لندن (ھمگام نیوز) بلوچ راجی رھشون واجہ ھیربیار مری ءِ گْوشتانک کہ آئی ءَ 30 تومشان ءَ آجوئی بلوچستان جنز (ایف بی ایم) ءِ نیمگ ءَ زاھدان ءِ شھمیرانی سالروچ ءِ درگت ءَ برجم داشتگیں مراگش ءِ تہ ءَ وتی ھیال درشان کرتگ اَنت۔ راجی رھشون واجہ ھیربیار مری ءَ تران کنان ءَ گْوشت کہ یک سالے ءَ پیسر، مرچیگیں روچ ءَ کبزہ گیریں ایران ءِ لشکر ءَ ایران ءِ ایردستیں بلوچستان ءِ بُنجاھی شَھر زاھدان ءِ تہ ءَ پرایمنیں زھرشانی کنوکانی سر ءَ تیرگواری کرت چہ ایشی ءِ سوب ءَ کسانیں ساھتے ءِ تہ ءَ سد ءَ چہ گیش مردم بیران بوت، مئے بلوچانی واست ءَ اِے دگہ یک ترانگْیجے اَت کہ وھدے بلوچ انساپ، آجوئی ءُ راجمستری ءِ واست توار بُرز کنگ ءِ جھد ءَ کن اَنت گُڑا آ کُشگ بہ اَنت ءُ بے توار کنگ بہ اَنت۔ ھما گپ کہ آئی ءَ را بلوچ ءِ دژمن (ایران ءُ پاکستان) شمشوشگ ءَ اَنت، آ ایش اِنت کہ راج چہ لشکری زوراکی ءُ تاگت ءِ کارمرز کنگ ءَ ایردست بوت کرت نہ کن اَنت ءُ نہ کہ ایردست بہ اَنت، آیانی تُپنگ ءُ بمب مارا جَت کرت کن اَنت بلے آ مئے توار ءَ پہ مُدامی بے توار کرت نہ کن اَنت۔ زاھدان ءِ تہ ءِ کشت ءُ کوش کہ آئی ءَ را “ھون چکیں آدینگ (Bloody Friday)“ گْوشگ بیت، آئی ءَ بلوچ ءَ را یکبرے پد ءَ پاد کرت، چہ ایشی ءَ پد زھرشانی ءُ کرس ءِ درچ یکشل ءَ برجاہ اِنت۔
ایران ءِ ایردستیں بلوچ ورنا اِے گپ ءِ راستی ءَ پھمگ ءَ اَنت کہ ایران کدی ھم بلوچاناں پارسی آنی پیم برابری ءُ یکیں چمّ ءَ نہ چار اِیت۔ بلوچ اِے گپ ءَ ھم پھمگ ءُ زانگ ءَ اَنت کہ کجام مردم بلوچ راجی جُست ءَ را وَپاک یاںکہ ربیت ءِ مَٹّی ءُ بدلی ءِ لْوٹ ءَ گْوں ھمگرنچ کنگ ءَ اَنت گُڑا دژمن ءِ دستانی لیبوک اَنت۔ ھمے پَھمگ ءُ سرپدی ءِ سوب اِنت کہ”نا شاہ ءُ نہ شْیک مئے دوزواہ اَنت“بلوچ ءِ اسل اوگام جْوڑ بوتگ۔
پاکستان ءُ ایران 1970 ءِ دھک ءَ چہ بلوچ راجی آجوئی ءِ جُنز ءِ بگیری ءَ کار کنگ ءَ اَنت، ھپتاد ءِ دھک ءَ شاہ ءِ سرکار ءَ بلوچ راجی آجوئی ءِ جنز ءَ را ایرموش کنگ ءِ ھاتر ءَ پاکستان ءَ را مالی کمک کرت، زمینی ءُ بُرزی (فضائی) کمک کرت۔
انوں چین ءِ گْوشگ ءِ پد ءَ ایران ءَ پاکستان ءَ را کامیکاز ڈرون داتگ، آئی ءَ ایردستیں بلوچستان ءِ دویں بھرانی تہ ءَ زرکاری (سرمایہ کاری) کرتگ۔ بلے آجوئی ءِ واست ءَ بلوچ راجی جُنز چہ پْیسریگین ءَ سک ءَ باز مھکم اِنت، زورگیرانی میان ءَ یکے دومی ءَ را کمک ءُ تاوان کنگ بلوچ راج ءَ را داشت کرت نہ کنت۔ چہ چین ءِ کمک ءَ ھِچ مَٹی ءُ بدلی نہ اَیت، راجدپتری ھساب ءَ ھچ وڑیں زوراکاں چہ بلوچ راج ءَ باج نہ برتگ۔ منگولاں، پرتگالیاں، انگریزاں باز جُھد کرت بلے آ بے سوب بوت اَنت، مارا مھکمیں یکین اِنت کہ انوگیں زورگیر ءُ مئے مچانکی دژمن بے سوب بہ اَنت، سوب ایوک ءَ بلوچ راج ءِ بیت۔ بلوچ ءِ واست ءَ اِے دست ءِ لیبوکے، یاںکہ آ مئے سرڈگار ءَ سرجم ءَ کبزہ کن اَنت یاںکہ ما چہ کبزہ گیراں وت ءَ رکّین اَنت، بلے بلوچانی جُھد ءَ را گِر ءُ دار کنگ ءِ ھچ راہ نیست۔ میان استمانی لس مھلوک ءَ کدی ھم بلوچ ءَ را کمک نہ کرتگ بلکیں آیاں مئے سرگار ءِ کبزہ کنوکانی ھمکوپگی کرتگ۔
