بلوچ راج ءِ راجدپتر ءِ کُربانی، جُهد ءُ آجوئی ءِ واب ءَ گْوں بندوک اِنت۔ اے مزن ءُ دراج کَشیں جَد ءُ جُھد ءَ ھما نام کہ نامدار اَنت ، آ سنگت حیربیار مری ئیگ اِنت۔ یک انچیں رھشُونے کہ آئی ءَ وتی سرجمیں زند پہ بلوچستان ءِ آجوئی ءِ ھاتر ءَ نَدر کُرتگ۔ آ ھر وھد ءَ وتی تچکیں ءُ کانودی لیکھ ءِ سر ءَ اوشتاتگ ءُ زورگیریں اِستانانی زُلم ءُ زوراکی ءِ ھلاپ ءَ وتی راج ءِ راھشونی ءِ کُرتگ۔
بلوچ راج ءِ سر ءَ زورگیریں اِستانانی زلم ءُ زورکی:
بلوچستان بُندپتری درگت ءَ یک آجوئیں استانے بوتگ، 1948 ءَ پاکستان پہ زور ءُ زبردستی مازن( الحاق) کنت۔ پاکستان بلوچستان ءِ انگیر کنگ ءَ رند بلوچ راج ءَ مُلکاری(سیاسی)، گُزرانکی(معاشی) ءُ دود ءُ ربیدگی درگت ءَ دبائینگ ءِ پالیسی ءِ زرتگ۔ استانی زوراکی، مَڈیانی لُٹ ءُ پُل ءُ پوجی آپریشن ءَ بلوچ راج ءَ را بے کَساس تاوان داتگ۔ ایران ءِ مازن کرتگیں بلوچستان ءِ ھم ھمے جاور ھال اِنت۔ اود ءَ بلوچ راج نئےکہ زُلم ءُ زوراکی ءِ دیمپان اِنت بلکیں آیانی پَجّار، زُبان ءُ دود ءُ ربیدگانی ھم گار ءُ گور کنگ ءِ برجمیں کوشِستے بوگ ءَ اِنت۔
حیربیار مری ءِ لیکھہ ءُ کردار: سنگت حیربیار مری بلوچ راجی جُنز ءِ یک مزبوتیں پِلّرے اِنت۔ آئی ءِ ھمے لیکھہ بوتگ اِنت کہ بلوچ راج ءَ را وتواجھی ءُ آجوئی ءِ واست ءَ یکُمشت ءُ ھمتپاک بوھگی اِنت۔ آئی ءَ ھر وھد ءَ ھمے گپ ءِ سر ءَ زور داتگ کہ بلوچ ءَ را وتی راجدپتر ءُ دود ءُ ربیدگ رکِینگی اَنت ءُ زورگیریں اِستانانی ھلاپ ءَ یکمُشت بوگ ءُ اوشتگی اِنت۔
بُندپتری پُژدر: اگاں بلوچستان ءِ بُندپتر ءِ سر ءَ چمشانکے بِہ دے ایں گُڑاں زانگ بیت کہ بلوچ راج ءَ ھر وھد ءَ وتی آجوئی ءَ را کُلاں چہ پیش شَرتِر پَھمتگ۔ 1839 ءَ زورگیریں اسِتان ءِ برطانیہ کلات ءِ سر ءَ بیڑبارت ءُ ارش کنت بلوچ راج ءِ وتواجھی ءِ سر ءَ سان دور دنت ءُ رند ءَ 1948 ءَ پاکستان پہ زور ءُ زبردستی بلوچستان ءَ گوں وت ءَ ھور کنت۔ ایران ءِ چیر دستیں بلوچستان ءِ ھم جُتائیں جاور نہ اَنت۔ ایران ءِ هکومت ءَ 1928ء ءَ رضاشاہ پہلوی ءِ دور ءَ بلوچ ءِ ھند ءُ جاھانی سر ءَ کبزہ کُرتگ ءُ آیانی بُنکی ھکاناں پادمال کُرتگ۔
بلوچ ءِ چُکچینی: ایران ءُ پاکستان دوئیں اِستاناں گوں بلوچ اُلس ءَ لُٹ ءُ پلی کِرد پیلَو کرتگ اِش۔ ایران بلوچ اُلُس ءَ را نیکراھی وسیلگ ءَ جَنَگ ءَ اِنت ءُ آیانی سُنی عقیدہ ءَ را پہ زور ءُ زبردستی مَٹ کنگ ءِ جُھد ءَ کنگ ءَ اِنت۔ دومی نیمگ ءَ پاکستان ءَ بلوچستان ءِ تہ ءَ پوجی آپریشن، پہ زورانسری گار ءُ بیگواہ کنگ ءُ بے رَھبندیں کُشت ءُ کوش ءَ را وتی ھِیل جوڑ کُرتگ انت۔
سنگت حیربیارمَری ءَ ھر وھد ءَ اے زلم ءُ زوراکیانی ھلاپ ءَ توار چِست کُرتگ۔ آئی ءِ گوشگ اِنت کہ بلوچ راج ءَ را چہ اے زُلم ءُ زوراکیاں چُٹّگ ءِ واست ءَ وتی آجوئی پَچ گرگی اِنت۔ آئی ءَ میان اُستمانی رِد ءَ ھم بلوچ ءِ جیڑہ ءِ توجیل کنگ ءِ کوشست کرتگ ءُ انسانی ھَکانی گَلاں گوں دستبندی کرتگ کہ آ بلوچستان ءِ تہ ءَ برجمیں زُلم ءُ زوراکی ءَ نوٹس بِہ زور انت۔
بلوچ راج ءِ آجوئی ءِ جُنز یک مزنیں ءُ گِرانیں سَپرے بلے سنگت حیربیار مری ءِ وڑیں رھشون اے جُنر ءِ سوبمندی ءِ اُمیت اَنت۔ آ نہ تھنا دورگِندیں رھشُونے بلکیں بلوچ راج ءِ ھکانی ھم رکھینوک اِنت۔ مرچی وھد ءِ لوٹ اِنت کہ بلوچ راج وتی راجدپتر ءُ دود ءُ ربیدگانی رکھینگ ءِ واست ءَ یکمُشت ءُ یکجاہ بِہ بیت ءُ آجوئی ءِ واب ءَ ھکیکت ءِ تہ ءَ مَٹ کنگ ءِ واست ءَ جَد ءُ جُھد بِہ کنت۔
بلوچستان ءِ انوگیں جاورھال میان اُستمانی سیالی ءِ واست ءَ پھرپندیں ساھتے ءُ اے زلم ءُ زوراکیانی ھلاس کنگ ءِ واست ءَ زوت ءَ چہ زوت کدم زورگ ھژدری اِنت۔ بلوچ راج ءِ جزبگ ءُ هوسلہ پَدر کن انت کہ آ وتی پَجّار ءُ آجوئی ءِ واست ءَ ھچ وڑیں کُربانی دیگ ءَ چَک ءُ پد نہ بیت اِنت۔
