تربت ( ہمگام نیوز ) برطرف ٹیچرز کا اجلاس،ڈی ای او اور اے سی تربت سے ملاقاتیں وزیراعلیٰ بلوچستان ضلعی انتظامیہ کی انکوائری کمیٹی کی رپورٹ کی روشنی میں برطرف ٹیچرز کو بحال کرے،ٹیچرز کی برطرفی سے ضلع کیچ کے متعدد سکولوں میں تدریسی عمل متاثر،بچوں کا سال ضائع ہونے کا خدشہ ہے۔
ڈی ای او کیچ متاثرہ سکولوں میں تاحال متبادل ٹیچرز فراہم کرنے میں ناکام،2اکتوبر تک ضلع کیچ کے برطرف ٹیچرز بحال نہ کئے گئے تو روزانہ کی بنیاد پر تربت اور کوئٹہ کے پریس کلبوں کے سامنے علامتی بھوک ہڑتالی کیمپ قائم کرکے احتجاجی تحریک شروع کریں گے۔
میڈیا کو جاری کردہ بیان میں کہا گیا ہے کہ برطرف ٹیچرز ایکشن کمیٹی کیچ کا اجلاس سوموار کو وطن ٹیچرز ایسوسی ایشن کیچ کے دفترمیں منعقد ہوا،اجلاس میں خواتین ٹیچرز کی بڑی تعدادشریک تھی۔
اجلاس میں مسئلے کا مختلف پہلوؤں پر غور و خوص کیا گیا کہ اپنے بحالی تک خاموش نہیں بیٹھیں گے،ہر دوسرے ہفتے برطرف ٹیچرزکا اجلاس ہوگی،ضلعی انکوائری کمیٹی اس مہینے کے اختتام تک اپنے سفارشات مرتب کرکے سیکرٹری تعلیم بلوچستان اور ایک کاپی وزیراعلی بلوچستان جام کمال خان عالیانی کو ارسال کریگی اگر وزیر اعلی بلوچستان یا سیکرٹری تعلیم بلوچستان نے ہمیں بحال کرکے سروس جاری رکھنے کا موقع نہیں دیا تو مجبورا احتجاج کاراستہ اپنا کر پر امن احتجاج کے تمام ذرائع کو بروئے کار لائیں گے۔
پہلے مرحلے میں برطرف ٹیچرز کی دو کمیٹیاں تشکیل دیکر تربت اورکوئٹہ پریس کلب کے سامنے علامتی بھوک ہڑتالی کیمپ کاانعقاد کیا جائیگا اس کے ساتھ سول سوسائٹی اور سیاسی تنظیموں کیساتھ ملکر ریلی نکال کر مظاہرے کئے جائیں گے۔
اجلاس کے بعد ایک ٹیچرز کی وفد نے انکوائری کمیٹی کے چیئرمین اور اسسٹنٹ کمشنر تربت اور ڈسٹرکٹ ایجوکیشن آفیسر کیچ سے الگ الگ ملاقات کرکے اپنے تشویش اور کیس کی اپ ڈیٹ معلوم کیا گیا،جبکہ ڈی ای او کیچ نے خودکو بری الزمہ قرار دیکر غلطی کا ذمہ دار آر ٹی ایس ایم ٹیم کو قرار دیکر اپنے کردارکے حوالے سے ٹیچرز وفد کو مطمئن نہ کرسکا۔
اس موقع پر ڈی ای اونے کہا کہ برطرف ٹیچرز اپنی بحالی کیلئے اپنے درخواست اورحاضری رپورٹ میرے دفتر میں جمع کریں،جس پر ٹیچرز وفد نے حیرانگی کا اظہار کرتے ہوئے کہا کہ ہماری درخواست اور حاضری رپورٹس ضلعی انکوائری کمیٹی کے پاس جمع ہیں اور کمیٹی میں محکمہ تعلیم کیچ کے نمائندے بھی شامل ہیں۔
دوسری بات برطرف ٹیچرز کے درخواست اورحاضری رپورٹس معطلی کے وقت ڈی ای اوکیچ کے آفس میں جمع کرچکے ہیں لیکن انہیں سیکرٹری تعلیم آفس کوئٹہ پہنچانے کے بجائے ردی کے ٹھوکری میں پھینک دیئے گئے ہونگے،برطرف ٹیچرز ایکشن کمیٹی کے فوکل پرسن غلام نبی بلوچ نے کہاکہ برطرف ٹیچرز ایک دوسرے سے رابطے میں رہیں اور ہر ہفتے سوموارکو ڈی ای اوکیچ کے دفتر کے سامنے میں آجائیں تاکہ مشاورت کاسلسلہ جاری رکھ سکیں۔
