آوارن(ہمگام نیوز) بلوچ اسٹوڈنٹس فرنٹ آواران ھنکین ءِ ھنکینی لس مجلس ءِ دیوان ھنکینی کارگشاد شاھد بلوچ ءِ سروکی ءَ برجم دارگ بوتگ، اِے دیوان ءِ مھمان ھاس بی ایس ایف ءِ بنجاھی کماش ڈاکٹر شکیل بلوچ بوتگ ءُ گچینی مھمان بی ایس ایف ءِ سینئریں سنگت نصیر بلوچ بوتگ۔ دیوان ءِ تہ ءَ بنجاھی سرکولر، گْوستگیں کارکردگی رپورٹ، شرگداری نشست، اِلاکھی ءُ میان استمانی جاورھال، گل ءِ کار ءُ آیوکیں گامگیج ءِ بُنگپّانی سر ءَ باوست کنگ بوتگ۔
بلوچ اسٹوڈنٹس فرنٹ آواران ھنکین ءِ ھنکینی لس مجلس ءِ دیوان ءَ سنگتاں تران کنان ءَ گْوشت کہ دُنیا ءِ جاور روچ پہ روچ مَٹ بوان اَنت، تاگتوریں اِستان وتی گُزرانکی گھتری ءُ زوراک بوگ ءِ ھاتر ءَ دُنیا ءِ ایردستیں راجانی ابرمی مَڈّیاں، تیاب، سرڈگار ءَ جُتائیں دروشماں ایردست کنگ ءَ اَنت۔ دنیا ءِ تہ ءَ انوگیں مستریں تاگت امریکہ، برتانیہ، اسرائیل گْوں آدگہ وتی اتھادیاں ءُ چین ءُ روس، ایران گْوں وتی تپاکیں تاگت ءِ ھاسل کنگ ءِ دِرچ ءَ دو بَھر اِنت۔ یک اِستانے دومی اسِتان ءِ نِزور کنگ ءِ ھاتر ءَ جُتا جُتائیں رِپک ءُ ھُنر سازگ ءَ اِنت۔ روس ءِ نِزور کنگ ءِ ھاتر ءَ امریکہ ءُ آئی ءِ اتھادی ئیں استان یوکرین ءَ کُمک کنگ ءَ اَنت۔ گْوستگیں ماہ ءَ انڈیا ءِ تہ ءَ G20 مراگش ءَ انڈیا مڈل ایسٹ یورپ اکنامک کوریڈور IMEC کہ آ یک مزنیں گُزرانکی دگّے، کہ انڈیا ءُ یورپ، ازرائیل ءَ را ھمگرنچ کنت، بازیں زانتکارانی گْوشگ اِنت کہ IMEC ءِ جْوڑ کنگ ءِ مول ءُ مراد گُزرانکی ءُ بیوپاری نپاں ھوار اِے چین ءِ انیشیٹیو بیلٹ اینڈ روڈ IBR ءِ بگیری ءَ جْوڑ کنگ بوگ ءَ اِنت، تاںکہ دُنیا ءِ آدگہ ملکانی تہ ءَ چین ءِ سان ءَ نِزور کُرت بہ کن اَنت۔
ھمے پیم ءَ تاگتوریں اِستان دومی ملکانی نزور کنگ ءِ ھاتر ءَ ھما ملکانی ایردستیں راجانی جُنز ءَ ھم کمک کنگ ءَ اَنت۔ ھمے ھپتگ ءَ ھماس ءِ لَشکر ءَ ازرائیل ءِ سر ءَ لشکر کشّی کرتگ ءُ بازیں راکٹ اُرش کرتگ، ایشی ءِ بگیری ءَ ازرائیل ءَ ھم اِے گپ پدّر کرتگ کہ اِے اُرش ءِ تہ ءَ ایران ءِ دست مان اِنت۔ چُشکہ ایران اِے وھد ءَ روس ءُ چین ءِ بلاک ءَ ھوار اِنت، زانتکارانی گْوشگ ءِ رِد ءَ اِے تاگتوریں ملکانی گِر ءُ چیل دگنیا ءَ را سیمی جھانی جنگ ءِ گپچل ءَ دور دات کنت۔
دیمتر ءَ سنگتاں دمگی جاورھالانی سر ءَ تران کنان ءَ گْوشت کہ اَمریکہ ءِ روگ ءُ تالبان ھکومت ءِ آیگ ءَ چہ نیکراھی ناشرکاریں گلاں سَر چِست کرتگ، بلوچستان ءِ تہ ءَ نیکراھی گلاں بازیں اُرش کرتگ، تربت ءَ ابدلرؤپ ءِ کْوش ءُ مَستُنگ ءَ نیکراھی مُچانک ءِ تہ ءَ وتکشیں تراک کہ چہ ایشی ءَ بازیں بے میاریں لس مھلوک جنَگ بوت اَنت۔ سنگتاں دیمتر تران کنان ءَ گْوشت کہ بلوچستان ءِ تہ ءَ بازیں وانگی ادارہ ءَ بند اَنت، ایشانی واست ءَ مارا جُھد کنگی اِنت تاکہ بلوچ ورنا وانگ ءِ پِڑ ءَ بیا اَنت ءُ وتی راج ءِ دیمروئی ءِ واست ءَ وتی کِرد ءَ پیلو بہ کن اَنت۔ بے وانگ ءَ راج کدی دیمروئی کرت نہ کنت، انوگیں وھد ءَ بلوچ ورنایاناں سرکاری دربرجاھانی وانگ ءَ ابید دگہ راجدپتری کتاب، شھزانتی ءُ آدگہ پڑانی کتاب وانگ ءُ دربرگی اَنت تاکہ آ دُنیا ءِ بابت ءَ سرپد بہ بنت۔
آواران ھنکین ءِ لس مجلسی دیوان ءِ گُڑسر ءَ آیوکیں گامگیج ءِ بنگپ ءِ تہ ءَ سنگتانی داتگیں سوج ءُ سرپدیانی سر ءَ گپ ءُ باوست بوت ءُ گل ءِ کارانی دیم ءَ برگ ءِ ھاتر ءَ بازیں پسیلہ زورگ بوت۔ آواران ھنکین ءِ ھنکینی جْوڑشت ھلاس کنگ بوت ءُ نوکیں ھنکینی جْوڑشت اَڑ کنگ بوت، ھنکینی کماش سنگت شاکر بلوچ، کمک کماش ھُزیپ بلوچ، کارگشاد پیسل بلوچ، کمک کارگشاد مُشتاک بلوچ ءُ شنگکار بانک گلشن بلوچ گچین کنگ بوت اَنت۔
دیوان ءِ ھلاسی ءَ چہ پیسر ءَ بی ایس ایف ءِ بُنجاھی کماش ڈاکٹر شکیل بلوچ ءَ آواران ھنکین ءِ سنگتاناں گل ءِ سوگند دات، ءُ آیاں اِے اھد کرت کہ ما بلوچ راج ءُ گل ءِ کارانی دیمروئی ءِ ھاتر ءَ وتی جُھد ءَ برجاہ دار اَیں۔
