نبشتانک ـ چراگ رژن
باز جاہ سک باز رند ءَ دیوانانی تہ ءَ مردمانی دپ ما اشکتگ کسے در ءَ نشتگ آیانی زند وشھال انت آ بس بٹاک جن انت پیسبک ءَ سوشل میڈیا ءَ آھانی تہ ءَ بلوچ ءَ پہ درد نیست گش انت کہ آ پہ مرگ ءِ ترس ءَ تتکگ انت
بچار شر ءُ ھراب ھر کجا ھست انت کسے در ءَ نشتگ یا لوگ ءَ نشتگ یا بگش سنگر ءَ نشتگ بلے مارا یک چیزے شری ءِ سرا پھمگی انت ءُ شری ءِ سرا مارگی انت درانڈھی یے یک مرگے ھما مردم کہ در ءَ نشتگ انت آیاں جست گر کہ آ چتور زند گوازینگ ءَ انت
وتی ڈیھہ ءَ چہ در پہ در انت درپہ در بوھگ آسودگی یے؟؟
وتی مات ءُ پت، برات ءُ گھاراں چہ گسر کپگ آسودگی یے؟؟
اے انچیں ساھتے کہ مردم ھمک روچ ھمک ساھت مِرگ ءَ انت درانڈھ ءَ نا زندگ انت نا مرتگ انت
اے مارشتاں ھما کس پھمت کنت در ءَ زند گوازینگ ءَ انت یا گوازینتگ ئے، مارا وتی اندر ءَ اے تپاوت ھلاس کنگی انت کہ تھنا شر ءُ پلگار ھما انت کہ آئی ءَ توپک بَڑ ءَ انت آ دگہ درست بے کار انت
اے مارشت باز رند ءَ سما بوتگ کہ گش انت ھما کہ سنگر ءَ نشتگ یا ھما سنگر ءِ نندوکیں مردمانی ھیال ھمیش انت ما چہ درستاں برز برتر انت کسے بگش ایت تو رد گشگ ءَ ئے اے چیز من نزیک دیستگ گیشتر نفسیات ءَ اے چیز مان انت درست انا گیشتر ھمے وڑ انت
کول ھیربیار مری ءَ اے چیز چارگ بہ بیت کہ تو سلاہ بڑا کتگ تو اے توپک راج ءِ ھاترا بَّڑا کتگ اے تئی وتی واھگ بوتگ پہ راج ءِ ھاترا دراتکگ ئے مردم کجام کار ءَ کنگ ءَ انت پہ راج ءَ قابل ءِ کدر انت بلے کس چہ کس ءَ برز تر نہ انت سیاسی مردمے بیت یا سنگر ءَ نشتگیں سرمچارے بیت کسے در ءَ نشتگ آئی وتی پیسلہ انت کسے کوہ ءَ انت آئی وتی پیسلہ انت یکے سرمچارے ءَ گلاسے آپ دنت آ ھم ھمے کچ ءَ چارگ بیت کسے دگہ کمکے کنت آ اوں کدر کنگ بیت
یک گپے ھست مارا یکے دومی کدر کنگی انت کس کس ءَ اے شگان ءَ مہ جنت کہ تو در ءَ نشتگ من سنگر ءَ اوں تئی بستار کستر ءُ منی مستر انت
سنگر بیت یا سیاست مارا ھردو یکیں چماں چارگی انت داں سیاست نہ بیت جنگ نہ بیت جنگ نہ بیت سیاست بوت نہ کنت ھردو پہ ڈیھ ءَ مارا المی انت ھردوکانی بستار یک ھساب انت داں تیر توار نہ کنت کلم گپ نہ کنت کلم ءِ ساہ توپک ءِ ساھگ ءَ انت توپک اوں بے ارواہ انت بید ءِ کلم ءَ ھمے کلم انت درست رد ءُ راستاں گییشن ایت اگاں کلم مہ بیت توپک وتی سرا پہ ھرابی کش ایت
کسے من ایت یا نہ من ایت مستریں مئے اے جنگ ءِ تہ ءَ نزوری اِش ما کلم کم بستار داتگ
باز رند ءَ توپک رنگ راھا آں گسر کپتگ مارا باز جاہ ءَ تاوان ھم بوتگ بوھگ ءَ انت ھم پرچا کہ ما تھنا توپک ءَ گیشتر بستار دے انت کلم ءَ مان نیار انت مارا باھد اے تب ھلاس کنگی انت وتی تہ ءَ اے برزی جھلیاں در کپگی انت یک برابر ءَ اوشتگی انت ءُ جنزگی انت داں ما توپک ءُ ند ءَ یک ھساب کارمرز کت بہ کنیں وتی منزل ءَ زوت سر بہ بیں
