نصیر آباد (ھمگام ھال) بلوچ اسٹوڈنٹس ایکشن کمیٹی نصیرآباد ھنکین ءِ ھنکینی لس دیوان ھنکین ءِ گوستگیں کارمستر احسان بلوچ ءِ پاگواجہی برجم دارگ بیتگ۔ دیوان ءَ ھاسیں مھمان بنجاہی کمیٹیءِ باسک وقار بلوچ ءُ گچینی مھمان بُنجاہی کمیٹی ءِ باسک بالاچ بلوچ ساڑی بیتگ اَنت۔ دیوان ءَ بنجاہی سرکیولر، ھنکین ءِ گوستگیں اھوال، شرگداری، گل کاری، ھندی ءُ میان استمانی سیاسی جاورھالءُ آوکیںں گامگیج بنگپانی سرءَ تران بیتگ۔
دیوان ءَ بنجاہی سنگتاں تران کنان ءَ گُشتگ کہ بلوچ نودربرئے ءِ بستارءَ مارا اے گپ پہمگ لوٹیت کہ سیاسی عملءِ بہر بوگءُ وتی راج ءُ مھلوک ءِ جیڑہانی گِشینگ مارا پہ المی اِنت۔ وتی اداره ءُعمل سرءَ یقین کنگی اِنت وتءَ گیش مھکم کنگ ءُ وتی کِشک گِشینگ لوٹیت ءُ ہرچ پیمیں اڑاندے ءِ دیمءَ چو سنگءِوڑءَ اوشتگی انت۔ انچوشکہ ما نصیر آباد دمگءَ بہ چاریں گڈا ما اے سرپد بیں کہ اِدءَ مھلوک مدتے بیت کہ چہ سیاست ءَ دور کنگ بوتگ اَنت اشیءِ بازیں سوْب بوت کن اَنت بلے مستریں سوْب اِداءَ جاگیرداری نظام ءِ نام سرءَ مہلوک ءِ دارگ اِنت کہ اشیءِ وسیلہ ءَ نصیر آباد ءِ مھلوک چہ علم ءُ سیاسی زانتءَ زبہر کنگ بیتگ۔ دومی نیمگءَ ادءَ دریں راجءُ مردمانی آبادکاری گیش کنگ بیتگ کہ مرچی اِدءِ مھلوک وتی زبان یل کنگ ءَ مجبور اَنت پرچاکہ مارکیٹی زبان سندھی اِنت۔ ادءِ بلوچ دودمانی گپچل ءِ آماچ اَنت۔ اگاں ما وتی کار ءُ پروگرام ءَ بطور ادارہ منظم و مھکمیءَ گو ں نہ جنزینت گڈا آ روچ دؤر نہ اِنت کہ اے ھند ءُ دمگاں مئے قومی وجود ھلاس بیت۔
دیمترا سنگتاں تران کنان ءَ گُشتگ کہ اِدءِ مھلوک ءِ وانگی کچ سک باز کم اِنت۔ ایدگہ دمگءُ ھنداں وانگی ادارہ کم انت یا نیستیءِ برابرانت۔ درستاں چہ مستریں جیڑہ سکولءُ کالجانی تہءَ استادنی ساڑی نہ بیگ ءُ بازیں ھنداں سکول میراں وتی بیٹھک ، زردارانی ڈیری فارمءُ دکانانی گودام جوڑ کنگ بوتگ اَنت۔ اشانی سوْبءَ اے ھنداں مھلوک چہ وانگءَ دور بیگ ءَ اَنت۔
گُڈسر ءَ سنگتاں گُشت کہ نصیرآباد ءَبلوچ نودربرانی وانگی کچ ءُسیاسی بودشت ودی کنگ ءِ ھاترءَ ھنکین ءَ بلوچ لٹریسی کیمپئین ءِ وسیلہ ءَ چہ نصیر آباد یونیورسٹی بابت ءُ ایدگہ ھند ءُ دمگانی وانگجاہانی بابت ءَ گامگیج زیرگ بیت۔ ایشیءَ ھوار کتابی مراگاہ ،گونڈ گونڈیں وانگی مراگاہ ءُ مہم جنزینگ بیت ءُ صباء لٹریری فیسٹیول ھم اڈ دئیگ بیت۔
درستیں بُنگپانی سرءَ گوں دلجمی ءَ تران ءَ پد گُڈی بنگپ آؤکیں گامگیج ءِ تہ ءَ گوستگیں کابینہ ھلاس کنگ بیت ءُ نوکیں کابینہ گچین کنگ بیتگ، نوکیں کابینہ ءَ وسیم بلوچ ھنکینی کارمستر، مقصود بلوچ کُمک کارمستر، عدنان بلوچ کارگشاد، علی بلوچ کُمک کارگشاد ءُ نصیب بلوچ ھالرسانی کارگُشاد گچین کنگ بیتگ اَنت۔
بنجاھی سنگتاں نوک گچین بیتگیں کابینہ ءَ سوگند دات ءُ گچین بیتگیں زمہ واراں پیمان کُت کہ آ وتی زمہ واریاں جوانیں رنگے ءَ جُنزین اَنت۔
