بلوچی ، شاھگانیں بلوچستان ءِ جَھمِنندیں راج بزاں بلوچانی راجی زبان اِنت ، اے ھم زانتگیں گَپّے کہ بلوچ راج ءِ شاھگانیں سرڈگار 1928ءَ گولڈ اسمیت Gold Smith Line کِشک ءُ انگریز ءِ آ دگہ دومی رَستگیں کِشکانی نام ءُ نمیون ءَ بَھر ءُ بانگ کَنگ بوتگ ، شَہ انگریز ءِ ھمے بَھر ءُ تَھراں پَد بلوچ راج ءِ شاھگانیں سَرڈگار ماں سَے بھر ءَ بزاں ایراؔن ءُ پاکستاؔن ءُ اوگانستاؔن ءِ نیام ءَ ٹکُرانی دُروشم بَھر ءُ بانگ اِنت ، ھمے وَڑ ءَ بلوچ ءُ بلوچستانی ماں جند ءِ سَرڈگار ءَ جُتا جُتائیں اِستانانی نام ءَ سِستگیں دروشمے چَہ یکّ ءَ دگر ءَ دور داشتگ ءُ دگریں راجانی ایردست جوڑ کُرتگ اَنت ، چوناھیگا ایردستیانی دَھر ءِ ھر باریگ ءَ اَگاں مردم بِہ پول ایت ءُ بچار ایت ءُ تَھمار بِہ کنت گوں جوانی ءَ گِندگ ءَ کَیت کہ مُدام بلوچ ءِ سَر ءِ سَردستیں راج ءُ راجداراں پہ بلوچ ءِ دود رَبیدگ ءُ راجی زبان ءِ بیگواھی ءَ وَڑ وَڑیں رپک ءُ ھُنر ءُ پَندل ساز اِتگ دانکہ پہ زوراندَستی ءُ زورانسری وتی راجی زبان ءُ وتی دود ربیدگاں بلوچ راج ءِ سر ءَ مُشت بِکن اَنت ءُ گوں وتی رَنگ ءُ گَوازاں بلوچ ءَ وتی رَنگ ءَ بِِہ رَج اَنت ۔ بِگندئے بلوچ راج ءِ بَدواھاں زی ھم پہ بلوچ ءِ راجی زبان بلوچی ءِ بیگواھی ءَ ھمے کوشِست کُرتگ مرچی ھم کَنگ ءَ اَنت ، بےگْوشَگ ءَ آیانی جُھد پہ بلوچ راج ءِ راجی زبان ءِ بیگواہ کَنگ ءَ سَرجم ءُ برجمیں رَنگے ءَ برجاہ بوتگ ءُ وَڑے ناں وَڑے داں اَنگت ءَ ھم گوں رَشت ءَ سَرجم ءُ بَرجمیں رَنگے ءَ برجاہ اِنت ، پرچاکہ آ گوں جوانی ءَ زانتکار ءُ سَرپد اَنت کہ زندگیں راجانی پَجّار زبان اِنت ءُ زُبان راجانی ھستمان ءِ مانزماندار اِنت ۔ اَچ بلوچستان ءِ گْوستانک ءِ سَرگْوست ءُ سرھالانی گْواچنیں گْواجار ءُ گْواچیانی ٹَپاسگ ءُ گِندگ ءَ چے ھمے وَڑ ءَ بلوچستان ءِ ھستیگیں وھد ءِ وانگ ءُ وانینَگ ءِ جاورھالانی گِندگ ءَ پَد ھَر آکل ءُ بالِگیں مَردم ءَ سَما کَپّ ایت ءُ گوں جوانی زانت کہ بَھر ءُ بانگ بوتگیں بلوچستان ءِ کُجام ھم بَھر ءَ سَردستیں راج ءُ راجداراں کدی اوں بلوچ راج ءَ را سرکاری ھساب ءَ راجی زُبان “بلوچی” نہ وانینتَگ ۔ بلوچی ءِ بَدواھاں وتی ھساب ءَ وتی دَزدَپ ءُ دَزسرَس ءِ دُرسیں دَر پہ بلوچی ءَ بَستگ اَنت ، ھو بَلے آ جاہ کہ ھُدا ءَ دیستگ بَندہ ءَ نہ دیستگ، ھُدا ھَکّ ءِ جاہ نِشتگ ، یکّ دَرے اَگاں بَند ایت تَھ بِگندئے دومی دَر ءَ بوج ایت ، ھُدا ءَ مرچی باندا رسانکدر “سوشل میڈیا&فضای مجازی” ءِ شاھگانیں دَر پہ بلوچ ءَ بوتکگ ءُ بلوچی ءِ وانگ ءُ دَربَرگ ءِ راہ پَمّا آمورگ کُرتگ ۔ ماں ھمے شاھگانیں رسانکدر ءِ ھر دَر “فیسبوک&وَٹساپ&ٹلگرام” ءَ بلوچ راج ءِ دوزواھیں زبانزانت ءُ لبزانکی سَنگتاں بلوچی لَبزانکی گَلّ “گروہ” ٹَھینتگ ءُ زانشتی ئیں رَنگے ءَ کار ءَ اَنت ءُ گوں جوانی ءَ بلوچی ءَ وانینگ ءَ اَنت ، مرچی باندا اَگاں ما بِلوٹ ایں بلوچی ءِ وانگ ءُ زانگ ءُ دَربَرگ پَمّا اینکَر گران نہ اِنت پہ بلوچی ءِ دَربرگ ءَ اَلّمی اِنت کہ بلوچی بِہ وان این ءُ گوں بلوچی آباں نِبشتہ بِہ کن ایں ۔ اَگاں ما وَھد ءِ کدر ءَ بزان این ءُ گوں ھُبّ ءُ واھگ ءَ ماں رسانکدر ءَ گوں دلگوش ءَ بلوچی سْیاھگ ءِ دَرونتاں بوان ایں ءُ گوں سَرد سری ءَ بلوچی ءِ رَندگیری ءَ بِکن ایں اَلّمی ءَ ما زوتاں چے زوت راجی زبان بلوچی ءِ دَربَرگ ءَ سوبین بوت کن ایں ، پرچاکہ بلوچی اَبرمی گوں مئی ءُ ھوناں ھوار اِنت ھَردے کہ ما بلوچی ءِ واھگداریں مَردم وتی راجی زبان ءِ دَربَرگ ءَ جوانیں رنگے ءَ سوبین بِہ بئیں گُڑا ما وتی آپریچانی ھر ھَند ءُ دَمگ ءِ ھَمُک ھَلک ءُ میتگ ءَ ھمے وَڑیں رسانکدری گَلّ ءُ درَبرجاہ یابلکیں شَرتریں رنگے ءَ میتگی دَربرجاہ ٹَھینت کُرت کن این ءُ وتی آپریچ ءُ ھَند ءُ دمگانی بَچّ ءُ جِنکّاں وتی راجی زبان ءَ گوں پَلگاریں دروشمے ءَ پہ جوانی وان اینت کن ایں
بلوچ ، بلوچی ، بلوچستان اَبدمان ءُ نمیران بات اَنت
