بلوچ راجی راھبر ءُ فری بلوچستان موومنٹ ءِ سروک ھیربیار مری ءِ ھندوستانی آن لائن تندجاہ the tilak chronicle ءَ گند ءُ نند ءِ بلوچی بَھر ھمگام ءِ وانوکاں پہ دیم ءَ آرگ بووگ اِنت
دومی بَھر
ھمگام بلوچی
جُست : انچو ھال گوشّی رسگ اِنت کہ چائنا جیونی بلوچستان ءَ یک نیول بیسّے جوڑ کنگ اِنت پاکستان کہ کشمیر ءِ باندات ءَ پہ واہ ءُ زاری کنگ اِنت بَلے بلوچستان ءِ باندات ءَ چائنا ءِ دستاں بَھا کنگ اِنت اِے چون ؟
پَسو : بلوچستان ءَ وتی درائی 1948 گار کُتگ پاکستان ءِ چین ءَ توار پِر جنّگ ھمے وڑ اِنت چو کہ دُز ڈُنگّ ءَ را توار کنگ اِنت کہ تو ھم بیا بلوچستان ءَ پُلّ ءُ بَرّ کن ۔ من ءَ سرگوشی رَستگ کہ ارب ءُ ترکی ھم چیریں وڑئے ءَ بلوچستان ءَ پیداک اَنت پاکستان روچ پہ روچ بلوچستان ءَ نِزّور بُوان اِنت چو کہ آ نی ڈُنگ ءُ دُزاں لُٹ ءُ پُلّ ءَ ھوارگیجگ اِنت ۔
جیونی ءَ نیول بیس ءَ بلوچستان ءِ واستا جوڑ کنگ ءَ نہ اَنت باندا اگاں آ وتی چینی لَشکر ءَ بلوچستان ءَ بیار اِیت چو کہ مئے سرا سُنجم بنت اِے پہ بلوچستان ءِ باندات ءَ نہ بلکیں اِے ھَندّ (ریجن) ءَ ایشانی ساز ءُ باز آؤکیں 50 ، 100 یا 200 سال ءَ ھندوستان ءُ امریکہ ءَ چکپروش دئے اَنت ھلیجانی تہ ءَ وتا مُھکم کن اَنت یکرندے اگاں سی پیک (CPEC) پچ بوت بلوچ تاوان بار وَ بنت بَلے آؤکیں وھدا ھندوستان باز تاوان بار بیت چائنا ءُ پاکستان ءِ سداں سالی ساز ءُ بازے کہ تئی ھرچ سُر ءُ پُرّ ءَ پادمال کن اَنت ھندوستان ءَ آؤکیں وھدا شرّیں پِلّان نیست ھندوستانیاں وتی راھشونان ءَ زور پِر دیگی اِنت دانکہ آ اِے دورچاری سرا چار ءُ گُزار بہ کن اَنت ۔
ھندوستان ءَ اِے چارگی نہ اِنت کہ امریکہ ءِ تپاکی ءَ آئی ءِ سرجمیں کار آسان بنت ترا وتی پادانی سرا اوشتگی اِنت اگاں بچارئے ما تئی درور ءَ کسانیں بَلے ایشی ءَ اَبید ما ایشانی ھلاپ ءَ اوشتاتگیں۔ ھندوستان کہ وتارا اِے ھَند ءِ زور آور سرپد بیت ترا زورآور بوھگی اِنت مُھکمیں سَلّاہ کنگی اِنت ۔
مُھکمیں سَلاہ ترا بلوچستان ، سندھ ءُ پشتونستان ءِ وڑیں دوست پیداک کُت ءُ دات کنت ۔ کشمیر ءِ سرا ایران ءِ جار ءَ چے سرپد بوھگی اِنت کہ ایران ھندوستان ءِ گچینی دوستے بوت نہ کنت چوشکہ ھندوستان ءَ دیمترا وتی گچینی دوست درگیجگی اَنت آھانی گون ءَ جوانیں سیادی دارگی اِنت ۔ ھر وھد ءَ کہ ھندوستان ءُ بلوچستان وت ما وت گپ ءُ رپ کن اَت آھانی گپّ برابری سرا بہ بنت ۔ پنجابیاں مئے گون ءَ ” چھوٹے بھائی ءُ بڑے بھائی ” والا لبز ءِ سرا مارا رَد داتگ اِے روس ءُ امریکہ ءَ افغانیانی گون ءَ ھم ھمے وڑ کُتگ کہ پنجابیاں مئے گون ءَ کُتگ اِے یک ردّی یے یک براتے ءِ گون ءَ شرپداری ءُ برابری وڑا گپ کنگ بیت دانکہ دوستی ءُ بھروسہ مُھکم بہ بیت یک زورگیرے ءِ وڑ ءُ ڈول گواجِنّی مُھکمی ءِ سوچ پایدگ مند نہ اِنت اِے ھَندّاں بوت نہ کنت ۔
