گلزمین وابانی مانا ءَ بدنت
گلزمین پُلّانی براہ ءُ زینتیں گلزمین آجوئی ءِ چھر ءُ شبین گلزمین مھرانی سارتیں ساھگے چُنت چورہ بے پتی ءَ نشت کنت؟ چنت کُڈّک چُنت کاپر ستکگاں؟ چُنت ماتانی مراد اِش بُرتگاں؟ چُنت لاڑین سمرل ءُ پاتل زمین ءِ دیمپان؟ چُنت گھار پہ براتی مھرے تلوسیت چُنت ءِ ارساں شال ءِ دلبند میچّل انت؟ چُنت شبیر جان پہ زمین ءَ بندی اَنت؟ سیمل ءَ جست گر شبیرجان ءِ گماں مھلب ءَ دین جان ءِ جست ءَ ھم بگر ءُ چو بگش چنت رند ءَ پاد تراول بوتگ انت ءُ سر نہ جوکینتگ وتی جست بگر پُلّیں علی ءَ چنت سالیں پند برّیت پہ کے ءَ پرزل ءَ جست کن کج انت زاکر تئی اَنسُل ءِ ارساں زمین جُوّے تچیت پاتل ءِ بچکند پلیں پہ کے ءَ باریں مرادیگ انت بگش سنجر ءِ پلّیں بدن ماں شال ءِ برپاں لیب کنت انت پہ کے ءَ بختل ءَ باریں کئی کوھیں زھیرانی گم انت ماھیں مہرنگ پہ کے ءَ نشتگ وداریگ انت بگش ماھیں خاتون دوستل ءِ کوھیں گماں ایرجیگ کتگ کئی گْورا دست ءَ شہار انت تو بگش؟ کئے ایشاں دستے سماریت تو بگش آ کئے انت کے پاتل ءِ بچکندگاں پُلّے بہ کنت آ کے انت کہ سیمل ءِ ارسانی واماں دات کنت کئے بدنت ارسانی پسّو ءَ حسیبہ بانک ءِ؟ کئے چو ہوران ءَ اے جہد ءِ بہر بیت ماہ ءِ رنگ ءِ جیڑگانی کئے کساس ءَ زانت کنت؟ کئے بزانت چنچو جگر تراکینگ ءُ ریزگ کتگ؟ کے بہ جیڑیت کے بہ ماریت سرجمیں شپ ھورکیں لاپ ءَ بے وراک ءَ نشتگاں پہ کے ءَ باریں بگش ءُ گلزمیں بایدیں نوں گلزمین وابانی مانا ءَ بہ دنت
اُبید نِسار
