تہران (ہمگام نیوز) مانیٹرنگ نیوز ڈیسک کی رپورٹ کے مطابق پاکستان اور ایرانی وزرائے خارجہ کے درمیان مذاکرات میں دونوں ممالک کی سلامتی اور خودمختاری کا احترام یقینی بنانے پر اتفاق کیا گیا ہے۔ اس موقع پر ایرانی وزیر خارجہ امیر عبداللہیان نے کہا کہ پاکستان کے ساتھ اہم برادرانہ تعلقات ہیں، پاکستان کے ساتھ جغرافیائی تعلقات بھی اہمیت کےحامل ہیں، ہم ایران اور پاکستان کے عوام کو ایک ہی قوم سمجھتے ہیں۔
انہوں نے مزید کہا کہ پاکستان کی سکیورٹی ہمارے لیے مقدم ہے، تخریب کاروں نے ایران کو بہت نقصان پہنچایا ہے، ایران اور پاکستان تخریب کاروں کو کسی قسم کا موقع نہیں دیں گے، مشترکہ بارڈر پر موجود تخریب کار دونوں ممالک کی سلامتی کے لیے خطرہ ہیں۔
امیر عبداللہیان کا کہنا تھا کہ ہم پاکستان کی سکیورٹی کو ایران اور خطے کی سکیورٹی کے طور پر دیکھتے ہیں، تخریب کاروں کے ہاتھوں پاکستان اور ایران میں کئی لوگ قتل ہوچکے ہیں، بلاشبہ مشترکہ سرحد پرموجود تخریب کار پاکستان اورایران میں کارروائیاں کرتے ہیں، یہ تخریب کار کسی تیسرے ملک کے ایما پرپاکستان اورایران میں تخریب کاری کرتے ہیں۔
