ماھرنگ ماھرنگ بوت کنت بلے آ راج ءِ شھیدیں لُمّہ بانک کریمہ بوت نہ کنت!
نبشتہ کار: گل ھسن بلوچ
ہمگام بلوچی
چُشکہ دگنیا ءِ تہ ءَ ھزاراں چُشیں کردار ھست کہ آیاں وتی زندگی ءِ ھر وشی ءُ آسراتی پہ زمین ءُ راج ءِ آجوئی ءَ ندر کُتگ انت ءُ مرچی ھم کنگ ءَ انت. گُڑا راجی نمیرانیں رھشُون شھید بانک کریمہ ھم گوں ھما لڑ ءَ ھوار اِنت کہ آئی ءَ وتی ھر آسراتی پہ بلوچ ءُ بلوچستان ءَ کربان کُتگ۔ مرچی ھر بلوچ شھید کریمہ ءِ سر ءَ ناز کنت کہ آ یک سیاسی رھشُونے بوتگ، بلوچ راج ءَ ھوار دگنیا ءِ آ دگہ راج ھم آئی ءَ را سیاسی رھشُونے سرپد بوتگ انت داں مرچی آئی ءِ واست ءَ پُرسیگ اَنت۔
شھید کریمہ بلوچ ھما بلوچ شیرزال بوتگ کہ آ وھد ءَ زالبول ءَ را سیاسی پڑ ءَ یک میارے سرپد بوتگ انت ءُ مرچی ھما گل برابری ءِ گپ ءَ کن انت کہ آیاں 2005 ءَ بانُک ءَ را باسکی نہ داتگ گڑا آ بانُک کریمہ بلوچ اَت کہ وت ءَ را منّارینت کہ راستی ءَ زالبُول راجکاری کُت کنت انچْوشکہ راجانی دیمروئی ءَ زالبُول ءِ کِرد اَلمی انت۔ کریمہ بلوچ چاگِرد ءِ اولی زالبول اِنت کہ آ گلے ءِ سروک بیتگ ءُ بلوچ زالبولانی راجکاری ءِ بُنھشت ئِے ایر کُت.
شھید بانک کریم بلوچ ءَ ھر وڑیں تکانسری برداشت کُت اَنت ءُ ھما چاگِرد ءِ تہ ءَ راجکاری ءِ بنُھِشت ئِے ایر کُت کہ اود ءَ مزھبی مردم زالبُول ءِ واست ءَ وت یک ریاستے جوڑ بنت ءُ کریمہ بلوچ ھر وڑیں اڑ ءُ جنجالانی دیمپانی کُتگ ءُ وت ءَ را مناراینتگ کہ راستی ما ھم انسان ایں ءُ مئے ھم ھک بیت کہ ما چاگِرد ءُ راج ءِ دیمروئی ءِ واست ءَ ھر پڑ ءَ گوں مرداں ھوار کار کت کن ایں۔
گپ کیت اِنت ماھرنگ ءِ سر ءَ کہ ماھرنگ کریمہ بوت کنت یا اِنّا ؟ ءُ لَھتیں سنگت اے ھم گْوش اَنت ماھرنگ چہ کریمہ ءَ دیم ءَ تر انت ءُ ماھرنگ میڈیا پیس کُت کنت! ماھرنگ آیوکیں وھد ءَ بلوچ راج ءِ تہ ءَ شریں دیمروئی آؤرت کُت کنت!
بلے من اے گپ ءَ گوں تپاک نہ دار آں کہ ماھرنگ چہ بانُک ءَ گیشترّ کار کُت کنت یا بانُک ءَ چہ گیش بلوچ راج ءُ بلوچ زالبوالانی تہ ءَ دیمروئی آؤرت کُت کنت۔ شھیدیں لُمّہ بانک کریمہ یک بلاھیں پَندے بُرّ اِتگ، آئی ءَ وتی یک بلاھیں اُمرے گْوازینتگ ءُ اِے اُگدہءِ سر ءَ اھتگ ءُ رستگ، آئی ءَ را اِے اگدہ پہ ٹیکی (تحفہ) نہ رَستگ، بلکیں آ وتی جُھد ءُ کربانی آنی بدولت ءَ ءُ بلوچستان ءِ کُنڈ کُنڈ ءَ راجی سِنچ ءُ زانت ءِ ودی کنگ ءَ چہ پد اِے نام آئی ءَ را رَستگ۔ بانک لُمّہ ھما زال بُوتگ کہ آ دری ملکاں ھم شتگ بلے تمپ ءُ بلوچستان ئِے بیھال نہ کرتگ اَنت۔ آئی ھما دری ملکاں ھم گْوں بلوچی دوچْیں پُچّ ءُ پْوشاکاں بُوتگ۔
البت ھو ماھرنگ وَ ماھرنگ بوت کنت بلے ماھرنگ کریمہ بوت نہ کنت! ماھرنگ وتی زانت ءِ ھساب ءَ راجکاری کنگ ءَ انت۔ یک گپے تچک انت کہ راجانی دیمروئی راجمانی رسانکدر ءَ دو سَئے ھزار پالوارے بوُگ راجاں ءَ دیمروئی نہ دنت۔ رسانکدر ءَ آیگ ءُ چار تْرُندناکیں لبز در کنگ ءُ چار ورناہ جزباتی کنگ ءَ راج دیمروئی نہ کن انت۔ راجانی دیمروئی ءِ واست ءَ سیاسی زانت ءُ سَسّا لوٹی ایت۔ رسانکدر ءَ ھوار گراؤنڈ ءَ ھم ورناھانی تہ ءَ راجکاری ءِ زانت ءُ سسّا پیدگ کنگی انت۔ بلے کُجام روچ ءَ ماھرنگ اتکگ ورناھاں سیاسی سرکلّ ئِے داتگ؟؟؟ کہ چہ آئی ءَ ورناہ جزبگ ءِ بنیات ءَ گوں راجکاری ءَ ھوار بہ بنت۔
ھو اے گپ وَ ھست آ یک شھیدے ءِ زھگ انت، آئی ءَ وتی پت ءِ برگ ءَ درکسانی ءَ چہ آئی درد دیستگ ءُ پت ءِ جُتائی وت یک بلاھیں دردے۔ پد ءَ بْرات ئِے برگ ءَ مُشکلات آئی دیستگ۔ بہ گِند ئے اگاں ما پہ پت ءُ بْراتانی کربانی ءَ دگہ کول ءِ مردماں رھشُون بکن اَیں گڑا مارا ءُ پاکستانی سیاست ءَ را ھچ پرک ءُ تِپاوت نہ بیت۔ پت ءِ کربانی وتی جاگہ ءَ زھگ ءِ وتی جاگہ ءَ!
اگاں پِتانی کربانی چارگ بہ بیت ءُ پد ءَ رند ءَ در پہ دریاں بچار ایں سمّی ءُ مھلب مرچی ما رھشُون بہ کُتیں ۔۔۔۔ پرچی ءَ کہ ما یک انچیں راجے ءَ گوں بندوک ایں کہ اود ءَ ھرگس پُرسیگ انت ءُ ماھرنگ ءَ چہ گیش دگہ ھم باز ھَنداں بازیں جَنکّانی پِتاں کربانی داتگ ۔۔۔
اگاں بانُک کریمہ بلوچ ءِ زند ءَ چار ئے آئی بلوچستان ءِ ھر دمک ءُ دراں آئی وتی پیگام سر کُتگ۔ بلوچستان ءِ گدان گدان ءَ آ شُتگ پیر ءُ کماش زھگ ءُ زالبُولاں گوں دیوان ئِے کُتگ۔ آئی ءَ بلوچی راجی آجوئی ءِ بابت ءَ بلوچ ورناھانی تہ ءَ انچیں زانت ءُ سَسا پیدا کُتگ آ ھر وڑیں کربانی دیگ ءَ پہ راج ءَ چک ءُ پد نہ بوتگ انت۔
نی زاناں ماھرنگ مرچی ھمنچوک ورناہ پہ بلوچ راج ءَ تیار کتگ ؟ یاں کہ باندات ءَ تیار کُت کنت ؟
نی زاناں ماھرنگ مرچی وتی توار ءَ بلوچستان ءِ کُنڈ کنُڈ ءُ گدان گدان ءَ سر کُت کنت؟
نی زاناں ماھرنگ مرچی ھما سرکلّاں وتی ورناھاں دات کُت کنت زیکیں روچ ءَ بانُک کریمہ بلوچ ءَ داتگ انت ؟
نی زاناں ماھرنگ ءِ تہ ءَ ھما رھشُونی سسا ءُ زانت ھست؟ نی زاناں ماھرنگ مرچی یک گلے ءَ را ھما وڑ دیم ءَ بُرت کُت کنت زیکیں روچ ءَ راجی رھشُون بانُک ءَ کُتگ؟
زیک بانُک کریمہ بلوچ ءَ گل چہ اڑ ءُ اڑانداں رکینتگ، زاناں مرچی ماھرنگ ءِ تہ ءَ ھما زانت ءُ سرپدی ھست کہ یک گلے لیڈ بکنت؟
نی زاناں ماھرنگ ءِ تہ ءَ ھما برداشت ھست انت زیک بانُک ءِ تہ ءَ بوتگ اَنت؟
زیکیں روچ ءَ چنچو مشکلات بوتگ پہ گل ءِ دارگ ءِ واست ءَ مرچی آ نیست انت۔ زیکیں روچ ءَ زالبُول ءِ راجکاری ءَ را یک ایبے سرپد بوتگ انت بہ گِند ئے مرچی نیست۔
زیکیں روچ ءَ زالبول ءَ را گس ءَ درکپگ ءَ نیشتگ مرچی اِے جْیڑہ نیست انت۔
من گْوش آں آ راجی رھشُون کریمہ ءِ وڑیں زال بوتگ انت کہ یک کْوھنگ پرستیں چاگِرد ءِ را آؤرتگ یک اھدے ءَ تیار کُتگ آ گیشتر دیم ءَ برگی انت ۔
یک چاگِردے جوڑ کنگ ءُ جُنزینگ ءِ تہ ءَ سک باز پرک ھست.
