مجیب ولیؔ
ھمگام بلوچی
من بازیں جاھاں گندگ ءَ آں کہ بلوچی ءِ اے گال گیشتر رد کارمرد بیگ ءَ اَنت۔ بلوچی ءِ نبشتہ کنوک جیڑ اَنت کہ ”آں” بس ”من“ ءَ کارمرد بیت پمیشکا اے ھر جاہ ھمے وڑ جتا نبیسّگ بیت۔ بلے رد اِنت۔ سیدؔ وتی کتاب ”بلوچی سْیاھگ ءِ راست نبیسّگ“ ءِ تہ ءَ اے دوئینانی کارمردی جاھاں گیشّین اِیت۔ ایشانی بارہ ءَ سیدؔ وتی کتاب تاکدیم 85 در26 ءَ نبیسّ اِیت۔
”آں:اے پہ یک گپ جنوکے ءَ کارمرد بیت بزاں کہ ”من“ ءَ۔ انچوش کہ:۔ ”من مریدآں، من گار آں“ بلے گال ھر وھد ”اں“ نبیسّگ بیت کہ راست اِنت۔ ما نبیسّیں: ”من مریداں، من گاراں، من رواں، من تُنّیگاں“۔
اے بُرز ءِ درور کہ سیدؔ ءَ وتی کتاب ءِ تہ ءَ داتگ ما ایشی ءَ اگاں شرّی سر ءَ بہ پھمیں گُڑا ھمے گْوشگ بیگ ءَ اِنت کہ اے جاہ ءَ ”آں“ جتا نبیسّگ نہ بیت۔ بلکیں گوں گالاں ھوار بیت۔ اد ءَ سید ءِ اے گالرد کمّو دلگوش دیگ بہ بیت گُڑا سرجمیں گپ مئے مجگ ءَ نند اِیت۔ سید گْوش اِیت
”من مریدآں، من گارآں“ بلے گال ھر وھد ءَ ”اں“ نبیسّگ بیت کہ راست اِنت“
نی اگاں ما دلگوش بہ دے ایں گُڑا سید اد ءَ راست گْوشگ ءَ اِنت۔ وھدے کہ ”ا“ گالے ءِ دیم ءَ کَیت آ وت دراج کشّاب(long vowel) اِنت۔ اے جاہ ءَ ”آ“ ءِ جند پکار نہ اِنت۔ بزاں چشیں جاھاں ”رواں، کناں، مڑاں، تچاںءُ دگہ۔۔“ اد ءَ ”ا“ وت دراج کشّاب اِنت گُڑا اد ءَ الپ ءَ کلاھے سر ءَ دیگ ءِ مانا چے اِنت۔
”آں“ ءِ تچکیں کارمرد سید ءِ رھبند ءَ چوش اِنت۔ وھدے کہ گالے ءِ دیم ءَ ”ا، ءَ، یے“ آتک اَنت گُڑا چشیں جاوراں ”آں“ جتا نبیسّگ بیت۔ چوش کہ:۔
من روگ ءَ آں۔
من نندگ ءَ آں۔
من ڈنّ ءَ تچگ ءَ آں۔
من نگن پچگ ءَ آں۔
من بازار ءَ روان ءُ کا آں۔
من مزنیں شکاری یے آں۔
بلے ھمے ”آں“ آ دگہ جاوراں چوش گوں گالاں ھوار نبیسّگ بیت۔ چوش کہ:۔
من مریداں۔
من مجیباں۔
من ڈنّ ءَ رواں۔
من لیب کناں۔
من ڈنّ ءَ تچاں۔
سید ءِ رھبند ءِ رد ءَ ”آں“ ھمے وڑ کارمرد بیت۔ ءُ اگاں ما سید ءِ کتاباں بہ وانیں۔ گُڑا مارا اے گال اود ءَ ھمے وڑ ءَ گندگ کا اَنت۔
دومی گال ”ایں“ اِنت کہ ”آں“ ءِ وڑ ءَ ھرچ جاور ءَ جتا نبیسّگ بیگ ءَ اِنت۔ ایشی ءِ ھرچ جاور ءَ جتا نبیسّگ ھم چو ”آں“ ءَ رد اِنت۔ سید ھاشمیؔ وتی کتاب ”بلوچی سیاھگ ءِ راست نبیسّگ“ تاکدیم 85 در 26 ءَ نبیسّ اِیت کہ:۔
