لندن (ھمگام نیوز) بلوچ راجدوستیں رھشون ءُ آجوئی بلوچستان جُنز (ایف بی ایم) ءِ سرکماش ھیر بیار مری ءَ وتی یک درشانے ءِ تہ ءَ گْوشتگ کہ آجوئی بلوچستان جُنز (ایف بی ایم) ایران، پاکستان ءُ چین ءِ نیمگ ءَ بلوچستان ءِ مڈیانی لُٹ ءُ پُل، بلوچ راج ءِ بگیری ءَ دراجدستیں کارانی بے سوب کنگ ءِ واست ءَ یکمشتی، بلوچ راج ءَ را زوراکی ءِ وسیلھاں چہ ایردست کنگ ءِ کوشستانی بگیری ءَ دگنیا ءِ تہ ءَ سرپدی دیگ ءِ ھاتر ءَ یکشل ءَ جھد کنگ ءَ اِنت۔
اِے کار ءِ واست ءَ آجوئی بلوچستان جنز (ایف بی ایم ) ءَ فن لینڈ، نیدرلینڈ، جرمنی، برتانیہ، امریکہ ءُ کینیڈا ءِ تہ ءَ سرپدی تُکشامے برجاہ داشتگ، کہ آئی ءَ بیست ءُ چار 24 ساھتانی تہ ءَ جتا جتائیں استانانی تہ ءَ چین ءِ سپارتھانھانی دیم ءَ اوشتاتگ ءُ زھرشانی کرتگ۔
بلوچ راجی رھشون ءَ تران کنان ءَ گْوشت کہ بلوچ راج ءَ را ایران ءُ پاکستان ءِ وڑیں نیکراھی ناشرکاریں ءُ چین ءِ وڑیں کمیونسٹ سرکاراں چہ بلوچ راج ءِ بگیری ءَ لْوڈی ءُ ھواری (دوستی) ءَ را شریں دابے ءَ سرپد بوگی ءُ زانگی اِنت کہ اِے دویں نیکراھی استاناں پیسر ءَ بلوچ راج ءَ را کمیونسٹ گْوشت ءُ بلوچ راج ءِ کُشت ءُ کْوش ءُ چکچینی ءِ واست ءَ راہ اِش پَچ کرت، بلے نوں اِے دویں استان وت چین ءِ وڑیں کمیونسٹ ءَ ھوار اَنت، بلوچ راج ءَ را ناشرکار گْوشگ ءُ آئی ءِ چکچینی ءَ کنگ ءَ اَنت۔
بلوچ راجی رھشون ءَ تران کنان ءَ گْوشت کہ پاکستان ءُ ایران نیکراھی ءِ نام ءِ سر ءَ راجکاری ایوک ءَ پہ دومی راجانی کبزہ کنگ ءُ آیانی ابرمی مڈیانی لٹ ءُ پل ءِ ھاتر ءَ اِنت، مارا اِے سرپد بوگی اِنت کہ پارس ءُ پنجاپی نیکراھی کارڈ ءَ را بلوچ ءِ مڈیانی لٹ ءُ پل کنگ ءُ بلوچ ءَ را چکچین کنگ ءِ وڑیں ھرابیں واھگانی سرجم کنگ ءِ واست ءَ کارمرز کنگ ءَ اَنت۔
راجی رھشون ھیر بیار مری ءَ گْوشت کہ بلوچ راج ءَ را ایران، پاکستان ءُ چین ءِ اِے شیتانیں دوستی ءُ یکجاھی ءِ بگیری ءَ تیار بوگ ءُ وتی میان ءَ بے دروریں تپاکی ءُ یکجاھی ودی کنگی اِنت ءُ بلوچستان ءِ مھکمیں آجوئی ءِ واست ءَ جھد کنگی اِنت۔
درشان ءِ تہ ءَ آئی ءَ گْوشت کہ ایران ءُ پاکستان ءَ بلوچستان ءِ تہ ءَ بلوچ راج ءِ بگیری ءَ مزنیں جنگی جرم کرتگ، اِے جرمانی تہ ءَ نواب نوروز ھان ءَ گْوں آئی ءِ زھگ ءُ سنگتانی ھواری ءَ پاھو داتگ، ھپتاد ءِ دھک ءَ چمالنگ ءِ تہ ءَ مری بلوچانی کُشت ءُ کْوش، مال ءُ دلوتانی لُٹگ ءُ برگ، ھزارانی کساس ءَ زھگ ءُ زالبولاناں بنجلانی تہ ءَ برگ ءُ بندیگ کنگ ءُ دگہ بازیں زوراکی کرتگ۔ راجدپتر اِے گپ ءِ گواہ اِنت کہ اِے زوراکی ایرانی شاہ ءِ دوران ءَ کنگ بوتگ اَنت ءُ ایران ءَ پاکستان ءَ را ایوک ءَ گزرانکی کمک نہ کرتگ بلکیں ایشی ءِ ھواری ءَ جنگی سِلاہ ءُ کمک ھم داتگ، ایشی ءَ ابید ایران ءَ وتی پائیلیٹ ءُ جنگی گراباناں ھم چمالنگ ءُ آئی ءِ کِرّ ءُ کش ءِ الاکھانی تہ ءَ دیم داتگ ءُ بمب گواری کرتگ۔ کجام مردم کہ شاہ ءَ یک مسیھایے سرپد بنت، آیاناں اِے گپ زانگ لوٹ اِیت کہ مُلّا بِہ بنت یاںکہ شاہ بہ بیت، پہ ھکومت ءِ مَٹ ءُ بدل بوگ ءَ ھچ پرک نہ بیت، بلکیں اے سرجمینانی سرشونی ایران ءِ دراجدستیں واھگانی (توسیع پسندانہ عزائم) برجاہ دارگ ءُ بلوچ راج ءِ چکچینی ءِ واست ءَ اِنت۔ پارس ءُ پنجاپی کدی ھم بلوچ راج ءِ دوزواہ بوت کرت نہ کن اَنت، پرچے کہ آیاناں بلوچ ءِ سرڈگار ءُ ابرمی مڈیانی پکار اِنت، تاںکہ آ وتی کبزہ گیری ءُ زوراکی ءَ برجاہ بہ دار اَنت ءُ کبزہ گیری ءَ مھکم بہ کن اَنت
ھیر بیاری ءَ دیمتر ءَ تران کنان ءَ گْوشت کہ دو دھک اِنت کہ پنجاپی ءُ پارس ھواری ءَ یکبرے پد ءَ بلوچانی کُشت ءُ کْوش اِش بندات کرتگ، اِے رَند ءَ آیاں گْوں وت ءَ کمیونسٹ چین ءَ را ھم ھوار کرتگ، ڈیرہ بگٹی ءَ بلوچانی کُشت ءُ کوش، ھزدار ءَ مُچّی ئیں کبرانی پدّر بوگ کہ آیانی تہ ءَ سدانی کساس کُنٹ در اھتگ اَنت، ھمے وڑ ءَ گوستگیں سال ءَ ایران ءِ کبزہ گیریں لشکر ءَ زاھدان ءِ تہ ءَ درزنانی کساس ءَ بلوچاناں کُشتگ ءُ ایران ءِ زندانانی تہ ءَ مُچّی ءَ پاھو دیگ ءَ ابید اِے وڑیں بازیں ویل کرتگ۔ کہ آیانی تہ ءَ بلوچ راج ءِ بگیری ءَ جنگی جرم کرتگ ءُ اِے وڑیں ویلانی درچ یکشلاہ تاں اِے وھد ءَ برجاہ اِنت۔
بلوچ رھشون ءَ گْوشت کہ ما اِے تیوگیں ملکاں کَڈّن کن اَیں اگاں آ اسلام ءُ مسلمانیت ءِ بُنیات ءَ ایشاں کمک ءُ مدت کنگ ءَ اَنت یاںکہ دگہ نپ ءُ پائدگانی بنیات ءَ پاکستان ءَ را کمک کنگ ءَ اَنت، ایشی سوب ءَ پاکستان بلوچستان ءِ تہ ءَ بلوچ راج ءِ چکچینی ءَ کنگ ءَ اِنت۔
ھما تاگت کہ اسلام ءِ نام ءِ سر ءَ پاکستان ءَ را کمک کنگ ءَ اَنت اسل ءَ آ مسلمانیت ءِ نام ءِ سر ءَ پاکستان ءِ کمک ءَ نہ کنگ ءَ اَنت بلکیں آیانی کمک مسلمانیں بلوچانی تباھی ءُ بربادی ءِ سوب جوڑ بوگ ءَ اِنت، پاکستان ءِ ھواری ءَ ھمے مسلم ملک ھم بلوچ ءِ چکچینی ءَ دزمانجنی کنگ ءَ اَنت۔
رو ایرکپتی ملک وتی نپ ءُ پائدگانی واست ءَ پاکستان ءَ پوجی ءُ مالی کمک کنگ ءَ اَنت یاںکہ پاکستان ءَ گْوں ھوار اَنت بلوچستان ءِ ابرمی مڈیانی کبزہ کنگ ءِ واب ءَ گندگ ءَ اَنت آیاناں ما گْوشگ لوٹ اَیں کہ یہ امیت ءَ مدار اِت کہ بلوچ راج آیانی گُٹ ءَ پُل ءِ ھار ءَ گْور ءَ دنت۔
آجوئی بلوچستان جنز (ایف بی ایم ) پاکستان ءُ ایران ءِ نیمگ ءَ بلوچ راج ءِ بگیری ءَ جنگی جرم ءُ زوراکی ءِ ھوالہ ءَ درملکاں یک سرپدی تُکشامے برجاہ دار اِیت کہ آئی ءِ تہ ءَ گْوستگیں سال 30 ستمبر ءَ ایرانی ایردستیں بلوچستان ءَ زاھدان ءِ تہ ءَ بلوچانی کُشت ءُ کْوش، نسلی بنیات ءَ بے میاریں بلوچانی چُکچینی ءُ پاھو دیگ ءَ ابید پاکستان ءِ ایردستیں بوچستان ءِ تہ ءَ زوراکیں بیگواھی، مُچّی ئیں کبرانی پَدّر بوگ ءُ بلوچ راج ءِ چُکچینی ءِ بگیری ءَ دگنیا ءَ را سرپدی دے اَنت، ھمے وڑ ءَ جُتائیں ملکاں ایرانی سپارتھانھانی دیم ءَ زھرشانی کن اَنت ءُ وتی لْیکہ ءَ دگنیا ءِ ملکانی تہ ءَ سر کنگ ءِ جھد ءَ برجاہ دار اَنت۔
