لیو ٹالسٹای / کریم بلوچ
چارمی در :
ماتریونا اوشتات و گوئشتی : _ اگاں جوانیں مردمے به بوتیں ، لوچ نه بوتگ ات . آئی ءَ جامگے هم گوئر ءَ نیست . اگں ترا په نیکیں کارے ءِ کنئگ درا روگی ات ، تو من ءَ بگوئشتیں . تئو من ءَ بگوئش که چُشیں وَش ڈؤلیں مردمے تئو چه کجه یارتگ ؟ _ هئو ، من ترا گوئشگ اوں ، وهدے که من آیگ اتوں ، هموداں که راه ءِ کلیسا انت ، اے مرد هموداں لوچ و جان در ماں کهریں زمستان ءِ برپ و گوریچ ءَ ، کُبلیں کلیسای ءِ کش ءَ نشتگ ات . هنون تئو وا گندئے که گرماگ نه انت و اے هموداں لوچ ات . هدا من ءَ هموداں سر کرت . نه بوت که من ویلی کناں . تئی هیال ءَ من چے به کتیں ؟ زاناں ( دَنا ) هیرانی هبر کم انت ! من زرت ، گدے گوئر ءَ دات و گوں وت زرت و یارت اداں . تئو وتی دل ءَ آرام کن . چو گناه انت ماتریونا . ما هم روچے مریں . ماتریونا لوٹت که دوا و دُژمانش بکنت . درآمد ءِ نیمگی چار ات . دپی داشت . درآمد دراجیں چارپادگ ءِ یک کُنڈے ءَ آرام نشتگ ات . نه سُر ات . دستانی ٹونگانی سرا ایر اتنت . سری سینگ ءِ سرا جهل ات . چمانی بند اتنت و گوئش ئے چیزے آهاں په پاچ بیگ ءَ نئیلیت . آئی ءَ گُٹ تروس کنان اتنت . ماتریونا چُپ ( چُپت ) بیتگ ات و سمیون گوئشت : _ ماتریونا ، زاناں ترا هدایے نیست ؟ ماتریونا وهدے که اے هبر ءَ اشکت ، دگه برے هم درآمد ءِ نیمگ ءَ چار ات و دلی نرم بوت . چه دروازگ ءِ دپ ءَ گه اوشتاتگ ات ، بهاری ءِ کُنڈ و سروگ ءِ نیمگ ءَ شُت . شام ءِ کشئگ ءَ گلائیش بوت . آپ ءِ پیاله ئی میز ءِ سرا نات . چه ترپشیں شیر ءَ تیاریں وردی ایر کرت و پتکگیں نانی هم دات انت و گوئشتی : _ نان ور ایت ، یا دگه چیزے بیاراں ؟ سمیون درآمد ءَ سُرینت و گوئشت : _ دیما بئے ، شاباش . سمیون نان ءَ کپ کرت ، تریتی کرت و شام ءِ ورگ ءَ گلائیش بیت انت . و ماتریونا میز ءِ یک کشے ءَ نشت و دستی میز ءِ سرا ایر کرت و درآمد ءَ چاراں بوت . ماتریونای ءَ درآمد ءِ سرا بزگ بوت . درآمد ءِ مهر آئی ءِ دل ءَ نشت . اناگت ءَ درآمد ءِ دیم روشن بوت . آئی ءِ دیم تهاری گار و چمانی چست کت و ماتریونای نیمگ ءَ چمی شانک دات و شهدیں بچکندے آئی ءِ لنٹاں گندگ بوت . شام اش وارت . زال گلاساں مُچ کرت و بُرت و پدا یهت و نشت و چه درآمد ءَ سوج کناں بوت : _ تئو کے ئے ( چونین ئے ) ؟ _ من اد ءِ مردمے نه اوں . _ تئو چونکا راه ءِ سرا کپت ئے ؟ _ اے باره ءَ گوئشت نه کناں . _ کے شمئی مالاں دُزّ ات و شما را لوچ کت ؟ _ هدا من ءَ شزا دات . _ تئو هنچو لِٹک و لوشت اوداں کپتگ اتئے ؟ _ هئو من هنچو وتی پادانی سرا کپتگ اتاں . گوهر من ءَ جتگ ات . سمیون من ءَ دیست ، دلی رهم کت . وتی گنجی پراکی کشیت و من ءَ گوئر دات و بوٹی هم پاد دات و گوئشتی که آئی ءِ همراه ءَ اداں بیایاں . تئو من ءَ آپ و لاپ کرت و ورگ دات . منی سرا بَزّگ بوت . واجه هدا تئی رکینوک بات ! ماتریونا پادآتک و چه تاگ ءَ سمیون ءِ کوهنیں پیرام یا جامگ ءَ که نوکی آئی ءِ درزانی دوتکگ ات ، زُرت و یارت و داتی . شلواری هم ودی کرت و داتی و گوئشتی : _ ایشاں بزور و گوئرش بکن . من گنداں که ترا جامگے گوئر نیست . ایش انت اے پُچاں گوئر بکن و هر جه که ترا پسند و وش بیت ، بهاری ءِ کش ءَ یا ماں منندجاه ، به وپس و آرام بکن . درآمد گنجی پراک ءَ کَشّیت وگُدی گوئر ءَ کت انت و منندجاه ءَ آرام وپت . ماتریونا گنجی پراک ءَ زرت و چراگی بند کرت ( کُشت ) و وتی لوگواجه ءِ وابجاه ءَ شُت . ماتریونا گوں گنجی پراک وتی پاداں چیر دات . دراجی کشتگ ات بلے واب نه کپت . درآمد چه آئی ءِ هیال ءَ در نه بیگ ات . وهدے که هوشی کرت که آئی ءِ نان هلاس بوته و په باندات ءَ آهاں نان نیست ، وهدے که هوشی کرت که شلوار و جامگی درآمد ءَ داتگ ، کمے بَژنیگ بوت و وهدے که درآمد ءِ شهدیں بچکند و پر مهرین چارگانی ترانگ ( هیال ) ءَ کپت ، دلی آرام بوت . تاں دیر وهد ءَ ماتریونا واب نه کپت و پدا سرپد بوت که سمیون هم واب نه کپته و گنجی پراک ءَ وتی نیمگ ءَ کشگ انت . گوئشتی : _ سیمون ؟ _ هئو ! _ ما آهری نان ءَ وارت و من آرت تَرّ نه کرته . باندات نزاناں که چے بکناں . پرواهے نه انت ، من باندات چه وتی دزگهار « مالینا »ی ءَ ٹکرے نان وام ءَ کناں . _ اگں زندگ به بئیں ، سیر بئیں . آئی ءِ لوگی بے موچ دراج کشتگ ات . بلے واب نه ات . _ گندگ ءَ جوانیں مردے ، بلے وتی باره ءَ چیزے نه گوئشیت . _ زرور مجبور انت . _ سمیون ! _ هئو ! _ ما دیوکیں مردمیں و همک کس ءَ اگاں چیزے پکار به بیت ، دئیں و بکشیں ، بلے پرچا کس ما را چیزے نه دنت ؟ سمیون نزانت که چے بگوئشیت ، تهنا گوئشتی : _ یک دابے تهلانی دئیں . آدگه نیمگ ءَ اِر لیٹست و واب کپت .
