تاشقند:(ہمگام نیوز) افغانستان کے نائب وزیراعظم برائے اقتصادی امور ملا عبدالغنی نے کہا ہے کہ افغانستان میں اب ایک ایسی حکومت موجود ہے جو حقیقتاً عوام کی خدمت کر رہی ہے اور اپنی ذمہ داریوں کو بخوبی نبھا رہی ہے۔
انہوں نے یہ بات ازبکستان کے دورے کے دوران تاشقند میں نو تعمیر شدہ افغان سفارت خانے کے معائنے کے موقع پر کہی۔ سفارت خانے کے عملے سے خطاب کرتے ہوئے ملا نے کہا کہ افغانستان کا موجودہ نظام عوام کی خدمت اور ان کے مسائل کے حل کے لیے سنجیدہ کوششیں کر رہا ہے۔
نائب وزیراعظم کے دفتر سے جاری بیان کے مطابق ملا نے کہا، “ہماری واحد خواہش عوام کی خوشحالی اور بہتری ہے۔ ہر ذمے دار عہدیدار کو شہریوں کے مسائل فوری اور مؤثر طریقے سے حل کرنے کے لیے انتھک محنت کرنی چاہیے۔”
انہوں نے مزید کہا کہ افغانستان اسی وقت خودمختاری کی راہ پر گامزن ہو سکتا ہے جب حکومت عوام کی خدمت کرے اور عوام ہر شعبے میں حکومت کے ساتھ کھڑے ہوں۔
دوسری جانب تاشقند میں افغان سفارت خانے کے حکام نے سفارتی سرگرمیوں کے حوالے سے بریفنگ دیتے ہوئے بتایا کہ عبوری حکومت کے قیام کے بعد ازبکستان میں مقیم افغان مہاجرین اور محنت کشوں کے بیشتر مسائل حل کر دیے گئے ہیں۔
یہ امر بھی قابل ذکر ہے کہ تاشقند میں افغان سفارت خانے کی نئی عمارت کی تعمیر مکمل ہو چکی ہے اور جلد ہی اسے باضابطہ طور پر فعال کر دیا جائے گا۔
