اولی بَھر
نبشتہ کار: واسیپ ھیات
ھمگام بلوچی
انچوشکہ گْوش اَنت کہ برے برے ناگُمانی چہ مردم ءِ دپ ءَ راز ءُ چیریں ھبر پاشک بنت۔ امروز ءَ یک الباریں زانتکارے ھم بلاھیں رازدارے بیت کنت داں وھدے کہ آئی راز ءِ شِست، راز ءِ مول ءُ مراد پِیلّو نہ بنت آ مدام راز ءِ ھیالداری ءَ کنت بلے انگت چہ ناگمانی ءَ یا پہ نہ زانتکاری ءَ یا پد ءَ زھر ءِ ساھت ءَ ھم برے برے راز پاشک بنت۔
البت یک استانے ءِ سَک زمہ واریں مردم چُشیں رَدی باید اِنت ھجبر مہ کنت کہ یک ھاسیں ءُ یک بے کساسیں راجی پائدگ ءِ راز ءَ ماں جارکشّی ءِ وھد ءَ دپ ءَ بیار ایت ئِے۔ بلے یک آدم زات ءُ دومی زالبول گُڑا میار ھم نہ اِنت کدی کدی راز ءِ اشارت پدر بنت۔انچوشکہ ما زان ایں کہ 2006 ءِ وھد ءَ لیبنان ءِ ھزبُ اللہ ءِ گَل ءَ اسرائیل ءِ سر ءَ کمیں اُرُش کتگ اَت پد ءَ دوئیں نیمگاں جاور سک نگیگی بوتگ انت۔ آ وھدی امریکہ ءِ ڈنّی کاردار بانُک کونڈولیزا رائیس پہ جیڑہ ءِ ھلاسی ءَ بے کساس تکانسر ءُ جُھد ءَ ات کہ بیرانی کم بیت ءُ جیڑہ ءِ دائم توجیلے بِہ بیت پمیشکا آ روچاں بانُک پہ جنگ ءِ ھلاسی ءَ اِد ءُ اود ءَ تچان ات۔ گڑا جُلکان 2006 ءَ اسرائیل ءِ بُندری شھر تلھبیب ءَ گوں اسرائیل ءِ مزن وزیر آیود اولمرت ءِ ھواری ءَ پہ ناگمانی ءَ ماں جارکشّی ءِ ساھت ءَ چہ آئی ءِ دپ ءَ “نوکیں میانجی ئیں رودرآتک” ءِ گال درآتک۔ ڈنّی کاردار بانُک کونڈولیزا رائیس سَک زھر اَت پمیشکا کمیں رَد گپت بلے وت ءَ را داشتگ ئِے، جارکشی ءِ وھد ءَ گوشت ئِے کہ نی ما زان ایں کہ باید انت ما امریکہ، اسرائیل ءُ برتانیہ پہ دائمی ایمن ءِ واستا “نوکیں میانجی ئیں رودرآتک” ءِ واستا ءَ کار ءَ بنا بہ کن ایں۔ گڑا ھمے ساھت ءَ رسکدر ءِ اھوالکار ءُ تاکار ھبکّہ بوت اَنت ءُ چہ بانُک ءَ جُست اش کت “کاردار نوکیں میانجی ئیں رودرآتک اے چونیں چیزے۔۔۔۔”
بلے بانُک ءَ مار ات کہ راز پاشک بوگ ءَ اَنت گُڑا گوشت ئِے “مارا نوکیں توجِیلے پہ میانجی ئیں رودرآتک ءِ واستا درگیجگی انت پمیشکا من ھمے گْوشگ ءَ اِت آں”۔
بلے انگت ءَ کسے ءَ نہ زانت کہ چے بوگ انت۔ آ وھدی لیبنان ءَ ھوار دگریں استان ھم چہ ڈنی کاردار بانُک کونڈولیزا رائیس ءِ ھبراں وش نہ بوتگ اَت چی ءَ کہ شپ روچ اسرائیلی جنگی بالیگراب لبینان ءِ سر ءَ بمباں گْوارینگ ءَ ات انت ءُ جنگ ءِ سوب ءَ بےکساس بیرانی ودی بوگ ءَ ات۔
