بوسان (ھمگام نیوز) زرباری کوریا ۔ بلوچ راجی زْرمبشت ( بی این ایم ) زرباری کوریا تک ءَ بلوچستان ءِ شھر گوادر ءِ ٹٹ ءَ کنگ ءِ بگیری ءَ بوسان اسٹیشن ءِ دیم ءَ زھرشانی کرتگ۔زھرشانی کنوکاں جرنبشت ءُ کاگد گون اَت ، آیانی سر ءَ ٹٹ جنگ ءِ کشانکی ئیں سانانی بارہ ءَ نبشتہ اَت۔
چہ بی این ایم ءِ نیمگ ءَ گْوشگ بیتگ کہ چہ ٹٹ جنگ ءَ بومی ئیں مردمانی کار ءُ روزگار ءُ زندگیاں ءَ تاوان رس ایت۔
زھرشانی ءِ مول بلوچستان ءَ زور بیگواھی ءُ مردمی اگبالانی دگہ بگیریاں سانمند بیتگیں مردمانی جاور ءِ نیمگ ءَ دلگوش پرینگ اَت۔زھرشانی کنوکاں گْوشتگ ، ٹٹ جنگ ءِ کار بومی ئیں مردمانی اگبالانی بگیری ءُ ڈنی بائیوارانی سیت اِنت۔
گوں زھرشانی کنوکاں تْران کنان آگا پیز ءَ گْوشتگ ، مروچی ما چہ بلوچ راجی زْرمبشت ( بی این ایم ) ءِ گْوشگ ءَ چہ پاکستان ءِ نیمگ ءَ ٹٹ جنگ ءُ گوادر ءِ نندوکاں زندانی کنگ ءِ کوشستانی بگیری ءَ اد ءَ مچ بیتگ ایں۔ما چہ بلوچ نامیں راجے ءِ سیادی دار ایں کہ پاکستان ءَ زیردست کرتگ۔مئے مردماں پاکستانی لشکری ھم روچ کش اَنت ءُ آوار جن اَنت۔ ما نام گپتیں اسلامی مھترھند پاکستان ءِ زیردستی ءَ نہ من ایت۔
زھرشانی کنوکانی گْوشگ اَت کہ گوادر ءَ ٹٹ جنگ چین پاکستانی گزرانکی راھداری ءِ شور ءِ بھر اِنت ، آیاں اے کار نوک آبادی شورے لیک اتگ کہ ایشی ءِ من گوادر ءَ چین ءِ دست ءَ دیگ اِنت۔
آیاں گْوشتگ چہ سی پیک ءِ بندات ءَ پد گوادر ءِ نندوکیں مردماں چہ آیانی پت ءُ پیرکی سرزمین ءَ در کنگ ءَ ترس ءُ آزار ءِ دیمپانی اِنت۔
چہ ایشی ءَ پیش گوادر لشکری بنجل ءُ پانگساں انگر کرتگ ۔ نی سرجمیں شھر ٹٹ کنگ ءَ بیگ ءَ اِنت ، ھمے رد ءَ زھرشانی کنوکانی گْوشگ اَت اے راجانی سنت ءِ مردمی اگبالانی جار ءِ مزنیں رنگے ءَ بگیری ءَ اِنت۔ زھرشانی ءِ میان ءَ سدانی کچ ءِ پنتاک بھر کنگ بیتگ، کہ آیانی تہ ءَ گوادر ءِ مردمانی سر ءَ ٹٹ جنگ ءِ سان ، چہ لشکری گر ءُ دار ءِ تہ ءَ گیشی ءِ پد ءَ آیانی دل ءَ ترس ءِ گیش بیگ ءِ بارہ ءَ گْوشگ بیتگ۔