اکوام متھد ءُ میان استمانی لس مھلوک ءَ بلوچستان ءِ تہ ءَ زاھدان ءِ لس مھلوک ءِ کُشت ءُ کوش ءُ زوراکی ءَ را دیستگ، بلے آ بلوچ راج ءِ سر ءَ بوتگیں زوراکیانی سر ءَ بے توار بوت اَنت۔ آیانی وتی دلگوشی ءُ نپ ھست اَنت۔ ھمے سوب اِنت کہ آ یکے دومی ءِ جرم ءَ را چْیر دیگ ءَ جُھد ءَ کن اَنت۔ انچش کہ اِے آیاناں نپ ءُ پائدگ دے اَنت۔ اکوام متھدہ ریاستانی کلب ءِ دروشم ءِ اِنت کہ آھود ءَ راجانی جھگیری کنوکیں کارگس جھگیری کرت نہ کن اَنت بلکیں ایوک ءَ ریاست اکوام متھدہ اسمبلی ءِ تہ ءَ وتی جھگیری ءَ کرت کن اَنت۔
راج، ھاسکر ایردستیں راج وتی جھگیری ءَ کرت نہ کن اَنت، اِے گپ پدّر اِنت کہ زورگیریں ریاست کہ آ ایردستیں سرڈگار ءِ سر ءَ انسانیت ءِ بگیری ءَ جرم ءَ ھوار اَنت آ اکوام متھدہ ءِ آئی سی جے یاںکہ آئی سی سی ءَ رو اَنت وتی بگیری ءَ گواھی نہ دے اَنت۔ ھمے سوب اِنت کہ ایران ءِ ایردستی ءَ کردانی، الاھواز ءِ اربانی، زرباری آزربائیجان ءِ ترکانی پیمیں ایردستیں راجانی چکچینی ءُ پاکستان ءِ کبزہ ءِ تہ ءَ بلوچ، پشتون ءُ سندھی آنی چکچینیاں دلگوش نہ کن اَنت۔
بلوچستان ءِ سر کبزہ کرتگیں زورگیر گْوش اَنت کہ وھدے بلوچ آجو بوت انت گُڑا بلوچ لس مھلوک چہ ما ابید بوت کرت نہ کنت۔ بلے راستی ءَ اِے ھْون چُوش (Parasite) اَنت کہ آ بلوچستان ءِ مال ءُ مڈی ءُ زمین ءِ سر ءَ زند گْوازینگ ءَ اَنت۔ اِے ھون چُوشانی پیم ءَ اَنت کہ وتی مھمان دار ءَ را گْوش اَنت ”اگاں ما جُتہ بوت اَنت گُڑا شُما زندگ بوت کرت نہ کن اِت“ بلے راستی اْیش انت کہ ھْون چُوش وت زندگ بوت کرت نہ کنت مِھمان دار نہ۔
پاکستان ءِ آبادی 230 مِلُون اِنت کہ آ بلوچستان ءِ ابرمی مڈیانی وسیلہ ءَ دیمروئی کنگ ءَ اِنت، پاکستان چہ بلوچستان ءَ سُھر، تانبا، پٹرول ءُ دگہ بازیں مڈّی دُزگ ءُ برگ ءَ اِنت کہ چہ آئی ءَ پنجاب دیمروئی کنگ ءَ اِنت۔
ریکوڈک ءُ سیندک ءَ چہ بندات کن اِیں کہ آ دگنیا ءِ دو مزنیں سُھر ءِ ھمبار اَنت، آیانی نیاد کرب ڈالرانی کساس ءَ اِنت کہ آ پاکستانی آنی دستاں دُزّگ ءُ برگ بوگ ءَ اَنت۔ ھمے پیم ءَ بلوچستان ءِ ابرمی گیس نہ ایوک ءَ کبزہ گیریں پنجاپ ءِ ھر گس ءَ را وردن ءِ جْوڑ کنگ ءِ بود ءَ دیگ اِنت بلکیں کبزہ گیریں پنجاپ ءِ کارجاہ ھم ایردستیں بلوچستان ءِ گیس ءِ وازمندگ اَنت۔ ایشی ءَ ابید بلوچستان ءِ تہ ءَ چہ دہ ھزار ءَ گیش اشکرانی کَھن اَنت، (چُشکہ بولان ءُ چمالنگ ءِ تہ ءِ) کہ چہ آیاں کبزہ گیریں پاکستان ءِ کارجاہ جُنزگ ءَ اَنت۔ کبزہ گیریں پاکستان ءُ چین وتی بیلٹ اینڈ روڈ ءِ بَھر سی پیک ءَ دیم ءَ برگ ءِ ھاتر ءَ پہ زور گْوادر بندرگاہ ءَ جْوڑ کنگ ءَ اَنت۔ آیاں وتی اِے کار ءِ دیم ءَ برگ ءِ ھاتر ءَ درزنانی کِساس ءَ بلوچ بیگواہ کرتگ، بازین ئِے بے گِس ءُ بازین ئِے چہ الاکھاں در کرتگ اَنت۔