پد ءَ چہ بازیں شوھاز ءُ تپاساں رند اے زانگ بوت کہ چہ ماہ مولمان ءُ کِرا 2005 تا اُستمان 2006 ءِ وھد ءَ امریکہ ءِ چیریں ادارہ ءِ دومی کارمستر واجہ لیُٹینیٹ کولنل رالپ پیٹرز ءَ کہ آ وھد ءَ واجہ رالپ پیٹرز یو ایس نیشنل وار آکیڈمی ءِ لاپ ءَ کار ءَ ات، چہ بے کساس زھمتکشی ءَ رند یکے وتی توجِیل ءُ سوجے پہ دائمی جیڑانی ھلاسی ءَ وتی لشکری بوس ءَ را دات۔ پد ءَ آئی ءِ جنگی لشکر ءِ بوس ءَ اے سوج ءُ پنت (پروپوزل) مَنّ اِت ءُ رند ءَ پہ امریکہ ءِ شوندات کنوکانی (پالیسی میکرز) دیم ءَ آؤرت۔ پد ءَ اود ءَ ھم منّگ ئِے بوت ءُ پمیشکا دیم ءَ روان بوت ءُ امریکہ ءِ پاگواجہ جارج بوش ءُ آئی ءِ گَل ءِ دیم ءَ آرگ بوت۔ اود ءَ امریکہ ءِ ھاسیں شوندات کنوکاں ماں یک کبلیں بانے ءَ درشان کنگ بوت۔ ھمے کبلیں بان ءِ لاپ ءَ امریکہ ءِ پاگواجہ بوش، ڈنّی ملکانی کاردار واجہ کولن پاؤل ءُ استان ءِ کاردار بانُک کونڈولیزا رائیس ھم ساڑی اِت اَنت کہ دراھیں لیکچر دلگوش اش کُت۔ بزاں کہ بانُک کونڈولیزا رائیس ھما بان ءِ لاپ ءَ اِت کہ اود ءَ چے ٹَوک ءُ توار بیگ ءَ اِت اَنت ءُ چی سوڑگ بیتگ اَنت چمیشکا بانُک ءَ را ھر چیز ءِ سما ات کہ من چے گْوشگ ءَ آں۔ پمیشکا گْوش انت کہ بانُک ءَ اد ءَ راز ءِ اشارتے دات بلے مردماں آ وھدی ھچ نہ زانتگ۔
پد ءَ پہ لس مھلوک ءِ تہ ءَ آگاھی ءُ پلّامُرزی ءِ گِرگ ءُ پہ امریکہ ءِ جنگی لشکر ءِ لاپ ءِ سرپدی دیگ ءِ ھاتر ءَ ، بزاں کہ کاردار بانُک کونڈولیزا رائیس جارکشّی سَے روچ ءَ رند آئی ءَ ھمے توجیلّ ماں یک نبشتانکے درشم ءَ امریکہ ءُ نامداریں جنگی لشکر ءِ ماھتاک ءُ تندجاہ آرمڈ پورسز جورنل ءِ لاپ ءَ جُلکان 2006 شنگ کنائینت۔
چہ ھمے نبشتانک ءَ واجہ رالپ پیٹرز ءَ نبیس اِت کہ تیوگیں میانجی ئیں رودرآتکی استانانی ھستیں سیم سر رَد انت، اود ءِ کمیں راجانی(منوروٹی) سر زلم بیگ انت پمیشکا میانجی ئیں رودرآتکی استان مدام جنگ ءُ جدل اَنت۔ لھتیں درور ئِے دات کہ لیبنان ءِ تہ ءَ شیئا سونیانی سر ءَ کھَر کن انت بزاں سیاسی ءُ پوریاگِری ءِ ھک ءَ چہ زبھر انت۔ یمن ءَ سونی شیئانی سر ءَ زلم ءَ انت۔ ایراک سونی ءُ کردانی سر ءَ گیشی کن انت ترکی ءُ شام کرد ءُ سونیانی سر ءَ ھمے وڑ ءَ پاکستان ءُ ایران بلوچ ءِ سر ءَ پد ءَ ایران دومی نیمگ ءَ سونی ءُ کردانی سر ءَ زلم ءُ زوراکی ءَ اِنت چمیشکا ھر نیمگے ءَ آس ءُ بیرانی انت۔ پہ دائمی ایمن ءُ وشھالی ءَ تیوگیں میانجی ئیں رودرآتک ءِ ھستیں سیم سر بدل بِہ بنت۔ لھتیں استان ودی کنگ بنت ءُ لھتیں ھوار ءُ کشگ بِہ بنت ۔۔۔۔
روان انت.
