چاکر ءُ گوهرام ءِ سی سالی جنگ (پولکار : ابدالله میر)

اولی بَھر ھمگام بلوچی پہ گوھر ءِ ھّرانی نامنیادہ ءُ نیمون ءَ سی سال ءَ رند ءُ لاشاری وتکوشیں جنگ کرتگ۔ ھزاراں بلوچ جنگ بوتگ انت۔۔اے سی سالی وتکوشیں میانجی ءَ 25 جنگ بوتگ سی سال ءَ 25 جنگ رند ءُ لاشاری ءِ میانجی ءَ بوتگ ایشی تہ ءَ 15 جنگ رند ءَ بزانکہ میرچاکر ھان ءَ سوب کرتگ ءُ 10 جنگ میر گوھرام لاشاری ءَ سوب کرتگ اولی جنگ کہ نَلی ءَ بوتگ آئی ءِ تہ ءَ کماندان میران رند جَنگ بیت ءُ بازیں تاوانے میر چاکر رند ءَ رسیت. آ، جنگ ءَ میر گوھرام لاشاری سوب مند بیت اولی جنگ ءَ میران رند باز منت کنت کہ جنگ مہ بیت جنگ پہ مارا تاوان انت برات جنگ بنت لاشاری ءُ نوھانی امے براس انت تاوان ھر وڑا مئے وتیگ انت بلے چشکہ میرچاکر وتی کسد ءُ کینگ ءَ برجم داریت ءُ ھچ وڑا پشت کنزگ ءَ تیار نہ بیت گڑا رند ءِ لشکر میران ءَ را شگان ءُ تژن جنت لچہ کار چش وتی ھیالاں درشان کنت ءُ گش ایت میران شگاناں سوتکگ میران مھتریں بَر گشتگ میران ماں دل ءَ زھر بیتگ انچوش ماں دل ءَ۔کھر بیتگ کہ ھمراہ نباں رندانی رند ءُ بارگیں بورانی منی سیادیں اومر ءُ نوھانی ناھکیں کُشگ براتانی گُشتگ زھم جنیں بیبگر ءَ میران اُود ءَ ما رویں داوائی مان کائیں گور ءُ کاٹاری ما رُمبان ءَ گریں جاگاھی ما گستا ترا نندینیں شَریں جَھلگے ترا واپینیں جُلّے تئی سر ءَ پِرّینیں تیراں تئی کش ءَ گوازینیں جنگ ءَ ما وت میڑیناں جوریں دژمناں تاچینان گش انت کہ میر گوھرام جنگ ءِ بندات ءَ سہ جاگہ ءَ چیدگ مِکّ کنت گڑا میر چاکر اے چیدگاں گندیت گیشتر ھسد ءُ کینگ کنت اولی نشان ءِ بزانت کہ سواس ایر کرتگ اش بزانکہ دیم ءَ مہ کنز تئی سواساں سر ءَ کن آں دومی پاگ تئی کپ ایت سیمی تئی ننگ روت اے جنگ ءَ میر چاکر پروش وارت ءُ ھپت سد رند کُشگ بیت ءُ چاکر پد کنزیت روت لچہ کار وتی ھیالاں چش درشان کنت ءُ گش ایت میران کہ سر ءَ پیش کپتگ تاسیں کدھے کیل بیتگ میران اش جتگ پرینتگ ھپت سد چاکری بورینتگ میر چاکر کہ پد کنزیت چہ ڈاڈر ءَ ءُ دیم پہ سیبی ءَ کنت وھدیکہ کہ گس ءَ سر بیت گڑا آرپیں کماش میر شھیک آرا جنگ ءِ بابت ءَ جست کنت لچہ کار چش وتی ھیالاں درنگاز کنت ءُ گش ایت گشتگ شھیک ءَ نام دار ءَ جنگ ءِ کسھاں دے مارا جنگانی بکن تو تکرار ءَ چوں کت گوں یلیں لاشار ءَ آرام نہ ات انت مارا میر چاکر چش پسو دانت وتی کماش ءَ گشتگ چاکر ءَ او بابا!! دلگوش بہ دار مئے جواب ءَ باھینتگ منی بالاد ءَ درستوں داتگاں پہ باد ءَ دیم داتگ ماں یلانی نیاد ءَ ورتاں بیر دپیں پالاد ءَ لاشار ءِ یلیں اولاد ءَ اے جنگ ءَ بازیں رندانی نامیں کماندان کُشگ بنت بلے میران ءِ کُشگ ءَ میر شھیک سک پَدردیگ بیت ۔لچہ کار گش ایت وتی لچھے تہ ءَ۔ میران ءَ نہ گنداں چِمّبر ھالیگیں تئی راستیں گور ھار ءَ ویل کرتگ شیر نر بے روکیں مُلوک ءِ کاپر تاروکاں دھات ءُ کھچر میر چاکر سرجم ءَ گش، ایت جنگ ءِ کسھاں کہ میران گوں بازیں مردمانی ھوار ءَ کُشگ بوتگ جنگ ءَ یک چیزے یاد کنگ بہ بیت کہ لچہ کار۔۔اے کڑی ئے توک ءَ ۔۔۔””ھار ءَ ویل کتگ شیر ءِ نر.. “”” ھار میران ءِ اَپس ءِ نام بوتگ ۔میران ھار ءَ گوں نامدار بوتگ ۔۔ دیمتر ءَ لچہ کار گش ایت کہ میر شیھک سک ناراھت ءُ پدریگ بوتگ چہ میران ءِ مرگ ۔ شیھک ماں دل ءَ کھر بیتگ نُکّ ئِے چو کاتل ءَ زھر بیتگ چاکر پہ گزب مان بستگ پتو چے دگہ پش کپتگ، میر شیھک پہ ترندی ءَ چاکر ءَ را ھکل کنت سک ھژم گریت چہ وتی دیم ءَ۔پدئِے کنت ۔گڑا میرچاکر سوگند وارت کہ تاوھدی من میران ءِ بیر ءَ نہ گراں وشدل ءُ آرام ءَ نہ ننداں شے شولان وتی گالاں چش درنگاز کنت ءُ گش ایت گشتگ چاکر ءَ گوں ھان ءَ گڈّ زھم جنیں میران ءَ سوگند من ءَ ھدا ءِ نام ءَ نیلاں وژدل ءَ گوھرام ءَ میر چاکر دیم پہ اوگانستان ءَ سُلتان شاہ ھسین کلجی گورا پہ کمکی روت چہ آئی ءَ کمک لوٹ ایت یک پرنگی پولکارے واجہ لانگھ ورتھ ڈیمز وتی کتاب ءِ تہ نبشتہ کتگ ءُ لچہ کار ھم وتی لچھے تہ ءَ سلتان شاہ ھسین ءِ نام آرتگ ماں کندھار ءَ زُنّون بیگ نامیں گورنرے بوتگ کہ آ کندھار ءِ کماندان بوتگ میر چاکر رند پہ کمکی آئی ءِ گورا شتگ لچہ کار وتی گالاں چش درنگاز کنت ءُ گش ایت کہ گُشتگ چاکر ءَ میرین ءَ ھما رندانی کماش شِیرین ءَ گوں تو آتکگاں باھوٹاں گرانیں لشکراناں لوٹاں تُرکی ھمبلاں پُلیناں ھما ” زُنّوی” کہاریں پوجاں پِیلاں گوں سَرپاں سیاھیناں زَھراں چو زِرانی موجاں انچوش کُچّلاں زھریناں چُک چین. کناں لاشار ءَ اَلباس ئِے کناں چے بار ءَ شئیرانی تہ ءَ اے گپ پّدر انت کہ میرچاکر کندھار ءَ روت گڑا میر گوھرام لاشاری ءَ اے ھال سر بیت کہ چاکر پہ باھوٹی ءُ کمک ءَ دیم پہ ھرات ءُ کندھار ءَ شتگ گڑا میر گوھرام لاشاری وتی لھتے مردم جھگیر کنت ءُ آیانی سروک جنگیان نامے مردے بیت لھتے لَبّ ءُ ملام مزنیں زَرّ ءُ مالے دنت ءُ دیم پہ ھرات ءُ کندھار ءَ راہ دنت ءُ گش ایت کہ برو اِت شاہ گورا آئی ءَ ھر وڑا رازی کن اِت کہ آ میرچاکر ءَ بکُش ایت تاکہ ما چہ اے اَڑ ءُ جنجالاں آسودگ بہ ایں اے درگت ءَ شائر وتی ھیالاں چش درشان کنت ءُ گش ایت ۔ ۔ ھالے رستگ ات گوھرام ءَ گوھرام ءُ گونا نوھان ءَ چاکر رپتگ اَت اوگان ءَ باھوٹی پما تُرک ھان ءَ گشتیں زھم جنیں جنگیان ءَ بیا تُرک ءَ لب دئیں مالواریں چاکر زیان بیت مَردواریں دُرّ ءُ نگرہ اش، جم کرتگ لکّ من اشرپی اش زرتگ پنجاہ کاتل اش بار کرتگ اوگان ءِ دہ ءَ شکساتگ ھت ءُ کاگد اش راہ داتگ گار کن چاکر ءَ گون برّان بلے آسودگ بہ ایں چہ شِرّاں گوھرام لاشاری ءِ روان کرتگ ءِ گَل ءِ سرکماش جنگیان روت ءُ اوگانستان ءَ شاہ ھسین گورا سر بیت سلام ءُ دروت ءَ پد گوھرام لاشاری ءِ کلوھاں دنت ءُ لب ءُ ملامے بکشایت ءُ گش ایت کہ میر گوھرام ءَ گشتگ کہ ھر سال پہ تو مالیات ءُ داھک کیت ۔گڑا شاہ ءَ ھمے ھبر دوست بیت ۔شاہ ھسین، گوھرام لاشاری کاسد ءَ گش ایت کہ برو وتی سردار ءَ گوھرام ءَ بُگش کہ من پہ چاکر ءِ واست ءَ ھَرّات اوگانستان ءِ دَروازگ بستگ انت تو دلجم بہ بو اگاں آزمان ءَ ھَرے سَرّیت ۔ گڑا بزانکہ چاکر زندگ ءُ دُرّاھی ءَ واتر کنت ءُ کیت شائر اے بابت ءَ چش وتی ھیالاں درشان کنت ءُ گش ایت ما کائیں ھم تئی گالیاں انچوش چنگ جنیں سوالیاں ترا سالاں پہ دیاں مالیاں دُرّ ءُ نگرہ ءُ شالیاں شاہ ءَ کاسدے راہ داتگ ھت ءُ کاگدے چو داتگ پہ گوھرام ءَ ھمے ھال آتکگ شاہ ءَ جواب دات کَست ءَ منی دروازگ ھَریب ءِ بستگ آزمان ءَ ھرے گر سَرّیت گڑا چاکر پَر پَد ءَ تَرّیت