سپرنامہ سیدی رئیس
ھمگام بلوچی
اولی بھر
سیدی رئیس دھمی کرنءِ ھجری شانزدھمی کرن ءِ اِیسوی) ءِ نامی ایں تُرک امیر البھرے بوتگ کہ چہ تازی (اَرب) زرءَ بہ گر تاں مروچی ایں بلوچ زر ءِ نیامی ایں زری دمگ ءِ بلائیں جنگولیں ءُ بامردیں سوادی یے بوتگ کہ کستنتنیہ ءِ زری پائدگانی زرْنگیں زری دیمپانے ءِ جھت ءَ بے مٹّیں ءُ دلاوریں کار پد ئِے پیش داشتگ اَنت ءُ زری تاریک ءِ تہ ءَ وت ءَ را نمیران اِشتگ ئے آئی پت ءِ نام سیدی ھسین رئیس بوتگ آ چہ تُرک کوم ءِ رئیس زاتءَ بوتگ. آئی ءِ کھول چہ سیدی رئیس ءِ ورنائی نوبت ءَ کساس 1530 تا 1560 رمسءَ ھژدہ ءُ پُشت ساری ءَ چہ انّوگیں مکرانءَ لڑ اِتگ ءُ کستنتنیہ ءَ جاہ منند بوتگ اَنت آ نوبت ءَ رودراتکی مکران ءِ گیشتریں دمگ تُرکانی بوتگ کہ کوھنیں ھنکینی نشانءُ چیدگ اِش انگت ءَ ھست ءُ پدّر اَنت مستریں نشانی اِش وت مرچی یے بلوچ راج ءِ رئیس زات اِنت کہ اے وھدی ھم تیوگیں مکرانءِ مزنیں دمگانی توک ءَ ھستءُ چہ وھداں مستر ءُ ھاکم ھم بوتگ اَنت مکران ءِ تہ ءَ ایشاں ” بیھ دار” بزاں بُنکی ایں مردم ھم گشگ بنت.
سیدی رئیس چہ پت ءُ پیروکاں بازیں دریائی کسب ءُ ازم ءُ جھاز ءُ میلانی ءِ نامی ئِے استادے زانگ بوتگ آئی ءَ وتی میل ءُ بوجیگ اڑ کتگ اَنت ءُ گوں وتی ھمکارءُ سنگتیں مردماں بازیں جنگ ءُ جیڑھانی تہ ءَ گپتگ ءُ زری دنیا ءِ تہ ءَ نام ئِے در آرتگ آئی ءِ ھمے نام کَشّی ءِ ھال تاں مِسر (مصر) ءُ شامءَ سر بوت ءُ سلتان سلیمان دومی 1560 تا 1566 ءَ آئی ءَ را پہ ملک ءِ زری دیمپانی ءِ کمانداری ءَ لوٹائینت سیدی رئیس ءَ روچگانی ماہ 960 ھجری ءَ وت ءَ شام ءِ دمگ ھلب ءَ سر کُت بادشاھی دربارءِ تہ ءَ آئی ءَ را آئی ءِ نامداری ءِ سبب ءَ مزنیں شرپے دیگ بوت.
سیدی رئیس یک شرّیں شائر ءُ ندی کواسے ھم بوتگ آئی ءَ وتی زری جُنز ءُ جنگانی ھال تُرکی زبان ءَ نبشتہ کتگ ایں کتاب ” مرات الممالک ” ءِ تہ ءَ نبشتہ کتگ اَنت اے کتاب دنیا ءِ شرّیں زری سپر نامہ آں چہ یکے لیکگ بوتگ کہ بازیں زباناں ایشی ءَ رجانک کنگ بوتگ سیدی رئیس ءِ باروا مئے اے نبشتانک چہ ھمائی ءِ ھمے کتاب ءُ دومی چمشانکاں سرجم کنگ بوتگ.
