بلوچ اسٹوڈنٹس فرنٹ کراچی ھنکین ءِ ھنکینی لس مجلس ءِ دیوان ھنکینی کماش جاوید بلوچ ءِ سروکی ءَ برجم دارگ بوتگ، دیوان ءِ تہ ءَ گل ءِ بُنجاھی سرکولر، گْوستگیں کارکردگی رپورٹ، شرگداری، گل ءِ کار (تنظیمی امور)، ءُ آیوکیں کارانی (آئندہ لائحہ عمل) ءِ سرھال ءِ سر ءَ گپ ءُ تران بوتگ، اِے دیوان ءِ مھمان ھاس بی ایس ایف ءِ بنجاھی کمک کارگشاد جاوید بلوچ ءُ گچینی مھمان بی ایس ایف ءِ بنجاھی پَتّر ءِ باسک ڈاکٹر لطیف لال بلوچ بوتگ۔
بی ایس ایف کراچی ھنکین ءِ ھنکینی لس مجلس ءِ دیوان ءِ تہ ءَ بی ایس ایف ءِ بُنجاھی سروکاں وتی ھیال درشان کنان ءَ تران کرت ءُ گْوشت اِش کہ بلوچ نودربراناں راجکاری ءَ چہ دور کنگ ءِ ھاتر ءَ وڑ واریں پندل سازی بوگ ءَ اَنت تاںکہ آیانی تہ ءَ زانت ءُ سرپدی مہ بیت، آ وتی راجی جْیڑھاں چہ دور بہ بنت۔ بلے بلوچ نودربراں اِے تیوگیں جْیڑھانی دیمپانی کرتگ ءُ وتی راجی نودربر گل ءَ گْوں ھوَار بوتگ اَنت ءُ وتی جُھد اِش برجم داشتگ، نودربرانی راجی گل یک زانشتجاھے ءِ ارزشت ءَ دار اِیت۔ بلوچ اسٹوڈنٹس فرنٹ راجدوستی ءِ لیکہ ءِ بنیات ءَ شھدربرجاہ ءُ مزن شھدربرجاھاں بلوچ نودربراناں راجی پجّار، راجی جْیڑہ، راجی دود ءُ ربیدگ ءُ انوگیں اھد ءِ راجکاری ءِ پِڑ ءَ زانت ءُ سرپدی دیگ ءَ جْوانیں کِردے پیلو کنگ ءَ اِنت، اُمیت اِنت کہ بی ایس ایف ءِ ھر باسک وتی راجی پجّار ءِ رکّینگ ءِ ھاتر ءَ وت ءَ اِلم ءُ زانشتی پڑ ءَ مھکم کن اَنت ءُ وتی راجدپتر ءَ جْوانی سرپد بہ اَنت۔ کجام ورنا کہ وتی راجدپتر ءَ جْوانی ءَ سرپد مہ بیت گُڑا آ کدی وت ءَ نہ زانت کہ من کے اوں، منی راجی بِستار چے اِنت، بلوچ راجدپتر ءَ اگاں چمشانک بہ دے ئے گُڑا ترا اِے گندگ ءَ کیت کہ مدامی بلوچ سرڈگار دری تاگتانی اُرش ءِ آماچ بوتگ بلے بلوچ راج مدام گْوں گھگیری ءَ آ تاگتانی دیمپانی کرتگ ءُ دریں راجاناں پہ ارزانی ھاکمی ءَ نیشتگ۔ انوگیں اھد ءَ گیش چہ گیش وانگی ءُ ملکاری ءِ پِڈ ءَ ورنا وت ءَ را مھکم بہ کن اَنت، گْوں کتاباں سنگتی ءُ نزیکی بہ کن اَنت، پرچے کہ کتاب ترا تئی اسل کشک ءَ پیش دار اِیت، ترا تئی سرپدی دنت۔ بلوچ نودربر بہ وان اَنت ءُ وتی راجی جْیڑھانی سر ءَ نبشتہ ھم بہ کن اَنت۔
آیاں تراں کنان ءَ گْوشت کہ بلوچ اسٹوڈنٹس فرنٹ ورنایانی وانگ ءُ سرپدی دیگ، آیانی تہ ءَ وانگ ءُ نبشتہ کنگ ءِ مارشت ءِ ودی کنگ ءِ ھاتر ءَ “زانش” ءِ نام ءَ تربیتی سیریز جوڑ کنگ ءَ اِنت، جریدگ اِنت زوت ءَ چاپ ءُ شنگ بیت۔ مِھرگڑھ ءِ نام ءَ تاکبند ھم شنگ ءِ کنگ ءِ ھاتر ءَ چِن ءُ لانچ کنگ ءَ اَنت۔ بے تاکبند ءُ کتاب ءَ گل وتی باسکاناں آ کساس ءَ سرپدی دات کرت نہ کنت۔ آیاں دیمتر ءَ تران کنان ءَ گْوشت کہ بِستار بلوچ مارا گْوں ھر بلوچ نودربراں ھمگرنچ بوگی اِنت، وانگی ادارھانی تہ ءَ آیانی جْیڑھانی گیش ءُ گیوار کنگ ءِ ھاتر ءَ گْوں بلوچ نودربراں ھمکوپگ بوگی اِنت۔ راجدوستی مارا ھمے سکین ءَ دنت کہ ھر سکی ءُ گرانیں ساھتاں گْوں وتی بزگ ءُ ایردستیں راج ءَ ھمکوپگ بوگی اِنت۔ چاہِ آ کجام جاہ بہ بیت، وانگی کارگس بہ بنت، الاکہ بہ بیت، ھر جاہ ءَ گْوں وتی راج ءَ گمرنچ بہ بنت ءُ آیانی کمک ءَ بہ کن اَنت۔ انوگیں انچیں گْرانیں اھدے اھتگ کہ اِے اھد ءَ بلوچ بازیں اڑ ءُ جنجالانی دیمپان اِنت، اِے جنجالانی گھگیری ورنایاناں کنگی اِنت۔
دیوان ءِ گُڑ سر ءَ آیوکیں گامگیج ءِ سرھال ءِ سر ءَ بلوچ اسٹوڈنٹس فرنٹ ءِ کارانی دیمروئی ءِ ھاتر پیسلہ زورگ بوت، گْوستگیں ھنکینی کابینہ ھلاس کنگ بوت، نوکیں کابینہ ءِ ھاتر ءَ گچین کاری پَتّرے جوڑ کنگ ءُ گچین کاری ءِ وسیلہ ءَ چہ نوکیں کابینہ اڑ کنگ بوتگ۔ اسد بلوچ ھنکینی کماش، سلمان بلوچ کمک کماش، ھیلپ آکِل کارگشاد، اُلپت بلوچ کمک کارگشاد، سرپراز رزاک ھنکینی شنگکار گچین کنگ بوت اَنت۔ دیوان ءِ ھلاسی ءَ چہ پیسر سنگتاناں گل ءِ سوگند دیگ بوت۔