ھستیں اھد ءَ بلوچ لس مھلوک پاکستان ءُ ایران ءِ دُزّی ءُ ڈُنگی ءِ آماچ اَنت، آ مَڈّیاں چہ بلوچانی سرڈگار ءَ کشگ ءَ اَنت بلے انگت بلوچ ءَ را یک وھدے نان ءِ بَھا گِرگ ءِ گُنجاش نیست۔ اِے وڑ چْوں بوت کرت کنت کہ ھمے سرڈگار (بلوچستان) کہ آ 230 مِلُون پاکستانی ءُ کرڈانی کساس ءَ پارسی آنی پالینگ ءَ اِنت بلے آ بلوچستان ءَ را یک انچیں تبکے ءِ نیمگ ءَ چگل بہ دے اَنت کہ آ ھود ءَ دِگہ تو دِگر اِنت آئی ءِ وتی جِند ءِ لس مھلوک ءِ زندگ بوگ ھم یک جنجالے ءِ تہ ءَ بِہ بیت؟
من ھمے سرپد بہ اِیں وھد ھمیش اِنت کہ ایردستیں راج وتی تہ ءَ بے دروریں یکمشتی یے ودی بہ کن اَنت تاںکہ آجوئی ءِ واست وتی گھگیری ءُ کوشست ءَ را مھکم کرت بہ کن اَنت ءُ ایردستیں راجانی میان ءَ ھم یک بلاھیں یکمشتی یے جوڑ کرت بہ کن اَنت۔ مئے ایردستیں راجانی یکمشتی ءَ ابید، زوراکیں ریاست ءُ آیانی بی ٹولیانی پیمیں پارلیمنٹ پرستیں ءُ وپاک مئے مردماں گمراہ کن اَنت، بھر ءُ بانگ کن اَنت، مئے آجوئی ءُ وتواجھی ءِ جھد ءَ را نِزور کن اَنت۔
ایوک ءَ بلوچ راج ءِ کُشت ءُ کوش چہ چمالنگ ءِ سیمسراں نہ اِنت بلکیں ایشی ءِ یک بلاھیں داستانے کہ ایشی ءِ تہ ءَ بازیں مُچّانکی گْور، مردمانی بے کساسیں بْیگواھی، بہ کُش ءُ چگل بِہ دے ءِ سوشونی ءِ بنیات ءَ آئی ءَ ھزارانی کساس ءَ مردم کُشتگ، کہ ایشی ءِ تہ ءَ انوگیں زاھدان ءِ لس مھلوک ءِ کشت ءُ کوش ھم ھوار اِنت۔
اِے گپ ءَ گْوں تچک ءَ یات بِہ کن اِت کہ اگاں ما یکیں لْیکہ (آجوئی) ءِ واست یکجاہ نہ بوت اَنت ءُ جُتائیں لْیکھانی سر ءَ بھر ءُ بانگ بوت اَنت گُڑا مئے سر ءَ ھمے پیمیں زلم ءُ زوراکی برجاہ بیت۔ اِے کبزہ گیر مارا نیکراھی، اُلسی، سوشلسٹ یاںکہ کمیونسٹ ٹولیانی بنیات ءَ نہ چار اَنت بلکیں آ مارا بلوچ ءِ بنیات ءَ چار اَنت۔ من وتی لس مھلوک ءَ را اِے پیام ءَ دیگ لوٹ اِیں کہ آیاناں وتی مُچّانکی لْوٹ (آجوئی) ءِ گِرگ ءِ واست ءَ مھکم بوگ لوٹ اِیت، دیم ءَ جُنزگ لْوٹ اِیت ءُ یکے دومی ءِ وڑ ءُ پیم، بِستار منّگی اِنت ءُ یکے دومی ءَ را شرپ دیگی اِنت۔ ما بازیں نکس وارتگ، بازیں دَگہ وارتگ، بلے نوں گیش ورگی نہ اِنت۔ مارا ”ایرانی بلوچ“ ءُ ”پکستانی بلوچ“ ءِ وڑیں گالبند کارمرز کنگی نہ اِنت، تیوگیں بلوچ یک اَنت، بلوچ راج چہ آدگہ راجانی (کبزہ گیریں گجر ءُ پنجاپی) ھستانک ءَ چہ مزنیں کرنے ءَ پیسر اِے سرڈگار (بلوچستان) ءِ تہ ءَ ساڑی بوتگ اَنت۔