سیدی رئیس ءِ ماں ھلب ءَ سر بوھگ ءِ نوبت ھما اِنت کہ تازی(اَرب) ءُ بلوچ تیاب ءُ زرانی سر ءَ پرتگالی بالادستی ءُ زوراکی اَت ءُ مسکت اومان ءُ کِرّ گْورانی توپ ءُ تُپنگانی چیر ءَ اِت انت چیزے وھد پیسرا پُرتگالیاں سوویز ءِ کِرّ ءُ گوراں مسری(مصری) بوُجیگانی سر ءَ اُرش کتگ ات ءُ آھانی باپاری ءُ جنگی مالءُ مڈّی اِش آوار جتگ اِت انت ءُ مسکت ءِ نزیک ءَ بُرتگ اَت اِش پراھانی دیم ءِ دارگ ءَ بیست بوُجیگانی مسری بیڑھے امیر البھری بک ءِ کمانداری ءَ سوویز ءَ رھادگ کُت بلے اے بوجیگانی گیشتری ءَ را زری شرتگاں تباہ کُت ءُ لھتے بوجیگانی نہ کاریں ھالتے ءَ پیری ءَ زرت ءُ مسکت ءُ اومان ءَ سر بوت اِد ءَ پیری ءُ پرتگیزانی نیام ءَ جنگ بوت ءُ پیری ءَ مسکت ءَ را چہ پُرتگیزاں گپت چہ پُرتگیزانی ٹوھیں اُرشے ءِ تُرس ءَ گوں پشت کپتگ ایں بُوجیگاں پیری ءَ دیم پہ مسر(مصر) ءَ دات دو بُوجیگ راہ ءَ نہ کار بوت انت ءُ پیری گوں یک بُوجیگے ءَ مسر ءَ واتر بُوت سُلتان ءَ را کہ زری بیڑہ ءِ بوجیگانی تباھی ءِ ھال رس اٰیت ءُ آئی ءَ تباہ بوتگ ایں بوُجیگانی پد ءَ مسر ءَ آرھگ ءِ واستءَ مراد بک نامیں میر بھرے ءَ را بیڑھے داتءُ دیم دات پُرتگیزی لشکر ءَ مراد بک ءِ زری بیڑہ ءِ سر ءَ تُرندیں اُرشے آرت کہ مراد بک گوں لشکر ءَ ھر مُز ءِ نزیکءَ کشگ بوت ءُ بیڑہ پُرشت ءُ پروش بوت اے دومی زری بیڑہ ءِ تباھیءَ سُلتان ءَ راسکّی ءَ نزور ءُ دلپروش ءُ گمیگ کتگ اَت ءُ تازی (اَرب) دنیا ءِ تہ ءَ پرتگیزی زوراکی ءِ بیم روچ پہ روچ ودّان اَت پمیشکا سیمی گشت ءَ مسری بیڑہ ءَ را سیدی رئیس ءِ کمانداری ءَ دیگ بوت سیدی رئیس 7 دسمبر 1553 یکم مھرم ۹۶۱ ھجری ءَ گوں پُرتگیزاں جنگ دیگءَ دیم پہ بسرہ(بصرہ) ءَ راھی بوت ءُ پروری 1554 ءَ بنداتی روچاں بسرہ ءَ سر بوت ءُ اود ءَ سھی بوت کہ پُرتگیزی بیڑہ ءُ لشکر جاوا ءَ لنگر اِنت آ چہ بسرہ ءَ رھادگ بوت ءُ چِلُّمی روچ ءَ جاوا ءِ کنّکاں سر بوت گوں پرتگیزاں بلاھیں زری جنگے دات ئے کہ ایشیءِ باروا سیدی رئیس نبشتہ کنت کہ اے جنگ ھمینکس ایں بیمانکیں جنگے اَت کہ آئیءَ زندگی ءِ تہ ءَ چد ءُ مستریں جنگ نہ دیستگ ءُ تاریک ءِ تہءَ ایشی درور نہ رس ایت ھچ لبز نیست کہ من اے جنگ ءِ چمّ دیست ایں ھالاں ھما وڑا نبشتہ کت بہ کنیں ھر رنگ کہ بوت دُژمن پرشتءُ پروش بوت چہ پڑءَ تتک
“”” “” دیمءَ روان انت”””
