ایمسٹرڈیم(ہمگام نیوز ) بلوچ راجی زْرمبشت ( بی این ایم ) ءَ ماں بلوچستان ءَ پاکستان ءِ جوھری سلاھانی چکاسانی بگیری ءَ زھرشانی کرتگ ءُ روانکے کش اتگ۔
روانک ءِ بھرزیروکاں کاگد ءُ جر نبشت گون اَت کہ آیانی سر ءَ پاکستان ءِ جوھری سلاھانی چکاس ، بلوچ ءِ چکچینی ءُ 28 مئی 1998 ءَ چاگے ءَ پاکستانی جوھری تْراکانی بگیری ءَ اوگام نبشتگ اَت۔
گوں زھرشانی کنوکاں گپ جنان بی این ایم ءِ باسک ڈاکٹر لتیپ ءَ گْوشتگ 28 مئی پہ بلوچستان ءُ بلوچ راج ءَ سیاھیں روچے، چہ پاکستان ءِ نیمگ ءَ چاگے ءَ بیتگیں جوھری چکاس بلوچ چکچینی ءِ دْرچے ، بلوچستان ءَ جوھری چکاساں نا ایوک ءَ
اگواز ( ماحولیات ) بلکیں مردمانی جانْدراھی ھم سانمند بیتگ اَنت۔دمگ ءَ شیمک ، پوست ، پپ ءُ جگرانی نادْراھی ، ٹائیپائڈ ءُ دگہ نادْراھی تالان بیتگ اَنت۔
آئی ءَ گْوشتگ مئے زھرشانی ءِ من بلوچستان ءَ جوھری چکاسانی تاواناں میان استمانی تک ءَ سھرا کنگ اِنت۔
آئی ءِ گْوشگ اَت کہ پاکستان ءَ دگہ ڈیھ ھم جوھری توان جوڑ بیگ ءَ کمک کرتگ ءُ جھان ءِ رستگاری ترس ءِ دیمپان کرتگ۔
بلوچ راجی زْرمبشت ( بی این ایم ) ءِ باسک آلیہ ءَ گْوشتگ جوھری تْراکانی پد ءَ ودی بیوکیں تابکاری ءُ زمین ءِ چیر ءِ لیگارانی برپشت ءَ کشت ءُ کشار نہ بیگ ءِ وڑ ءَ اِنت۔پاکستان ءَ چہ بندات ءَ بلوچ چکچینی ءِ شوندات زرتگ ءُ جزان اِنت۔میان استمان پاکستان ءِ بگیری ءَ ترند ءُ پاداریں گامگیج چست بہ کنت داں دگہ ڈیھے چوشیں ترسناکیں چکاس کنگ ءِ ھمت مہ کنت۔
ماھرہ ءَ گوں زھرشانی ءَ ھوار بیتگیں مردماں گپ جنان ءَ گْوشتگ پاکستان ءَ چاگے ءَ جوھری تْراک کرتگ ءُ وت ءَ جھان ءِ دیم ءَ توانمند پیش داشتگ بلے گوں ھمے کار ءَ چاگے ءِ نندوک تاوان داتگ اَنت ، اگوازی لیگار ( ماحولیاتی آلودگی) ءُ تابکاریاں ودی بیوکیں نادراھیانی پد ءَ آ اود ءِ نندوکاں لڈ اتگ۔
زھرہ ءَ گْوشتگ بلوچ راج پاکستانی مھترھند ءِ دست ءَ گْوستگیں بازیں دھکاں زوراکی ءِ آماچ اِنت۔ چاگے ءَ جوھری تْراکانی پد ءَ آنگْور ءِ نندوک سک باز تاوانبار بیتگ اَنت۔ آ اود ءَ بیوکیں چکانی تہ ءَ شیمک ءُ دست ءُ پادانی منڈ ءُ لنگ بیگ باز اِنت۔
آئی ءَ گْوشتگ پاکستان چہ ھچ چیز ءَ نہ ترس ایت پرچا کہ گوں بلوچستان ءَ ھرچی بہ کنت آ بھ جست گرگ نہ بیت ، اے گپ پہ جھان ءَ جستے ودی کنت۔
باست ءَ گْوشتگ چاگے ءُ بلوچستان ءِ دگہ ھنداں پاکستان ءِ جوھری سلاھانی چکاس ءِ سر ءَ میان استمان ءِ بے تواری ءُ کنٹ مارشتی وتی تانسر ءَ اِنت۔بلوچستان پاکستان ءَ چکاسجاھے جوڑ کرتگ بلوچستان ءَ مروچی ھم جوھری سلاہ ءُ جوھری موشکانی چکاس بیت ، پاکستان ءِ جوھری سلاہ جوڑ کنگ ءِ ھلاھوش پہ جھان ءِ ایمنی ءَ ترسے جوڑ بیت کنت۔
