When Majority sought out freedom from Minority
ھمگام بلوچی
مرچاں گِندگُش، وتگُش، تندجاہ ءُ روتاک یا چاگِرد رسانکدر بزاں ھال ءُ اھوال ءِ ھر وڑیں آسراتیاں کرونا ءِ نادراھی ءِ بابت ءَ ھال ءُ ھبر انت بلے اے دگنیا ءَ لھتیں ھبکّہ ءُ ھیرانیں پیشامد ھم بنت کہ آیاں انسان بِرے برے چہ وتی چماں گِند ایت بلے سرپد نہ بیت بلکیں دیر سرپد بیت انچوشکہ چہ گیدی ءِ اولی ءُ دومی مستریں جنگ ءَ رند اے جھان ءِ بازیں زیردستیں راجاں چہ زورانسراں آجوئی لوٹ اِت بلے دومی مستریں جنگ ءَ رند لھتیں اے وڑیں راج ھم گِندگ بیتگ انت کہ آیاں وتی ملک جوڑ کتگ انت بلے پد ءَ لھتے سالاں رند وت چہ ھما ملکانی ٹھینگ ءَ پشل بوت انت۔ بزاں چہ ملک ءَ گیشتِر بُوگ رند ھم آیاں بے کساس لٹ وارتگ گُڑا آ وتی گْوست ءِ جُھداں پشل بوت انت۔ بزاں بنی آدم ءِ دپتر ءَ اے وڑ ءَ ھم بوتگ کہ گیشتِر ءَ چہ کمتر ءَ آجوئی لوٹ اِت۔
چوناھیگا میان اُستمانی راجدپتر ءُ تب ھر وھد ءَ اے وڑیں کسہ ءَ باز انت بلے منی زانت ءَ تپاس ءَ من ءَ اے ڈولیں دو کسہ ءَ رستگ۔
1- وھدیکہ انگریزانی ڈیوائیڈ اینڈ رول ءِ شوندات ءِ رِد ءَ آیاں ھندو مسلم نیکراھی ءُ پندل لاپ ءَ ھندوستان بَھر ءُ ونڈ کتگ گُڑا ماں اے لیب ءَ بنگالی پہ مسلماناں پاکستان نامیں یک جتائیں ملکے ءَ سَک جُھد ءَ ات انت۔ دلگوش بِہ بہ ات کہ ھمے وھداں پشتو پاکستان ٹھینگ ءِ ھلاپ ات انت ءُ بلوچاں ھندوستان ءَ گوں ھچ سْیادی نیست اَت بلکیں بلوچ وت یک بلوچستان نامیں جتائیں ملکے ءِ وتواجہ ات انت۔
شیک مجیب الرھمان پہ پاکستان ءِ ٹھینگ ءَ چہ ڈھاکہ تا دھلی پیادگیں زھرشانی کت انت۔ وھدے کہ ھندوستان انگریزاں بَھر ءُ ونڈ کت ءُ چہ بنگالیانی جُھد ءَ پاکستان اڈ کت گڑا ھمے گیشترّیں بنگالیاں اولی وتی زبان پھازگ ءَ ھون داتگ انت، آیانی مال ءُ مڈیانی پُلگ ءَ اسلام آباد ڈولیں لد ءُ جنگلے پیرس ءِ وڑ ءَ بوتگ پد ءَچہ گچینکاری ءُ 1970-71 ھر وڑیں اندوہ ءُ ناروائیں کھر چہ کمتر ءَ دیستگ گُڑا ھمے پاکستان ءِ ٹھینوک ءُ گنوکیں بنگالیاں مار ات کہ پاکستان ءِ اڈ کنگ آیانی بلاھیں ردی یے اَت پمیشکا آ گیشتر راج ءَ چہ کمتر ءَ آجوئی لوٹ اتگ ءُ وت ءَ چہ گلامی ءَ آزات کت۔ مرچی آیانی ملک ءِ نام بنگلہ دیش انت۔
2- دومی ھستیں وھد ءِ سُنی ئیں یمنی اَرب انت کہ مُدام تیوگیں یمن ءَ وتی بادشاھی ءَ گلائیش ءُ ملار اِت انت۔ ھمسائگیں سھودی اَرب ءُ ایو اے ای ءِ کُمک ایشاں مُدام گون اَت دومی یمن ءَ سُنی چہ شِییا گیشتر انت پمیشکا اود ءَ مُدام اَلی ابدلسالہ وڑیں سُنی ھاکم ات انت بزاں یمنی سُنییاں پوریاگِر ءُ ھر وڑیں آسراتی ھست ات انت البت یمنی شییا جنجال ءُ ھر وڑیں ناروائی ءِ آماچ اِت انت۔
2011 ءِ اَرب آشوب ءَ تیوگیں میانجی ئیں رودرآتک ءَ آسے بُن داتگ ءُ ھرگورے ءَ سیاسی تب بدل کتگ انت ءُ اے اَرب آشوب ءَ یمن ھم جِیداں بدل کت۔ سنییانی وت ماں وت ءِ سیاسی جنگ ءَ یمن ءِ شییاں موھے داتگ۔ وھدیکہ سُنی وت ماں وت جنگ کن انت ءُ ملک اوشت ءِ آماچ بیت گُڑا سرکاری لشکر ءَ موکل گْوشگ بیت کہ وتی لوگاں برو ات گُڑا شییا یکمشت بنت وتی دَمگاں چہ آس ءَ رکین انت بلے سھودی اَرب ءِ سروکائی ءَ سی ءُ شش ملکانی لگوریں لشکر ھم آیاں پروش دات نہ کنت۔
اے جنگ دْراج بِیان شُت ءُ بے کساس بنی آدمی بیرانی یے آؤرتگ ئِے۔ بلے دومی نیمگ سُنی جنگلولی گل ساوترن ٹرانزیشنل کاونسل گِند ایت کہ اے جنگ ءَ ھچ کس ءَ پائدگ نہ رس ایت گُڑا 25 کِرّا 2020 آ گیشتریں سُنی چہ شیائیں ھوتی جنگولاں آجوئی لوٹ انت ءُ زِرباری یمن ءِ آجوئی جار جن اَنت
بزاں برے برے گیشتریں راج ھم چہ کمتر ءَ آجوئی لوٹ ایت
