لیوٹالسٹای / کریم بلوچ
سهرپوستے جنگجاه ءَ ، انگریز ءِ ورنایے ءَ بندی کت و آرتی وتی کلگ ءَ و لوٹتی که آئیا به کُشیت .
سهرپوستانی سروک آئی ءِ کِرّ ءَ آتک و گوئشتی :
_ آئیا مه کش . به دئے ئی منا ._ و مرد دات .
سُهر پوستیں کماش ، انگریز ءَ زرت و آئی ءِ بندی پچ کت و برتی وتی پیشّی لوگ ءَ ، وردی دات و وابجاهی په وسپگ ءَ دات . ایدگه روچ پگاه، انگریزی ورگ دات و آئری زرت و گوں وت برت . آواں تاں دیر همراه شت انت تاں که انگریزانی کمپ ءِ نزیک ءَ شت انت . سُهر پوست گوئشت :
_ شمئے مردم منی زهگ ءَ کشته ، من ترا رَکّینت ؛ برو وتی مردمانی کِرّ ءَ و ما را به کُشیت .
انگریز بِه مَنت ( هیران بوت ) و هیرانی ءَ گوئشتی :
_ پر چا ؟ تو منا مَلَنڈ کنگ ئے ؟ من زاناں که مئے مردم تئی زهگ اش کشته . تو گهتر انت که منا به کش ئے .
گڑاں سُهر پوست گوئشت :
_ وهدے که لوٹت اش ترا به کش انت ، من وتی زهگ ءِ ترانگ ءَ کپتاں ، و منا تئی سرا بزگ بیت . من ملنڈ نه کناں : برو وتی مردمانی کِرّ ءَ و ما را به کُشیت ، اگں لوٹ ئے .
و سهر پوست ، انگریز ءَ ویل کت .
