایک دوسرے میں پھنسی ہوئی ہیں اور انھیں کاٹ کر نکالنے کا کام چل رہا ہے۔ریلوے کے اعلی اہلکار انیل سکیسینا کا کہنا ہے کہ کئی مسافر ابھی بھی ڈبے میں پھنسے ہوئے ہیں۔پولیس حکام کے مطابق صبح تقریًبا ساڑھے تین بجے یہ حادثہ پیش آیا۔ جائے وقوعہ پر 250 پولیس اہلکار تعینات ہیں۔انڈیا کے وزیراعظم نریندر مودی نے ٹوئٹر پر جاری پیغام میں ٹرین حادثے پر شدید غم کا اظہار کیا ہے۔ انھوں نے کہا کہ وہ متاثرہ افراد کے غم میں برابر کے شریک ہیں۔وزیراعظم مودی نے کہا کہ انھوں نے وزیر ریل سوریش پرہبو سے بات کی ہے جو ’موجود حالات کی نگرانی خود کر رہے ہیں۔‘انڈیا کے وزیر ریل کا کہنا ہے کہ ’ٹرین حادثے کے ذمہ داروں کے خلاف سخت کارروائئ کی جائے گی۔انھوں نے کہا کہ ’واقعے فوری کی تحقیقات کا حکم دیا ہے اور اس حادثے میں ہلاک ہونے والوں کے ورثا کو معاوضہ ادا کیا جائے گا۔‘ریسکیو اہلکاروں کا کہنا ہے کہ حادثے میں مزید ہلاکتوں کا امکان ہے۔ٹرین کی بوگیوں کی پٹری سے اترنے کی وجہ ابھی تک یہ واضح نہیں ہو سکی ہے۔حادثے کا شکار ہونے والی ٹرین پر سفر کرنے والے ایک مسافر نے بی بی سی کو بتایا کہ ‘رات کے تین بجے کے قریب ہمیں زوردار جھٹکا لگا۔ کئی بوگیاں پٹری سے اتر گئیں۔ ہر ایک صدمے میں تھا، میں نے خود کئی لاشیں اور زخمی دیکھے۔‘کانپور سٹیشن ریلوے کے اہم جنکشنز میں سے ایک ہے اور یہاں سے ہر روز سینکڑوں ٹرینیں گزرتی ہیں۔ریلوے کے ترجمان انیل سکسینا نے بتایا کہ کانپور سے گزرنے والی دوسری ٹرینوں کا رخ موڑ دیا گیا ہے۔انڈیا میں ریلوے کا نظام پرانا ہونے کے سبب ٹرین کے حادثے معمول کی بات ہیں۔ایک اندازے کے مطابق انڈیا میں ایک دن میں دو کروڑ 30 لاکھ افراد ٹرین کے ذریعے سفر کرتے ہیں۔
