نال(ہمگام نیوز) بلوچ اسٹوڈنٹس ایکشن کمیٹی نال ھنکین ءِ ھنکینی مجلس گوستگیں ھنکینی کارمستر اسلم بلوچ ءِ سروکی ءَ برجم دارگ بیتگ۔ دیوان ءِ ھاسیں مہمان بنجاہی کمیٹی ءِ باسک بالاچ بلوچ بیتگ۔
دیوان ءَ بنجاھی سرکیولر، گوستگیں ھنکینی اھوال، شرگداری، گل کاری، ھندی ءُ میان استمانی سیاسی جاورھال ءُ آؤکیں گامگیج ءِ بنگپانی سرءَ گپ ءُ تران بیتگ۔
دیوان ءَ بنجاہی سرکیولر بنجاہی سنگتءَ ونت ءُ گل ءِ فیصلہ ءُ پالیسی دیوان ءَ دیمءَ ایر کُت اَنت۔ دیمترءَ ھنکینی اھوال وانگ بیت اَنت ءُ گوستگیں سرجمیں اھوال وانگ بیت اَنت کہ آہانی تہ ءَ ھیلکاری دیوان، کتاب میڑہ، مراگشءَ ھوار ایدگہ کار ھوار اِت اَنت۔ شرگداری سرءَ سنگتاں وتی نزوری گُشت اَنت ءُ آہانی گرگ ءُ گہتر کنگ ءِ ہاترءَ پیمان کُت۔
دیمی بن گپ گل کاری ءِ تہ ءَ بنجاہی سنگت ءَ گپ کت ءُ گوْشت کہ ہستیں وھد ءَ کہ دنیا چو تیزی ءَ دیمءُ روگءَ اِنت دومی نیمگءَ مارا وتءَ چارگی اِنت کہ بلوچ راج کجا اوشتاتگ۔ مرچی ہرکس ہمے گپ ءَ جنت کہ بلوچ پُشت شُتگ، بلوچ پُشت نہ شُتگ بلکیں پُشتءَ برگ بیتگ بلے اے درستیں جنجالانی دیم ءَ اوشتوک ورنا بنت کہ وتی راج ءِ دیمروئی ءِ مانزمان بنت ءُ راج ءَ دیمءَ برنت۔ بلوچ ورنایاں مرچی زنگ جنگ ءِ بدل ءَ راجی ادارہانی بھر بیگی اِنت ءُ راجی زمہ واری پیلو کنگی اَنت۔ بلوچ نودربراں ادارہ ہست ءُ آہاں پہ بلوچ چاگرد ءِ گہتر کنگ ءَ باز موہ ہست بس تہنا آہاں وتی کمفورٹ زونءَ درائگی اِنت ءُ پہ لگتمالیں راج ءَ جہد کنگی اِنت۔
استمانی ءُ میان استمانی سیاسی جاورہال ءِ سرءَ سنگتاں گپ کُت ءُ گوْشت کہ دنیا ءِ مزن مزنیں تاگتانی چم بلوچ ڈیھ ءِ سرءَ سک اَنت، اے واستہ کہ درامد بلوچ سرزمین ءِ ارزشت ءَ سرپد اَنت بلے دومی نیمگ ءَ بلوچ راج اِنت کہ وتی زمین ءِ ارزشت ءَ انگت زانگءَ نہ اِنت ءُ مدام رد کپگ اِنت۔ دنیا ءَ ہرکجا کہ چِستءُ ایرے بیت آہی ءِ پُشت ءَ جاہے نہ جاہے زمین ءِ ارزشت اِنت۔ پمیشکا مارا ہم سیاسی چست ءُ ایر نہ تہنا زانگی اَنت بلکیں وتءَ دنیاءِ دیمءَ منارینگ ءِ ہم جہد کنگی اِنت۔
گڈی بن گپ آوکیں گامگیج اَت کہ آہی ءِ تہ ءَ گوستگیں کابینہ ہلاس کنگ بیتگ ءُ نوکیں آرگنائزنگ باڈی ئے جوڈ دیگ بیتگ کہ آہانی تہ ءَ آرگنائزر زمیر بلوچ، ڈپٹی آرگنائزر امداد بلوچ ءُ آرگنائزنگ کمیٹی ءِ باسک انور بلوچ، شعیب بلوچ ءُ شیراز بلوچ گچین کنگ بیتگ اَنت۔ گڈسرءَ دیوان ءِ سنگت بنجاہی سنگت ءَ سوگند داتگ اَنت ءُ زمہ داراں گل ءِ کاراں گہتر کنگ ءِ پیمان کُتگ۔
