نیویارک (ہمگام نیوز ڈیسک) اقوام متحدہ کی سلامتی کونسل نے کشمیر پلوامہ حملے کو “بھیانک اور بزدلانہ” قرار دیتے ہوئے کہا ہے کہ کونسل کے ارکان اس حملے کی سخت ترین الفاظ میں مذمت کرتے ہیں جس کی ذمہ داری بیان کے مطابق جیشِ محمد نے قبول کی ہے۔بیان میں کہا گیا ہے کہ حملے کی سازش کرنے والوں، اس میں ملوث افراد، اس کے لیے وسائل فراہم کرنے والوں اور تعاون کرنے والوں کو انصاف کے کٹہرے میں لانے کی ضرورت ہے۔اقوامِ متحدہ کی سلامتی کونسل نے بھارت کے زیرِ انتظام کشمیر میں گزشتہ ہفتے ہونے والے خود کش حملے کی مذمت کی ہے اور حملے کے ذمہ داران کو انصاف کے کٹہرے میں لانے کا مطالبہ کیا ہے۔
سلامتی کونسل کی جانب سے یہ بیان گزشتہ روز حملے کے پورے ایک ہفتے بعد جاری کیا گیا ہے البتہ اس میں پاکستان کا کوئی ذکر نہیں۔گزشتہ ہفتے انڈین کشمیر کے ضلع پلوامہ میں ہونے والے اس حملے میں انڈیا کی وفاقی پولیس کے لگ بھگ 50 اہلکار ہلاک ہوگئے تھے۔
واضع رہے انڈیا نے اس حملے کا ذمہ دار پاکستان کو ٹہرایا ہے اور اس کےخلاف تجارت کی معطلی سمیت کئی اقدامات کیے ہیں۔ تاہم پاکستان حملے میں ملوث ہونے کا الزام رد کرچکا ہے۔
گزشتہ روز جاری کیے جانے والے اپنے ایک بیان میں سلامتی کونسل نے پلوامہ حملے کو “بھیانک اور بزدلانہ عمل” قرار دیتے ہوئے کہا ہے کہ کونسل کے ارکان اس حملے کی سخت ترین الفاظ میں مذمت کرتے ہیں جس کی ذمہ داری بیان کے مطابق جیشِ محمد نے قبول کی ہے۔بیان میں کہا گیا ہے کہ حملے کی سازش کرنے والوں، اس میں ملوث افراد، اس کے لیے وسائل فراہم کرنے والوں اور تعاون کرنے والوں کو انصاف کے کٹہرے میں لانے کی ضرورت ہے۔
بیان کے مطابق کونسل تمام ملکوں پر زور دیتی ہے کہ وہ واقعے کے ذمے داران کے خلاف کارروائی کے لیے سلامتی کونسل کی قراردادوں اور بین الاقوامی قوانین کے تحت عائد ذمہ داریوں کے مطابق انڈیا کی حکومت اور دیگر اداروں سے مکمل تعاون کریں۔
بیان میں مزید کہا گیا ہے کہ سکیورٹی کونسل سمجھتی ہے کہ دہشت گردی کی کوئی بھی کارروائی سراسر مجرمانہ فعل ہے اور چاہے اس کا محرک کچھ بھی ہو، ایسی کار روائیوں کا دفاع نہیں کیا جاسکتا۔
بیان کے مطابق دہشت گردی عالمی امن کے لیے خطرہ ہے جس کا دنیا کے تمام ملکوں کو ہر ممکن طریقے سے مقابلہ کرنا چاہیے۔
انڈین میڈیا کے مطابق سلامتی کونسل نے پلوامہ حملے سے متعلق یہ بیان کونسل کے ارکان کے مابین تفصیلی صلاح مشورے کے بعد جاری کیا ہے۔
