جمیل مھراب
ھمگام نبشتانک
مرچی دنیا کہ دیمروئی ءُ نوکیں کتہ کاری کنان ءُ آسوگیں زندے گوازینگ ءَ انت گڑا بلوچ تنیگا اے نزانت کہ وتی دو وھد ءِ نان ءَ چون ءُ کجا دربگیج ایت۔ بلوچ مرچی انچو تنگ دست کنگ بیتگ کہ آئی ءِ دراھیں جیڑگ ءِ در بند انت آ ساھتے نشت ءُ اے جیڑ ات اوں نہ کنت کہ مرچگیں اے بزگی ءُ تنگدستی پہ آئی ءَ کے ءَ آورتگ ءُ اے جاورال ءِ در کپگ ءُ شریں زندے ءِ توجیل چے انت۔
چوناھا مرگ ءُ زندمان ءِ تہ ءَ گیشتر مردماں زندمان گچین کتگ ھمے واستا زندگیں مردم داں وتی گڈی ساہ ءَ دست ءُ پادے جنت وتی روچاں تیلانک دیان کنت بلے بلوچ مرچی بے آسراتی ءَ وتی ھساب ءَ وتارا زندگ دارگ ءِ جھد ءَ انت گڑا استان ءَ آئی ءِ زندمان ءِ دراھیں در بند کتگ انت۔ استان جاھے بلوچ ءَ چست کنت ءُ آئی ءِ جون ءَ گیاباں دور دنت جاھے ءَ آئی ءَ سالانی سال تھاریں کوٹیاں بند کنت ءُ پد آئی ءِ مردماں ارس ءِ ریچگ ءِ اوں اجازت نہ دنت۔ استان جاھے بلوچ پہ ءَ شد کشگ ءَ انت جاھے ءَ آئی ءَ چہ علم ءُ شعور ءَ زبھر کنگ ءَ انت ءُ آئی ءِ روزگار ءِ دراھیں درانی بند کنگ ءِ وڑ وڑیں توجیل سازگ ءَ انت۔ اے استان بلوچ ءَ وتی جتائیں پجار ءُ زبان ءَ اوں زندگی ءِ اجازت نہ دنت بلکیں استان ھما بلوچ ءَ شرپ دنت کہ ھمے سرمایہ داریں نظام ءِ منوگر بہ بیت ءُ لس بلوچ ءِ ریپینگ ءُ آئی ءِ گار کنگ ءَ کمک بہ کنت۔ ھما بلوچ کہ گچینکاری ءِ نام ءَ وتا بلوچ ءِ دوزواہ گوشگ ءَ انت آھاں پیسر ءَ پہ بلوچ ءَ چے کتگ؟ ھمے بلوچاں کہ کلدارے نہ بیتگ وھدے کہ پارلیمنٹ ءَ شتگ انت دنیا ءِ زر یکجاہ کتگ انت ءُ لس بلوچ مرچی نیزگار بیان انت پرچا ؟ بایدیں لس بلوچ ھمے وزیراں اے جست بہ کنت کہ شما سیر ما گریب پرچا بیتگ ایں؟
پرچا کہ جمہوریت بایدیں دراھیں مردماں یک وڑ ءَ ازگار یا نیزگار جوڑ بہ کنت۔
لینن گشیت۔
“سرمایہ دارانہ چاگرد ءِ جمہوریت ھما لنگ ءُ منڈ، کواپگ ءُ دروگ انت۔ اے انچیں جمہوریتے آ بس مالدارانی ءُ کموک مردمانی واستا انت”
بلوچ بایدیں نوں بزانت کہ اے جمہوریتے نہ ئے بلکیں جمہوریت ءِ نام ءَ یک سرمایہ دارانہ نظامے اود ءَ بلوچ ءَ وتی ھچبر زندمان ءِ ھک نرس انت اگاں آ انگت رد وارت گڑا دگہ لھتے سال وتی بزگی ءُ تنگدستی ءَ گیش کنت۔ لینن گشیت جمہوریت ایشی ءَ گوش انت۔
“جتائیں راج پہ وتی آسراتی ءَ ،آجو ءُ آسوگیں داب ءَ گوں یک دومیگ ءَ یکجاہ ھوار زند گوازین انت یا وھدے آ،سرپد بہ بنت ما جتا بیں وتی استان جوڑ کنیں۔ ھمے چیز ءِ واستا سرجمیں جمہوریت پکار انت”
اے جمہوریت ءَ 74 سال انت پہ بلوچ ءَ زندمان ءِ دراھیں درانی بند کنگ ءَ بید دگہ ھچ نہ داتگ گڑا ھمے نظام ءِ انوگیں گچینکاری پہ آئی ءَ کجام آسودگی کاریت۔ نوں بایدیں بلوچ وتی گلامیں زھن ءَ در بہ کپ ایت وتی ھمک ھکانی پد جنئگ ءَ اے نظام ءِ بگیر ءَ در بہ کپ ایت۔ نوں بلوچ ءَ اے جست وتا الم کنگی انت کہ آ پرچا نیزگار انت ؟
*********