”ایں:۔ انچوش کہ ”آں“ پہ من ءَ اِنت۔ ھمے رنگ ءَ ”ایں“ پہ ”ما“ ءَ اِنت۔ انچوش کہ:۔ ما بلوچ ایں، ما نشتگ ایں۔ اے گال ھم چو کہ ”آں“ ءَ یکجاہ نبیسّگ بیت۔ ما ایشاں نبیسّیں:۔ ما بلوچیں، ما گشادیں، ما نشتگیں۔ اے رنگ ءِ نبیسّگ ءَ ”ایں“ ءِ ”ا“ یلہ دیگ بیت۔ بلے باز جاگہ ءَ مارا ھرّنگ ءَ اے گال سرجم ءَ جتا نبیسّگ لوٹ اِیت۔ انچوش کہ:۔ ما وانگ ءَ ایں، ما ورگ ءَ ایں، ما مڑگ ءَ ایں۔“
ھمے کتاب ءِ تہ ءَ ھمے در ءَ تاکدیم 76 ءَ ”آں ءُ ایں“ ءِ درور دیان ءَ سید چوش نبیسّ اِیت۔
”آں: من مریداں، من گاراں، من سرپداں، من وانگ ءَ آں، من روگ ءَ آں۔
ایں: ما گشادیں، ما نشتگیں، ما وانگ ءَ ایں، ما ورگ ءَ ایں“
اے درورانی چارگ ءَ رند اگاں کسے بہ گْوش اِیت کہ “آں، ایں” ھر جاور ءَ جتا نبیسّگ بنت گُڑا بزاں آ سید ءِ رھبند ءَ نہ اِنت۔ پرچا کہ سید ءَ وتی جند ءِ نبشتگیں کتاباں ھم اے گال ھر جاور ءَ جتا نہ نبشتگ اَنت۔
سید ءَ ھمے رھبند وتی کتابانی تہ ءَ ھم کارمرد کتگ۔ بلے لھتیں سنگت جاھلی کنت کہ سید ءَ وت ”بلوچی سْیاھگ ءِ راست نبیسّگ“ ءِ تہ ءَ نبشتگ۔ بلے ھمے سنگت نبشتگینانی جھل ءَ نہ وان اَنت کہ اود ءَ سید ءَ نبشتگ
”بلے گال ھر وھد ”اں“ نبیسّگ بیت کہ راست اِنت۔ ما نبیسّیں: ”من مریداں، من گاراں، من رواں، من تُنّیگاں“۔
اے گپّ ءِ جند ءَ دلگوش نہ کن اَنت۔ سید ءَ تھنا ”بلوچی سیاھگ ءِ راست نبیسّگ“ ءِ تہ ءَ درور نہ داتگ۔ سیدؔ وتی کتاب ”بلوچی بنگیجی“ ءَ ھم اے دوئیں گالانی درور ءَ دنت ءُ ”سوج“ ءِ تہ ءَ نبیسّ اِیت کہ چوں نبیسّگ بہ بنت۔ درونت 22 تاکدیم 33 ءَ ”بلوچی بنگیجی“ ءِ تہ ءَ سید ”سوج“ ءِ تہ ءَ نبیسّ اِیت :۔
”آں _ایں“ اے گال گوں وتی پیسری گال ءَ ھور ھم کنگ بنت انچوش کہ من مُریداں ءُ ما بلوچیں“
دگہ یکجاھے درونت 28 تاکدیم 42 ءَ ”سوج“ ءِ تہ ءَ گْوش اِیت کہ :۔
”ما لیب کنیں ، ما چاریں، ما و نوکیں ”بُندر“ ءَ ”کن ایں، چار ایں، نوک ایں“ اَنت بلے اے رنگ ءَ (ھوار) نبیسّگ بنت کہ گپّ ءِ تہ ءَ رد بزانتی نہ کن اَنت۔“
چہ اے دروراں منی مراد ایش اِنت کہ اے دوئیں گال سید ءِ رھبند ءِ رد ءَ ھر جاہ ءَ جتا نہ بنت۔ کجا جتا بنت کجا ھوار بنت۔ گوں سید ءِ داتگیں دروراں من گیشّینگ ءِ جھد کُتگ۔ منّگ نہ منّگ ھرکسے وتی منشا اِنت۔ بلے اے دوئیں گالاں ھر جاور ءَ جتا نبیسّگ ءُ سید ءِ درور دیگ رد اِنت پرچا کہ سید ھر جاہ ءَ ایشانی جتا نبیسّوکیں مردمے نہ بیتگ۔ آئی ءَ رھبند ارزان کتگ بلے مئے وتگڑیں زانتکاری اے رھبند ءَ ھم ”ایسپ ءِ کتب“ کنگ ءَ اِنت۔