جُست : پاکستان ھر وھدا ھمے پیش داریت کہ منی باندات ءَ ھَترہ اِنت بَلے آئی ءَ پنجاب ءِ دارگ ءِ واستا بلوچستان زور بَرد کُتگ تئی ھیالاں اِے سندھ ءِ گون ءَ ھم اَنچو کنت ؟
پَسّو : پنجاب سندھ ءَ وتی چَنگُلانی تہ ءَ کنگ ءَ ساڑی اِنت ۔ پنجاب وت آجو نہ اِنت اِے ھندوستان ءِ ھَند اِنت پاکستان ءَ پیسرا چے مئے آجوئی پَچ گیپتگ ءُ جُتائیں پجّار ءِ ھلاس کنگ ءِ جُھد کُتگ ۔ پاکستانیت چی یے ؟ ھندوستان پرچا پاکستان ءِ پَجّار ءَ مَنّگ اِنت ؟ چوشکہ ایشانی نہ اِنت ۔ انگیریزاں پاکستان وت جوڑ کُتگ دانکہ ھندوستان ءَ نِزّور بہ کن اَنت ءُ بَھر ءُ بانگ بہ کن اَنت ءُ ھندوستان ءِ مردماں پاکستان مَنّ اِتگ ءُ آئی ءَ را جُتائیں پجّارے داتگ ۔ برتانیہ سک دِیر اِنت کہ شُتگ آئی ءِ سلاہ بِزاں پاکستان ءِ پَجّار ءَ اَنگت ھندوستان ءُ ھندوستان ءِ مھلوک ءِ لڑ ءَ رُدوم دیگ اِنت
جھوریت تئی وتی مھلوک ءِ واستا اِنت ڈنّی مھلوک ءِ واستا نہ اِنت ۔ یک زورآورے ءِ ھَساب ءَ ترا اِے نا انساپی مَنّگی نہ اِنت ۔ تو 70 سالیں کہ آجوئے تو پرچہ پاکستان ءَ یک جُتائیں پجّارے دیگ لوٹ ئے ؟ سندھ ءُ پنجاب ھندوستان ءِ وتی ھَند اَنت ترا اِے ھند دیگی نہ اَنت۔ ھزاراں سالاں چے ھندوستان یک مُلکے بیتگ پاکستان چون یک جُتائیں مُلکے بیت کنت ؟ مُردنّی آ مسلمان اَنت بَلے ایشی ءِ اِے متلب نہ اِنت آ یک جُتائیں مُلکے ءِ ھَکدار اَنت زانگ بہ بیت کہ پاکستان ءَ چہ گیش مسلمان ھندوستان ءَ جاھمنند اَنت ما بلوچ گُلامیں بَلے کم از کم ھور ءُ تپاکیں بلوچستانے ءِ توار ءَ چِست کنگ اِیں چوشکہ 1839 ءَ نَکشہ ( نقشہ) ءِ بلوچستان اِنت من وت ھم ھمے نَکشہ ءِ منّوگرے آں ۔ گُلامی ءَ اَبید ما گولڈ سمتھ ءُ ڈیورنڈلائن کہ برتانیہ ءِ کَشتّگیں سیمسر نہ مَنّ اِتگ اَنت بَلے ھندوستان یک آجوئیں مُلکے بوھگ ءَ چے اَبید اَنگت ھمے بَھر ءُ بانگی ءَ مَنّگ ءَ اِنت ۔ شُمارا وتی سوچ مَٹّ کنگ لوٹ اِیت ۔
جُست : چار سال ءِ گوزگ ءَ رند کہ بلوچستان ءِ باروا گپ اِش کُتگ اَت تئی دل آں ھندوستان ءِ وزیراعظم چینچو سنجیدگ اِنت ؟
پَسّو : بوت کہ شمئے وزیراعظم سنجیدگ اِنت اَنچو کہ آئی ءَ گوشتگ بَلے ما بلوچستان ءَ چوْشیں چیزے نہ دیستگ بلکیں آئی ءِ گپ کہ بلوچستان ءِ باروا جَتگ اَنت ئے آ گیشتر تاوان باری نیمگا شُتگ اَنت ۔ اگاں آئی ءِ گُشتانک ءَ چے رند چاگردی تندجاہ ءِ نیمگا چمشانکے بدی یے گُڑا پاکستانی لَشکر ءَ قلات ، مستونگ ءُ بولان ءِ ھَندّاں ھروچ شست یا ھپتاد مردم جَتگ ءُ کُشتگ ءُ پاکستانی لَشکر ءَ بُرزیں توارے ءَ گوں گوشتگ کہ نُو چاراں شُمارا شمئے ھندوستانی سنگت چون رکین اَنت ؟
