ھب( ھمگام نیوز)بلوچ اسٹوڈنٹس فرنٹ ھب ھنکین ءِ نیمگ ءَ یک وانگی گِردانکے ھنکین ءِ کماش ھمل بلوچ ءِ سروکی ءَ برجم دارگ بوتگ، اے دیوان ءِ سرھال سیاست، سیاسی گل ءُ لس مهلوک بوتگ دیوان ءِ تران کنوک بی ایس ایف ءِ بُنجاھی پتر ءِ باسک سنگت فضل بلوچ بوتگ۔
سنگت ءَ تران کنان ءَ گْوشت کہ سیاست عربی زُبان ءِ لبزے آئی بزانت ملک ءِ تدبیر ءُ انتزامیہ اِنت ۔ ارسطو سیاست ءِ بانی زانگ بیت ارسطو ءَ وتی چاگردے لس مہلوکانی جیڑہ ءُ اڑ ءُ جنجالانی دوچاری ءَ پد یک کتاب ءِ نبشتہ کُتگ آئی نام ”سیاست“ اِنت ارسطو ءَ سائنس آف پالیٹکس ءِ بانی گُشگ بیت، ارسطو گُش ایت کہ ھر یک بنی آدمے یک سیاسی جانورے، ما مدامی گند ایں کہ لس مھلوک گْوش ایت کہ مارا گوں سیاست ءَ ھچ سیادی نیست ما سیاست نہ کن ایں بلے آ بزان اَنت بنی آدم آ سیاسی جانورے ،ھمُک لس مہلوک ءِ زندگی ءَ شریں وڑے ءَ بہ وان انت گُڑا گندگ ءَ کیت کہ ہر بنی آدم ءِ زند ءِ تہ واھشت ءُ زلورت است آیانی لوٹ ہم ھست اَنت اے کُل چیزانی گیش ءُ گیوار کنگ ءِ ھاتر ءَ آ جُهد کن انت ایشی ءَ را سیاست گْوشگ بیت۔
اگاں ما مرچی گْوں هورتی ءَ بہ چار اَیں بنی آدم وڑے نا وڑے ءَ وتی چاگرد ءِ تہ ءَ گوں سیاست ھوار اِنت-
بسمارک گْوش ایت سیاست نا فن ئے نا کہ سائنس ئے بلکیں سیاست یک انچیں آرٹے کہ اُدا وتی چاگردے ءُ راج ءِ لس مهلوک یکجاہ کنگ ءِ جُهد ءَ اِنت۔
وتی راج ءِ لس مہلوک ءَ یکجاہ کنگ ءُ آیانی مُچّیں جیڑہانی گیش ءُ گیوار کنگ ءِ جُهد سیاست گُشگ بیت وتی راج ءِ سرا بووکیں زُلم، جبر، انصافی ءِ سرا توار چست کنگ ءُ وتی راج ، زبان دُود ءُ ربیدگ سرڈگار ءِ مال ءُ مڈیانی رکینگ ءِ واست ءَ جہد کنگ سیاست گُشگ بیت۔
دیمتر ءَ سنگت ءَ سیاسی گلانی تہا لس مہلوک ءِ ھواری ءِ سرا تران کنان گْوشت کہ سیاسی گل لس مهلوک ءِ رھشونی ءَ کن انت پمیشکا پہ یک گلے ءِ یا پارٹی ءِ باسک آئی سروکاں الم انت کہ آھانی تہ ءَ لهتیں ھاسیں سیت مان بہ بنت چوشکہ آ پہ جُهد کنوک بہ بنت ، ہر وھدا کُربانی دیگ ءَ ساڑی بہ بنت گل ءِ ڈسپلن ءُ رھبند ءِ پابند بہ بنت۔ یک سیاسی گلے ءَ اے ھیال دارگی انت کہ آئی باسک زانت ءُ سرپدی ءَ ھوار وتی کرد ءَ گوں پارٹی ءِ ڈسپلن ءُ رھبند ءِ پابندی ءَ ھوار لس مہلوک دیم ءَ بے درور جوڑ بہ بنت وھدیکہ یک سیاسی گلے ءِ باسکانی تہ ءَ اے سپت مان نہ بوت انت آگل هم یک آشوبی ءُ سیاسی
گلے گْوشگ نہ بیت۔ یک سیاسی ءُ آشوبی گلے ءَ ھمک وھد ءَ لس مہلوک ءِ نیام ءَ بوگی انت، چہ لس مهلوک ءِ دیم ءَ آھانی نیام ءَ ھستیں جیڑہانی گیش ءُ گیوار کنگ ءِ زمہ وار بوگی انت۔
ماؤزے تنگ ءِ گْوش ایت کہ ”یک سیاسی گلے ہرچ وڑ ءَ کارگشاد بہ بیت اگاں وتی جھد ءِ تہا لس مهلوک ءَ ھوار کُت مہ کنت گُڑا بزان آ یک ٹولی ءِ زانگ بیت بے مُزّ ءَ جھد ءَ انت۔ دومی نیمگ ءَ اگاں لس مہلوک کارگشاد بہ بیت ءُ آئی تمرد ءُ سرپدیں سروک مہ بیت تہ آئی جھد ہم مهکم بوت نہ کنت جوانیں وڑے ءَ دیم ءَ شُت ہم کُت نہ کنت آ سر ءَ وتی راہ ءَ گار کنت ءُ اوشت ءِ آماچ بیت“
یک سیاسی گلے ءِ سروک ءَ اے شے ءِ ھیال دارگی اِنت آرا سرپد بوئگ باز پائدگ دات کنت کہ سیاسی گل ءُ لس مہلوک ءِ ارزشت ءَ سرپد بہ بئے کہ ما یک نیمگے ءَ سیاسی گل زمہ واریاں زان ایں ءُ دومی نیمگ ءَ لس مهلوک ءِ کرد ءَ ہم سرپد بہ ایں۔
دیوان ءِ گُڈ سرا سنگتانی جُستانی پسو جوانیں وڑے ءَ دیگ ءَ پد دیوان ءِ ھلاسی جار جنگ بوت۔