واشنگٹن:(ہمگام نیوز) وائٹ ہاؤس نے اعلان کیا ہے کہ وہ مصر اور قطر کے ساتھ مل کر اسرائیل اور حماس کے درمیان غزہ میں تقریباً 11 ماہ سے جاری جنگ کے خاتمے کے لیے ایک نئی جنگ بندی اور یرغمالوں کے معاہدے کی تجویز تیار کر رہا ہے۔ اس پیش رفت کا مقصد دونوں فریقین کے درمیان ایک ممکنہ سمجھوتہ کرنا ہے تاکہ جاری تنازعے کو ختم کیا جا سکے۔
قومی سلامتی کے مشیر جان کربی نے کہا کہ حماس کی جانب سے چھ یرغمالیوں کی ہلاکت، جن میں ایک امریکی بھی شامل ہے، نے مذاکرات میں “عجلت کے احساس” کو واضح کیا ہے۔ انہوں نے کہا، “ہم ایک تجویز پر کام کر رہے ہیں جو بقیہ یرغمالیوں کی رہائی کو یقینی بنائے گی، اور اس میں غزہ کے لوگوں کے لیے بڑے پیمانے پر اور فوری ریلیف شامل ہوگا، اور اس کے نتیجے میں لڑائی روک دی جائے گی۔”
یاد رہے کہ اسرائیل اور حماس کے درمیان جنگ کا آغاز 7 اکتوبر کو ہوا جب حماس نے اسرائیل پر دہشت گرد حملہ کیا تھا، جس میں 1200 افراد ہلاک ہوئے تھے۔ اس کے جواب میں اسرائیل کی کارروائیوں میں حماس کے زیر انتظام غزہ کے محکمہ صحت کے مطابق اب تک 40 ہزار سے زائد فلسطینی اپنی جانیں گنوا چکے ہیں۔
