چُکلُک ناجوڑ ات . جَکّتی و جَکتی و پدا آرام بوت . ماتیں پگر کرت که واب کپت . چارستی ، دیستی که ساهی بند انت .
گریوگ ءَ گلائیش بوت و وتی مات و زهگ ءِ بلکی توار کرت و گوئشتی :
_ بچار ! منی زهگلک بیران بوته .
بلک گوئشت :
_ گریوگ ءَ بس کن ، بلکیں آرام واب کپته و نه مُرته . تو شیشگوکے به دئے آئی ءِ دپ ءِ نزیک ءَ داریں ، اگں شیشگک هید کرت ، بزان زندگ انت و نه مرته .
شیشگک اش آئی ءِ دپ ءِ نزیک ءَ داشت و شیشگک هید کرت . زهگلک زندگ ات .
رندا چکلک چه واب پاد یهت و کم کم جوان بوت . مزنین روچگ ءِ وهد ات و موسم کمے گرم ات . بلے سرجمیں برپ ، آپ نه بوت انت و پدا بدت انت و مُج ( گیتلو ) مانشانت .
سهب زوت من په باگ ءِ چارگ ءَ باگ ءَ شتاں . داب دابیں سوپانی درچکاں من چارست ، لهتے ءِ شاهڑاں سیاه اتنت و دگه لهتے چه اسپیتکیں برپ ءِ استالکاں پوشتگ اتنت . من آهانی نزیک ءَ شتاں ، دیست اوں که سیاهیں شاهڑاں پهک هُشک انت و اسپیت تابیں و دگه رنگیں شاهڑاں پهک ، تَـرّ و زندگ اتنت . آهانی چورکانی کِرّ و کنار چه بدتگیں باپاں پوشتگ ات .
شاهڑانی دگه هچ جاهے شما بدتگیں چیزے ، چورکانی داب ءَ دیست نه کنیت . چورکانی جاه ماں سارتی ءَ چو که مردینانی ریش و بروتانی داب ءَ ، بدتگ . تهنا هما جاه که په رُدگ و پَه پُلَّگ ( گُلَّگ ) تیار انت .گوئش ئے اوداں آهانی دَپُک انت که گلائیش انت پاچ بیان انت .
مرتگیں درچک و شاهڑاں ساه ءَ نه کش انت و زندگیناں ساه ءَ کش انت ، مردمانی داب ءَ . ما گوں پونز و دپ ساه ءَ کشیں و درچکاں گوں وتی چورک و چرکاں !
==========
* مزنیں روچگ : ئیسائیاں سالے چل شپ و روچ چه گوشت ، شیر و چه دلوتاں رستگیں یا اڈ بیتگیں ورداں پهریز کن انت و نه ور انت و گیشتر سبزی ونیبگ ، نان و چشیں چیز ءَ ورانت . همے رسم ءَ « مزنیں روچگ » گوئشنت . ئیسائیان ءَ دگه روچگ هم هست ، بلے مستریں روچگ همیش انت . اے روچگ کم و گیش چه آپریل ءِ ماه ءَ بنگیج ءَ بیت . روس که سارتیں ملکے ، هنگت اے ماه ءَ باز جاهاں برپ و سارتی هست انت .