آزمـــــانک : بَنـدیگـیں شانتُل نبـشتـہ کار : جیئنـــد کلــمتـی

ہمگام بلوچی آزمانک : آئی ءَ یک شانتل ءِ داشتگ ات ….صوب اے سرا وهدے روچ ءَ ٹِک جَت ….. شانتل ءِ ارس یلا بیت انت ….. ءُ کدی کدی گِستا یک دگئے شانتل ءَ چم وتی امئے بندیگ ءِ شانتل ءَ سک دات انت …… کسانیں گونڈلا وتی مات جُست کُت ….بُگش منی املّی … شانتل پرچہ گِریت؟ … شانتل ءَ بلکے وش نبئ ؟.. شانتل ءَ بلکے وتی مات ءِ یاد گیـــــر کایاں ؟….شانتل بلکے وت یک مات ءِ ؟……….. ماتی ءَ جواب دات ..منی بچ مُرگ بلکے شُدیگ اِنت ؟ بلے شانتُل چی زانت درد چی اے..۔۔؟ شانتلءَ دل مان نیست کہ وتی درد ءَ جاگہ بدنت ……ساهدار چی زان انت کہ زاهگ ءِ دوستی چی اے ………؟ مرچی چارده سال ءَ رند … لوگ دیما هما شانتل ءِ بندیگ جاه انگت درتکا ………گُڈاه شَانتُل کجاه انت ؟ مات ءَ یل داتگ ؟ یا کہ وت بندی جاه ءِ پروشتگ ؟ بلے شانتُل ءَ کرنے بیت کـــــہ مُرتگ … آئی جُون ماتی ءَ چہ گِس ءَ دُور چگل دات …. ءُ جُون واراں آئی ءِ درائیں گُوشت وارت انت ……… ءُ آئی بانـــــزل گوات ءِ همـــــراه بوت انت ……….. بلے ماتی ءِ تاسُپیں بچ کُجاه اِنت ….؟ بلکے آئی ءَ سانگ کُتگ .؟ بلکے آه یک بلائیں ڈاکٹر ءُ ماشٹر ءِ ؟ بلے آئی ءَ سک دیر انت کـــــہ بندی جاهاں بند اِنت ….سَمین کہ لوڈیت ماتی ءِ ارس هم رچ انت …مات پریاد کنت بلے شَانتل ءَ واهی ءُ زاری نہ کُت انگت …… مـــــرچی بازار ءِ هالو ءَ نوکیں هال ءِ گُون انت …. کوکار ءُ زاری کنان اَت …. ءُ مسیت ءِ ملاها هم یک بلاهیں اُف ءِ روڈا جت …. ماتی ءَ وتی گُوش پہ مسیت ءَ کُت انت ….. پِلانی ءِ تاسُپیں بچ ءِ لاش مزن لمبیں کہیـــــر ءِ چیـــــرا کپتگ ..گُوں مِیتگ ءِ مـــــردُماں دز بندی انت ….کہ جون ءَ چِست بِکن انت ….پہ ماتی ءِ گُوشاں مُلاهے توارا کارچ ءِ گُون ات ءُ دل ءَ بُرّهان اَت ….ماتی تچان ات دیم پہ هما مزن لمبیں کہیـــــر ءَ ….. ماتی ءَ چمپل ءِ سُد نیست ات ….ماتی ءِ سریگ گوات ءَ گُون ات ….انچُش کہ شانتُل ءِ پُٹ گوات ءِ همراه ات انت ….