سوراب (ہمگام حال) گْوادر ءَ بلوچ راجی مُچّی ءُ پدا بازیں دمگاں نندانکاں پد بی وائی سی ءِ کاروان تُربَت، پَنجگُور، گریشہ ءُ بسیمہ ءَ چِہ سوراب ءَ سربوت، کہ اودا فٹبال اسٹیڈیم ءَ راجی مچی ءِ واستہ پُرسنامہی مراگش ءَ راجی سوگند ءِ دیوانے برجم دارگ بوت۔ چد ءُ پیسر گدر ءُ سوراب ءِ بازیں جاگہاں بی وائی سی کاروان ءِ مزنیں کساسے ءَ مردماں شریں وڑے ءَ وش اتک کت ءُ مزنیں جلسہے ءِ شکل ءَ فٹبال اسٹیڈیم ءَ سرکت۔
ہزارانی کساس ءَ بہر زرتگیں بلوچ مہلوک ءِ دیم ءَ بی وائی سی ءِ سروک ڈاکٹر ماہ رنگ بلوچ، صبغت اللہ شاہ جی ، فرزانہ رودینی، ماہ زیب بلوچ، ڈاکٹر واحد بلوچ ءُ دگہ رہشوناں گشتانک دات۔ وہدیکہ ڈاکٹر ماہ رنگ بلوچ ءَ چہ مُچّی ءَ راجی سوگند زرت۔
سوراب ءَ برجم داشتگیں پرسنامہی مراگش ءُ راجی سوگند ءِ مُچی ءَ گوں تران کنان ءَ ڈاکٹر ماہ رنگ بلوچ صبغت اللہ شاہ جی ءُ دگہ رہشوناں گشت زوراک ءُ زورآوریں حاکم بلوچستان ءِ گواجنانی لُٹ ءُ پُل ءِ واستہ وڑ وڑیں پندل سازگ ءَ اَنت۔
بلوچ وتن ءِ سرا کسّ ءَ سوداگری کنئگ ءَ نیلیں۔بلوچاں تیر ءُ تپنگ ءِ زور ءَ ترسینگ نہ بیت۔ نوں وہد اتکگ کہ بلوچ راج وتی سرا بوتگیں زوراکی ءُ زیردستی ءِ ہلاپ ءَ یکجائی ءَ پاد اتکگ ہمے واستہ کہ وابیں راجانی نصیب ءَ مدامی گلامی بیتیں۔ ما گلامی ءَ ہچ وڑا نہ منّیں۔
بدبہتی ءَ بلوچ ءِ کُشگ ءَ بلوچ ہوار انت کہ ڈیتھ اسکواڑ گشگ بنت ءُ ہمے ڈیتھ اسکواڑ ٹولی ءَ بلوچستان ءِ کُنڈ کُنڈ ءَ سرگرم کنئگ بوتگ ءُ اے شرم ءِ گپ انت کہ ہمے ٹولی وتی بلوچانی براتانی کُشگ ءَ ہوار اَنت۔
بلوچ یکجہتی کمیٹی بلوچ راج ءِ رکّینگ ءِ واستہ میدان ءَ درکپتگ ءُ ما وتی کوپگاں یک مزنیں زمہ واری ے زرتگ۔ اے برجائیں جنز ءِ دارگ ءِ واستہ وڑ وڑیں پندل سازگ بؤگا انت بلئے اے وتی پندلاں سوبین نہ بنت ءُ اے جنز کدی نہ اوشتیت۔
گڈسر ءَ دیوان ہلاس بوت ءُ دیم پہ منگچر ءَ رھادگ بوت۔
