ھمگام بلوچی
سیمی بَھر
بلوچستان ءِ مستریں گَل بلوچی اکیڈمی کوئٹہ ءِ زیر دستی ءَ چاپ بوتگیں کتاب “بلوچ” ٹک ءُ کٹم نبشتکار ءُ پولکار واجہ بالاچ ھمید نور وتی کتاب ءِ تاکدیم 32 بہ گر تاں 34 ءَ لاشاری ٹک ءِ بابت ءَ نبشتہ کنت کہ لاشاری ٹکے کُل 133 کٹم انت ۔واجہ بالاچ ھمید لاشاری ٹک ءَ را 133 کٹم کرتگ چشکہ لاشاری ءُ رند بلوچانی مستریں ٹک انت رند 391 کٹماں بھر ءِ کرتگ ءُ لاشاری 133 ءُ جدگال 250 ءَ چہ گیش، اے یک ھیرانی ھبرے دیمترا واجہ ءَ نبشتہ کرتگ کٹم بجارانی، موسیانی، یاد بہ بیت کہ اے دوئیں کٹمان ءَ پیسرا جدگال ءُ پد ءَ رند لیک اتگ انی واجہ بالاچ ھمید ءَ لاشاریانی لڑ ءَ آورتگ انت دیمترا واجہ ءَ لاشاری ٹک ءِ لھتے کٹم چش زاھر کرتگ ببر، کیرانی، کہانی، گلن، پوجانی بھریانی، بترا، کیچی، تمپانی، رکشان، رجستانی، اربانی(عربانی) زھری ءُ دیگہ بازیں کٹم آورتگ ءُ لاشاری ءِ لڑ ءَ ھوار کرتگ انت۔
اے اجکہ ءُ ھیرانی ھبرے کہ کیچ کیچی، تمپ تمپانی، رکشان رکشانی اے وَ جاگہ انت ھند ءُ دمگانی نام انت یاد کنگ بہ بیت کہ گوستگیں تاکدیمانی تہ ءَ ءُ نبشتانک بھر 4 ءِ تہ ءَ لاشاریان ءَ رندانی رم ءَ آؤرتگ ءُ رندانی لھتے ٹکاناں گوادری، دشتی، کلگ ءِ نام داتگ بزانکہ ھند ءُ دمگی نام ٹکاناں پِر کرتگ ءُ اد ءَ پدا زھری آورتگ ءُ لاشاریانی رم ءَ ھوار کرتگ گوستگیں تاکدیمانی تہ ءَ زھری ءَ را جدگال ءِ ٹک لیک اِتگ دیمترا واجہ بالاچ ھمید نبشتہ کنت کہ اربانی(عربانی) بزانکہ ارب ھم لاشاری انت ءُ راجستانی ھم لاشاری ءِ رم ءَ ھوار انت ۔
دینازرئی شیر پسگیں
تو دیست کہ دُودا زھر کنیں
پیم نہ بیت ماں موچڑاں
سندھی کپروکیں گداں
پکیر شاد کتاب ھزانگ تاکدیم 412 ءَ لچہ ءِ تہ ءَ دُودا ھسن گورگیج شائر ءَ دینار زئی گورگیج ءِ زاھر کرتگ ءُ راجدپتر پولکار ھم گش انت دیمترا شائر گش ایت۔ تاکدیم 405 ھزانگ
دُودا ءِ مھراں زراں
سُمائیل ءِ شیرازی لُڑ ءَ
سُمین گوں میان ءِ کُپّڑ ءَ
میرزا گوں زین ءِ گُرّوھبر ءَ
اد ءَ ھسن دینارزئی پنچ پسگ ءِ نام آرتگ شائر ءَ چشکہ دُودا، سُمائیل، سُمین، میرزا ءُ بالاچ کوہ سلیمانی پولکارانی رِد ءَ ھسن ءِ شش پسگ بوتگ انت تاکدیم 386 ھزانگ پولکار پکیر شاد ۔
اے منانک ءِ دیم ءَ آرگ ءِ مول اش انت کہ واجہ بالاچ ھمید نور ءَ وتی کتاب “بلوچ ” ٹک ءُ کٹم ” ءِ تاکدیم 36 ءِ تہ ءَ گورگیج ٹک ءِ کٹم چش پدر کرتگ انت ھسن زئی، دُودا زئی، تائر زئی، سلور زئی، بنگلزئی، سمائیل زئی ءُ بالاچ زئی شش کٹم آرتگ ۔ واجہ بالاچ ھمید نور ءَ دُودا ءِ کماش ھسن ءَ را یک کٹمے ءِ نام داتگ پدا ھسن ءِ چک دُودا ءَ را ھم یک کٹمے نام داتگ ءُ ھمے سمائیل ءَ را ھم انچوش یک کٹمے نام پر کرتگ ۔ دیگہ یک مزنیں ھیرانی ءُ اَجکّھی ھبرے کہ بالاچ ءَ را ھم یک کٹمے نام داتگ۔ بالاچ زئی راجدپتری دراھیں کتاباں بہ چار ات ءُ شئیراں ھم وانت ءُ گوشدار ات کہ بالاچ ءَ آروس نہ کرتگ مئے راجدپتر گیشتر شئیراں گوں بندوک انت چشیں ھچ شئیر ءِ تہ ءَ نیست کہ بالاچ ءَ سانگ کرتگ ءُ آئی پدریچ بوتگ۔ اد ءَ چتور بالاچ زئی آرگ بوتگ!؟ یک کٹمے ءِ شکل ءَ !!!! چوناھا گورگیج شش کٹم نہ انت گیشتر انت البت ءَ بنگلزئی گورگیج انت دُودا زئی ھم گورگیج انت بلے دُودا ھسن نہ انت دودا ھسن دینارزئی ئِے بوتگ۔ دینار زئی ءِ بابت ھچ نہ گشتگ واجہ بالاچ ھمید ءَ ادراہ ءُ اکیڈمی ءَ باید کم از کم کمو پولکاری کرت ایں اگاں بالاچ ھمید ءَ پولکاری نہ کرتگ اَت پہ وتی نام کَشگ ءُ کتابءِ واستہ۔ کم از کم بلوچی اکیڈمی ءِ گَل ءُ آئی ءِ سروک مزن نامیں زانتکار انت باید ایشاں کمو ھوش بہ کت ایں چشیں وتگڑیں کتاب ءِ چاپ ءُ شنگ کنگ ءَ۔۔۔
روان انت۔۔۔۔۔۔
