لندن(همگام نیوز) آجوئی بلوچستان جنز (ایف بی ایم) ءِ نیمگ ءَ گْوستگیں سال 30 تومشان ءَ زاھدان ءِ تہ ءَ بلوچانی کُشت ءُ کوش ءِ یک سالے ءِ سرجم بوگ ءَ لندن ءِ تہ ءَ شھمیرانی یات ءَ یک مراگشے برجاہ داشتگ، گْوستگیں سال 30 تومشان ءَ آدینک ءِ روچ ءَ وھدے بلوچ لس مھلوک ءَ ایرانی لشکر ءِ دستاں بلوچ جنک ماھو بلوچ ءِ بے شَرپی ءِ بگیری ءَ زھرشانی کرت گُڑا ایرانی لشکر ءِ کارمنداں زھرشانی کنوکانی سر ءَ تیرگواری بِندات کرت، چہ ایشی ءَ یک سد ءَ گیش مردم شھمیر بوت ءُ سے سد ءَ گیش مردم زدگ بوت اَنت۔ 30 تومشان ءَ زاھدان ءِ تہ ءِ بوتگیں کُشت کوش ءِ یات ءَ بلوچ لس مھلوک ءَ ھوار آ دگہ راجاں شھمیراناں سُھرچکیں دروت ندر کرت ءُ ایران ءِ بگیری ءَ وتی جُھد ءَ را گیش کنگ ءِ وادہ کرت۔ مراگش ءِ تہ ءَ ایران ءِ ایرستیں راج کرد، الھوازی ءُ آزری ترکاں ھم بھر زرتگ، ایشی ءَ ابید تامل ایلام ءِ آجوئی دوستانی ھواری ءَ ھلیجی ملک، بھرین ءَ چہ اتکگیں انسانی اگبالانی رھشوناں ھم بھر زرتگ۔
آجوئی بلوچستان جنز (ایف بی ایم) ءِ بنجاھی سروک واجہ ھیربیار مری ءَ وتی ھیال درشان کنان ءَ گْوشت کہ چہ ایران ءُ پاکستان ءَ پیسر منگول ءُ انگریزاں بلوچستان ءِ سر ءَ کبزہ کرتگ، بلے آیاں وتی کبزہ ءَ را بلوچستان ءِ سر ءَ برجاہ داشت کرت نہ کرت۔ ھمے پیم ءَ ما ھم زوتاں ایران ءُ پاکستان ءَ را چہ وتی سرڈگار ءَ چہ شکست دے اَنت ءُ وتی آجوئی ءَ پچ گِر اَنت۔ آئی تران کنان ءَ گْوشت کہ مارا وت مہ وت ءَ یکے دومی ءَ را اھترام ءُ شرپ دیگی اِنت تاںکہ ما وت یکجاہ ءُ یکمشت بوت کرت بہ کن اَنت۔ آئی ءَ گْوشت کہ بلوچاناں ”ایرانی یاںکہ پاکستانی بلوچ“ ءِ وڑیں گالبندانی کارمرز کنگ ءَ چہ وت ءَ پھریز کنگی اِنت۔ اِے گالبند دویں کبزہ گیر پاکستان ءُ ایران ءِ جوڑ کرتگیں گالبند اَنت کہ آ بلوچ ءِ تاگت ءَ را ھمے وڑیں گالبندانی وسیلہ چہ نِزور کنگ ءُ بَھر ءُ بانگ کنگ لْوٹ اَنت۔
مراگش ءِ تہ ءَ کردستان پیپلز ڈیموکریٹک اسمبلی ان بریٹینی ءِ کمک کماش سوکمالی، پیٹریاٹک ارب ڈیموکریٹک جُنز اِن الاھواز ءِ ابدالرھمن، بلوچ اکٹیوسٹ کیمپئن ءِ سروک ابداللّہ آرپ، بلوچستان آجوئی زرمبش ءِ مھراب، کردستان ءِ مِھری رزائی، اھوازی ڈیموکریٹک پاپولر پرنٹ ءِ پیسل اھوازی، تامل ایلام ءِ تھیوان ءُ بھرن ءِ انسانی اگبالانی گل بھرین ھیومن رائٹس رمواچ سوسائٹی ءِ کارگشاد پیسل پولاد ءَ وتی ھیال درشان کرتگ اَنت۔ تران کنوکاں ایردستیں راجانی یکمشتیں جھد ءِ سر ءَ دلگوشی دات۔
