ھمگام بلوچی
نبشتانک: کریم تھل
فلسطین ءِ و ازرائیل ءِ نوکیں جنگے بنگیج انت . اے جنگ هم نوکینے و هم نوکینے نه انت . فلسطینی و ازرائیلیانی جنگ چه هما روچ بنگیج بوت که ازرائیلی ، فلسطینیانی آزاتی ءَ چه آهاں پُل ات و فلسطینیاں جناں ودر پدر و جهان ءَ گلیناں بوت انت و در چه فلسطین ءَ ، فلسطینیانی نام « ترسوک » ، « لگور » ، « ملک بها کنوک » و هزار دابیں زا بوت . فلسطینیاں مارست ، جهان ءِ هچ کجام هندے ، آهانی دلدوستیں و پر مهر و هزار مرادیں جند ءِ لوگ بیت نه کنت . فلسطینی وتی بندیگیں ملک و در ملک ءَ ، زورانسرانی بیم و کوش ءِ چیرا ، هما سیاهیں شپاں تپاک و جد و جهد کناں بوت انت و آزاتی ءِ شپچراگ اش وتی راج ءِ دلاں بالینت و زندگ کرت . هزاراں کس چه آواں کشگ و لکاں بندیگ و ملیوناں درپدر بیت انت . جهان آهانی مدت ءَ کمتر دلگوش کرت و گوں زورگر همراه اتنت . آهانی لوگاں بیران کناں و چه ملک ءَ گلیناں اتنت ، بلے فلسطینیاں په روگ ءَ جاهے نیست ات و ایدگه ارب ، آوانی نام ءَ باز وهد باپاری کناں بوت انت . رند چه بازیں جد و جهدے و سویت یونین ءِ کمک ءَ ازرائیل آهانی چیزے هکانی دیگ ءَ تیار بوت ، بلے اے پندلے ات که فلسطینیانی سروکاں ودی و آهاں گار بکنت و اے داب ءَ ازرائیل ، فلسطینیانی جوانیں سروک یاسر عرفات ءَ گوں یک دابیں زهرے و چنت دگه مردم ءَ تیرانی نشان کرت و فلسطینیاں گوں یک و دگه میڑیناں بوت …
همے رستری هم سرجمیں بلوچستان ءِ تها و هم سرجمیں کردستان ءِ تها بلوچ و کردانی هلاپ ءَ چه بلوچستان و کردستان ءِ زورگریں ملکانی نیمگ ءَ گوں رستری برجم و جاری ات . جنگ هم ماں فلسطین ، هم ماں کردستان و هم ماں بلوچستان ، هر جاه برجم ات و پروش ءِ نیمگ ءَ روان ات .
هما رستریانی انجام ات که 1980 ءِ دهیں سالانی تها کردستان ءَ جئنگ دگه نیمگے شت و کردستان ءِ جنین آدم و جنین زهگاں هم آزاتی ءِ واب ءَ دیست . کردستان ءِ جنین هم واب دیست که ماں کردستان ءِ تیهریں ماتکوهاں ، گوں توپک وتی پس و برات و جود و سنگتانی همراه ءَ په وتی ملک ءِ آزاتی و په وتی مردم و په وتی هر هَند ءِ آزاتی ءِ جنگ ءَ ، گروک ءِ داب ءَ درکپتگ انت و همے واب و واهگانی بنیات ءَ کردستانی کاڑانی تها مارشت و همتے ودی بوت که وتی براتانی و مردینانی هکوپگ ءَ روان به بنت … .
هما وابانی برکت ءَ کردانی جنین سرمچارانی رُمب ، مردین سرمچارانی همراهی ءَ چست بیان بوت انت و سرجمیں کُرد راج زانت و سرپد بوت که اے آزاتی ءِ جئنگ انت و آئی ءَ راج ءِ جنین و مردین همکوپگ بهر زیرگی انت .
1980 ءَ فلسطینیانی جنگ کمزور بوت ، ماتانی و پیرینانی واهگاں ، گوں آهانی چمانی ارس شتور گپت انت و هما ارس ءِ ترمپ ، هر روچ ڈوک بیت انت که کسان سالیں پنچ و شش سالی فلسطینی جَنئک و بَچَک آهاں زرت و گوں هماهاں ازرائیلیانی ٹانک و پئوج ءِ دیما باهند اش کرت و درکپت انت . هما ڈوکانی همراهی ءَ شپاں هم وپت انت و هما زهگاں وتی راج ءِ مراد و واهگاں که آزاتی ات ، گوں آهانی کُٹ ءِ ڈوکاں ، هر شپ واب ءَ گنداں بوت انت.
هر شپ وَش زباد و مهلبیں آزاتی ، پر برشکیں بچکندانی آزاتی ، وَش تاهیر و ایمنیں آزاتی ، وشدلیں ، پر زیمریں و دلکشیں آزاتی ، ازتانی آزاتی ، ملک ءِ آزاتی ، مهر ءِ آزاتی و زند ءِ آزاتی … ات که آهانی واب ءَ سینگار بندان ات …. آهاں وابانی تها ، گاریں و زوربر کتگیں آزاتی ءِ رند اتنت و همے گاریں آزاتی ءِ نشانی درآمدانی ٹانک و سلیهبند و بے رهمیں سپاهیگ ات که هر روچ گوں آهاں ڈیک وران ات و آهاں بیهار دیاں ، ترسیناں و کشان اتنت ، بلے آهانی جواب ڈوک ات ، هما کسانیں ڈوک که پنچ و شش سالی چکلک آئی ءَ پنچ و ده متر هِیرّ ( دَؤر ) دات کنت .
راج رُست انت ، سرپدیں راجانی واهگاں روژنا بیان بوت انت و ماں 1402 ءِ سال ءَ ما دیست که بلوچستان ءِ دزاپ ءَ بلوچ زهگ هر آدینگ و جمه ءِ روچ ءَ سینگ ءَ ایدگه مردمانی داب ءَ مردمکشیں و رستریں پاسدارانی دیما سپر کنان انت و گوں ڈوک آهانی تیرگوار و بلبلانی دیما رو انت . بے شک اے زهگاں ، وتی راج ءِ گاریں آزاتی ، وتی راج ءِ ازت و پهر ، وتی راج ءِ بیرک ءِ گواتو بیگ ءِ واب ءَ ماں سریمگیں بلوچستان ءِ هر لوگ ، هر کنڈ و هر تیاب ، هر کوه و پٹ ءَ ، ماں آزاتیں بلوچستان ءَ واب گندان انت و همیشان انت که وتی راج و وتی ملک ءِ واجهی ءَ پر وت و په وتی پدریچاں وتیگ کن انت .
همیشان انت که آهاں همت هست و روچے چو مرچیگیں رستگیں فلسطینیانی داب ءَ ، ڈوک ءَ گوں تیرگوار و بلبلانی زورگ ءَ مَٹ ءَ کن انت ، و زورگرانی دیما چو گرئند ءَ کپ انت و چو کوه ءَ اوشت انت .
آزاتی ءِ واب گران انت ، بلے الم ءَ هر همتے ، روچے پَچ پُلّیت و آزاتی ءِ مراد په هر جهدکار و با همتیں راجے هم سوبیں بیت !