اِے گوْشگ بوت کنت سپارتی مجلسانی ھلاپ بہ بیت بَلے ما وتی نزیکیں دوستانی نادانی ءِ سوْب ءَ دژمن ءِ گیشیں زُلم ءِ آماچ بوتگیں ۔ شمئے وزیراعظم ءِ بیان ءَ پاکستان ءَ را گیش ءَ چہ گیش وھد داتگ کہ آئی زوراکی بلوچستان ءَ ودّان بہ بیت آ وھد ءَ بہ گِر دانکہ انّی ھزاراں بلوچاں شھید کنگ بوتگ ءُ ھزاراں اَنگت بیگواہ اَنت ۔
ھندوستان ءَ دُرستاں چے پیسر نندگ ءُ سلاہ کنگی اِنت کہ آ بلوچستان ءَ کُمک کنت یا نہ ؟ اگاں نہ کنت گُڑا مھربانی بہ کنت مئے نام ءَ کارمرد مہ کنت لبز ءِ دَگّا ( دھوکہ) شریں گپّے نہ اِنت بَلے اِے وڑی ءَ نہ پاکستان ترا چے تُرس اِیت نہ دیمترا ترا ارزشت دنت ۔ تو ھما گپ ءَ بہ کن کہ تو ھما گپ ءِ سرا اوشتات کن ئے گُڑا بلوچ ءُ پاکستانی تئی گپ ءَ ارزشت دئے اَنت ۔
جُست : گوستگیں رَند ءَ تو گوشتگ اَت کہ ترا ھندوستان ءِ کُمک نہ لوٹ اِیت بَلے نی تو وتی لوٹ مَٹینتگ اَنت ۔ تو ھندوستان ءِ بلوچستان ءِ آجوئی جُنز ءِ ھمایت ءَ پہ چونیں اُمیت دارئے ؟
پَسّو : بی بی سی اردو ءِ گون ءَ منی گُند ءُ نند ( انٹریو) ءِ کُتگ ھمائی سرا من (احتجاج) کُتگ من بی بی سی اردو ءَ بی بی سی کشمیر سرپد باں چی ءَ کہ آ تھنا ھندوستان ءِ کشمیر ءِ جیڑھانی گپ ءَ کنت بلوچانی ھما کہ وت دل ءَ کپ اِیت ھما گپ ءَ کنت مئے بیاناں سالے دو رند ءَ دنت بلوچانی بُنوکی گپ پہ آئی ءَ ھچ ارزشت دار نہ اَنت ۔
من گوستگیں رند ءَ بی بی سی ءِ بازیں جیڑھانی دیمپان بوتگ آں ۔ آھاں منی گند ءُ نند شِنگ کنگ ءَ چے پیسر ردّیں دروشمے ءَ دیما آؤرتگ ۔ آھاں من ءَ جُست کُتگ کہ من ھندوستان ءَ چے کُمک زُوراں ؟ گُڑا من پَسّو داتگ اَت کہ تھنا ھندوستان ءَ چہ نہ بلکیں دُگنیا ءِ سرجمیں مُلکاں چے کُمک ءِ اُمیتوار آں ۔ منی مُول ھمے گپ ءِ زاھر کنگ بوتگ کہ ما ھندوستان ءَ چے تھنا نہ بلکیں سرجمیں مُلکانی کُمک ءِ زورگ ءَ ساڑی ئیں ۔
بلوچ راج ھندوستان ءَ ھوار سرجمیں دگنیا ءِ گون ءَ سیادی دارگ لوٹ اِیت دانکہ بلوچستان ءِ جیڑہ ھرچ جاگاہ ءَ دیم ءَ بہ اِت ۔ ما ھندوستان ءَ ھوار سرجمیں مُلکاں چے ءُ ھر وڑیں کُمک ءِ اُمیت واریں چوشکہ یک مُلکے ءَ وتی آجوئی واستا درکار بنت ۔ لھتیں ھندوستانی ھمے پَھم اِیت کہ مئے کُمک کنگ ءَ چے پاکستان زھر بیت اگاں شُما پاکستان ءَ وش کنگ لوٹ ئے گُڑا پاکستان 70 سال اِنت کہ چہ شُما وش نہ بوتگ نہ کہ آؤکیں وھد ءَ چہ شُما وش بیت ۔
پاکستان مارا دژمنیں مُلکے ءِ کُمک زورگ ءِ بُھتام ءَ بند اِیت چوشکہ ھندوستان مئے دُژمنیں مُلکے نہ اِنت ھندوستان مئے ھمساھگیں مُلکے ۔ مئے دژمن پاکستانی پنجاب اِنت کہ آئی ءَ مئے زمین زور برد کُتگ پاکستانی مارا گَدّار زاھرکن اَنت بَلے راستی ایش اِنت کہ وت ھندوستان ءِ گَدّار اَنت چی ءَ کہ آھاں وتی مُلک ( ھندوستان ) بَھر ءُ بانگ کُتگ ۔ من ءَ ھندوستان ءِ مَھلوک ءُ آھانی جمھوریت ءَ چے ھِچ جیڑہ نیست بَلے من ءَ گوں آھاں الّم جیڑہ ھَست کہ آھاں ھندوستان بَھر ءُ بانگ کُتگ چوشکہ آ وتا اَنّی پاکستانی پنجابی مُسلمان گوْش اَنت ۔
ھلاس ۔۔
