ھمگام بلوچی
ھمگام بلوچی:
نواب اکبر خان ءَ بِگر داں انوں منّ ءَ کَلم دست ءَ اِنت من مارّگ ءَ آں کہ چیزے نبشتہ بہ کن آں اکبر خان ءُ بالاچ مری کہ گوں وتی لشکر ءَ دراَتک ءُ دیم پہ کوھاں شُت اَنت گُڑا آ وھد ءَ ما کسان اِت اِیں ما مُدام شھیدانی اَکس وتی کتابانی سرا جَت آں مار اِت کہ لوگاں دراَتکگیں سنِگ ءُ ڈوکاں سرجاہ کنوکیں یا آجوئی ءِ پِگر ءَ داروکیں کمّاش زالبول ورنا راج ءِ ھیرواہ اَنت پہ راج ءَ مزنیں مڈّی اَنت اِے مارشت اَنت کہ مارا چہ جنز ءَ رسگ ءَ اَت وانگجاھانی تہ ءَ بلوچستان ءِ بیرک ءُ راجی سوت وانینگ بوھگ ءَ اَت نودربراں بی ایس او وتی سنگر کُتگ اَت چیا کہ ورناھانی تہ ءَ مارشتّے ودّی بوھگ ءَ اَت کہ راجی پِگر پہ آجوئی ءَ بلوچستان ءِ اَسلیں وارس بوت کنت بلوچستان ءِ ھرھند ءُ دمگاں راجی گلّاں وتی کار گون تُرندی ءَ بِندات کُتگ اِتاں ھَمینچو کار تیز اِتاں دو ھمِنچو راج ءِ ورناھانی تہ ءَ مارّشت ودّی بوھان اَت شھید واجہ گلام مھمد ءُ آدگے سنگتانی کربانیاں جُنز گیشتر مُھکمتر کرتگ اَت جنزّ ءِ تہ ءَ تُرندی شھیدانی کُربانیاں ءُ سیاسی کاراں آورتگ اَت آ وھد ءَ ھم ریاست وتی کلگاں مزبوت ( مضبوط) ءُ مُھکم بوتگ بلے ما گیشتر مھکمتر بوتگیں ریاست ءَ مئے دست جنّگ تُرستگ گُشنت کہ عروج ءَ جنز جلدی کائینت بلے اگاں دارگ مہ بنت گُڑا زوت زوال ءِ نیمگ ءَ رو اَنت۔
مرچی دپ نہ گرِگ ءَ اِنت کہ بُگش آں بلے منی زیکیں مارشت ءُ مرچی ئیں مارّشتانی تہ ءَ پرک مئے بدل بوتگیں ھالات آں آورتگ ایشی ءَ چہ بد کسمتریں گپ اِش اِنت مرچی ھمے مارّشت بیگواہ اِنت کہ مارا مارّگ بہ پرمائیت وتی نزوریانی اے یک تچکیں ھبرے دانکہ یکے وتی کمزوریاں نہ ماریت راستی ءَ درگیتک نہ کنت جُنز اِیوک ءَ گوں گلّے ءَ دگے چار تّپنگی ءَ ھچبر دیمروئی نہ کن اَنت جُنز گوں چار ءُ بچار ءُ یک اَنچیں راھشون ءَ دیمروئی کن اَنت کہ آھاں ھَر وڑیں جَھلی ءُ بُرزی دیستگ یک شَرّیں راھشونے ءَ پجا آورت یک شَرّیں دربروکیں ( کارکن) باسکے کُت کنت نہ کہ چو بَشّی جمبر ءِ پیم ءَ تھنا گرند ءُ گریوک کنوکیں ءُ نہ گواروکیں ھور ءِ پیم اِیں مردمے۔
وھدے واحد کمبر ءَ مار اِتگ اَت کہ جُنز ءِ زلورتاں ماس پارٹی سرجم کت کنگ ءَ نہ اِنت من ءَ اوں لھتّیں اَنچیں مارّشت ھَست کہ مدام من ءَ پہ چیزے نویسگ ءَ بے تاھیر کنگ ءَ اَنت اُستاد واحد کمبر ءَ وتی ھاموشی پروشت جنز ءِ تہ ءَ کماشیں ھیربیار ءُ آئی ءِ سنگتانی راستی منّ اِت اُستاد واحد کمبر پئیم اِیں انسانے ءِ ھاموشی پہ منی ڈولیں سیاسی جھدکارے ءَ یک سوالے المّ بوتگ ءُ ھَست اِنت منی سوال اِش اِنت کہ اُستاد دہ (10) سال اِنت چی ءَ ھاموش بوتگ کُجام جیڑہ مردم یا گروپ اُستاد ءِ دیما اَڑانگ بوتگ اَنت؟
