بلوچ تھریک ءِ نزوریانی سبب
ندکار: سنگت نود بلوچ
(ہمگام بلوچی نبشتانک)
بلوچ تھریک یا نیشنلزم ءِ بن هِشت یوسپ عزیز مگسی ءَ ایر کُت، بلے الله ءَ اُمر نہ دات، زمین چنڈا بیران بیت. یوسپ عزیزمگسی ءَ سردارے ءِ لُوگ ءَ چم پچ کت انت، بلے آئی ءَ سرداری نزام ءِ هلاس کنگ ءَ بلاهیں کردے ادا کت. واجہ مگسی ءِ بیرانی ءَ چہ پد واجہ شیرمهمد مری ءُ واجہ هیربکشءَ جوانیں کردیے پیلو کت، اے دوئیں سرْوک نواب ات انت ،بلے سردارءُ نوابانی دژمن ات انت. واجه هیربکش جُست کنگ بیت کہ لهتیں مردم شمارا سردار نواب لیک انت، واجہءَ پسّہ دات کہ اے نام مارا انگریزاں داتگ ما اگاں سرداری کتیں مسلم لیگ یا دگہ حکومتی پارٹی آں اِتیں، وزیراعلیٰ یا دگہ مراھتانی واهند اتیں، بلے ما بلوچ اِنتِ، پدا گلام اِنت شهید فدا احمد ءَ نیشنلزم ءِ جهد دیما بُرت، مند سورو ءَ جلسہ ءَ شهیدءَ تران کنانءَ گوشت هرچی کہ سردار انت گوں سرکارءَ گون انت، مارا سۓ سردار گون کہ سردار نہ اَنت، گلام انت، مارا ایشانی سرا پهرانت. فدا احمد ءِ شهادتءَپد گچین کاری بیتاں چونکہ شہید فدا احمد گچین کاریانی هکءَ نہ اَت گڈا مڈل کلاس والا آں بهر زرت بلوچستان نیشنل الائنس ٹهینت. نواب بگٹی، اختر مینگل ءُ ڈاکٹر حئ نام نهاد مڈل کلاس گچین کاریاں سوبین بیتاں ءُ نواب بگٹی وزیراعلیٰ کنگ بوت. اے اتھاد ءَ چہ ھِچ رانگیں آسرے درنیاتک ، پروشت ءُ پروش بیت. ما هما وهد ءَ همے مڈل کلاساں هوارتیں گڈا من یک روچے مڈل کلاسءِ یک زانتکارے، منصور سال محمد بالیچاهی بی ایس او ءِ نائب سدر، جست کت اتحاد چون بیت؟ پسہ دات ئے کہ سردار نہ دیما بنت نہ ُپشت ءَ، شہید فداءِ پکر ایشاں گار کت. گڈا واجہ گلام محمد ءَ شهید فداءِ پکر زندگ داشت، وتی راه جتا کت، بلوچ نیشنل مومنٹ جوڈ کت کہ ما هوٹ ءُ الیکشن گچین کاریاں بهر نہ زیریں کہ مئے گلامی مهکم بیت. جهد گوں تیزیں گاماں دیما شُت، شهید بالاچ، گلام محمد، هیربکش ، هیربیار ءُ دگہ سنگتاں بلوچ لبریشن آرمی ءِ نام ءَ سلاه بندیں گلے ٹهینت کہ آئی ءِ کماندار بالاچ مری ءُ ڈنی کارانی واست ءَ هیربیار گچین کنگ بوت، واجہ گلام مھمد ءَ سیاسی میدانءَ کار کت. اے جهدباز دیما شت. دیم ترا نواب اکبرهان کوهءَ روت ،چیزے وهدا پد شهید کنگ بیت. سلاه بندیں گلءَ درست هوار اتاں بالاچ، برهمدگ، غلام محمد درست تپاک ات انت. چدو پد سنگت بالاچ شهید بیت ءُ رند تِر ءَ واجہ غلام محمد شهید بیت، مهلوک درهیں گوں جهدءَ همگرنچ بیت. اے وھد ءَ بی این ایم ءِ سرکماش عصاءظفر اَت، کہ شهید غلام محمد ءِ چهلمءَ بلاهیں مراگشے برجاه دارگ بیت کہ اے مراگشءَ عصاءظفر ،خلیل بلوچ ،وهاب بلوچ، ودود رئیسانی، نائله قادری ءُ بی ایس او زاد ءِ ذاکر مجید ءَ تران کت، اے تلو ءِ سرا بی ایل اے ءِ ناره جنگ بیت. اے وهد 2009 اَت، دیر نہ گْوست، (بی این ایم ءِ کانودی سربراه عصاءظفر ات)، اے کابینہ هلاس کنگ بیت نوکیں کمیٹیءِ ٹهینگ بوت ءُ خلیل دیما آرگ بوت. خلیل ءِ دیما آیاگ ءَ پد عصاء گوں چیزے سنگتاں زهرکنت. کامریڈ مولداد عصاء ظفر قاضی ریحان ءُ گلام هسین درکپنت ءُ بی این ایم شهید غلام محمد ءِ نام ءِ سرا دگہ پارٹی یے ءِ جار جنگ بیت، چیزے وهدءَ پد اے پارٹی وتءَ داشت نہ کنت گار ءُ بیگواه بیت، بی این ایم خلیل ءَ وت ءَ بی ایل ایپ ءِ ساهگءَ داشت، همے وڈ ءَ بی ایس او ءَ وت ءَ چہ ایدگہ گلاں دیر داشت، حیر بیار ءِ ڈن ءَ موجودگیءَ باوجود بی ایس او ءَ پہ وت ءَ ڈنءَ مردم راہ دات ،چمداں چہ دوری، بے بیسہ یے بِنا بوت، الزام جنوکائی ءِ جنگ بندات بوت. پروپگنڈاءِ بندات چہ استاد اسلمءَ بوت کہ آئی ءَ وتی پروپگنڈانی اولی آرٹیکل نبشتہ کت، گڈا پدا هر کسءَ ڈُهل بڈا کت. من یک روچ یے ڈاکٹر منان جان ءِ دیوانءَ نندوک اتاں مناں بی ایل اے ءِ سنگتے ءَ پون کت ءُ شهید کمبر قاضی ءِ مسلہ ءِ سرا گپ ئے جت، آئی ءَ الزام جت کہ کمبر شما جتگ. ڈاکٹرءَ مناں جست کت، چے گوشیت؟ من همے پسہ دات کہ اے وڈا گوشگاانت گڈا ڈاکٹرءَ مناں مکن کت کہ شما وتی دپءَ بدارات من وت گوں بشیر زیبءَ گپ کناں. وهدیکہ بی این ایم ءِ سیشن بیت ما کونسلر اتیں، بهر زرت، سیشن ءِ مراگشءَ واجہ خلیل ءَ هیربیار ءِ سرا ملٹی نیشنل کپمنیانی بیپاری ءِ بهتام جت، ما هیران بیتیں پرچاکہ مارا چوشیں مالومات نیست اَت. وهدیکہ بی ایل اے ءُ یو بی اے ءِ مسلہ بیتاں بی این ایم ءُ بی ایل ایپ ءَ پیسلہ کت کہ آ یو بی اے ءِ پلّہ مرزی ءَ کن انت. ھمے پیما وهد گوْزان ءُ روان اَت استاد اسلم ءُ بشیر زیب چہ بی ایل اے ءَ معطل کنگ بوت انت. پدا اسلم ءُ بشیر زیب ءَ بی ایل اے ءِ نام ءِ سرا گوں بی ایل ایف ءَ اتھاد کت ءُ رند ترا اِشانی یو بی اے ءِ گوما نذیکی بوت. ھمے نیام ءَ استاد کمبر ءَ وتی یک سرگوْست یے نبشتہ کُت کہ ” مارا گوں سرداراں دیر ِانت اختلاپ بیتگ، ما ادارهانی منوگر بیتگیںءُ اے مردماں ادارہ نہ منتگ پمشکہ ما وتی راه جتا کتگ.” بلے2009ءَ شُما گوں ایشاں تپاک کتگ، شُمے مدّت ءُ کمک سنگت هیربیار ءَ کتگ، آ وھد ءَ ادارہ پرچہ یاد نیاتک اَنت، ؟شما شهیدءِ چهلم ءَ تلو ءِ سرا بی ایل اے ءِ ناراہ جت ، نی سرداری، تمنداری، ملٹی نیشنل کمپنی آنی سودابازیءِ بھتام ؟ اَنو هیربیار ءَ جار جت گوشت کہ بیااِت دیم پہ دیم نِندایں، سبوت بکن اِت اگاں من چوشیں کارے کتگ من قومءِ مجرماں، بلے کس پہ نندگ ءَ ساڑی نہ اِنتَ، بس سردار، نواب، مڈل کلاس، تهرڈ کلاس ، هائی کلاس، اگاں سردارے بہ بیت یا بزگرے درْست گلام اَنت، همے زمینءِ واهند انت، گڈا پرچی همراهداری ءُ یک مُشتی نیست ؟ بس هما زِد اَنا پرستی، بے بیسائی ءُ کُنّت دِگہ ھِچ. اگاں مکسد بلوچستان ءُ بلوچ ءِ آجوئی انت گڈا مارا درستاں بائد وتی زات، انا ، زد ءُ کنت ءَ چہ سرگوزگی انت، مڈل کلاس ءُ سرداری ءِ پرک هلاس کنگی انت بلوچ ءِ سرا قبضہ ءِ هلاس کنگ ءِ ھاترا هور ءُ تپاک بئیگی انت .
