غزہ ( ہمگام نیوز ) مانیٹرنگ ڈیسک کی رپورٹ کے مطابق فلسطینی خبر رساں ایجنسی نے ہفتے کے روز کہا کہ اسرائیلی فوج غزہ کی پٹی پر بڑے پیمانے پر چھاپے مار رہی ہے اور اسے آپریشن “آہنی تلواریں” کا نام دے رہی ہے۔
ایجنسی نے مزید بتایا کہ اسرائیلی فوج القدس کے اردگرد تمام چوکیوں کو بند کر رہی ہے۔ فرانسیسی خبر رساں ایجنسی نے بتایا ہے کہ غزہ کی پٹی کے سینکڑوں باشندے اسرائیل کی سرحد پر واقع اپنے گھروں سے فرار ہو رہے ہیں۔ مقامی فلسطینی ذرائع نے اطلاع دی ہے کہ متعدد اسرائیلی فوجیوں کو پکڑ لیا گیا ہے اور ان میں سے متعدد کو غزہ کی پٹی میں منتقل کر دیا گیا ہے۔ بعض افراد ہلاک بھی ہوئے ہیں۔
علاوہ ازیں فلسطینی ٹیلی ویژن نے بتایا کہ غزہ کی پٹی میں اسرائیلی فوج کی فائرنگ سے پانچ افراد ہلاک اور متعدد زخمی ہو گئے ہیں۔ غزہ کی پٹی میں وزارت صحت نے بتایا کہ اسرائیلی فوج کے دستوں نے شمالی غزہ کی پٹی میں انڈونیشیا کے ہسپتال کو نشانہ بنایا جس کے نتیجے میں ایک زخمی ہوگیا۔
وزارت صحت نے ایک بیان میں مزید کہا کہ اس اسرائیلی جرم کی روشنی میں وزارت صحت بین الاقوامی اور انسانی اداروں سے مطالبہ کرتی ہے کہ ہنگامی حالات کے دوران صحت کے اداروں، ایمبولینسوں اور طبی ٹیموں کے تحفظ کو یقینی بنانے کے لیے تمام اقدامات کئے جائیں۔
حماس نے ہفتے کی صبح اسرائیل پر حیرت انگیز طور پر بڑا حملہ کیا۔ یہ حملہ برسوں میں سب سے بڑا حملہ قرار دیا جارہا ہے۔ اس حملے میں بندوق برداروں نے سرحدی باڑ کو عبور کرلیا اور غزہ کی پٹی سے راکٹوں کا حملہ کیا۔
جنوبی اور وسطی اسرائیل اور القدس شہر میں سائرن بجنے لگے۔ اسرائیلی فوج نے کہا کہ وہ حالت جنگ میں ہے۔
وزیر اعظم نیتن یاہو نے سکیورٹی حکام کا ہنگامی اجلاس طلب کیا۔ نیتن یاھو نے ٹی وی خطاب میں کہا ہے کہ ہم حماس کے ساتھ حالت جنگ میں ہیں۔ اسرائیل اور حماس کے درمیان 2021 میں دس روزہ جنگ لڑنے کے بعد سے یہ سب سے خطرناک لڑائی سمجھی جارہی ہے۔
اسرائیلی میڈیا نے جنوبی اسرائیل کے قصبوں میں فلسطینی جنگجوؤں اور سیکورٹی فورسز کے گروپوں کے درمیان بندوق کی لڑائی کی اطلاع دی۔ غزہ میں لوگ لڑائی کے کئی دنوں تک جاری رہنے کے امکان کے پیش نظر سامان خریدنے کے لیے بازاروں میں پہنچ گئے ۔
القسام بریگیڈز کے چیف آف سٹاف محمد الضیف نے حماس کے میڈیا آؤٹ لیٹس کے ذریعے ایک نشریات میں آپریشن شروع کرنے کا اعلان کرتے ہوئے فلسطینیوں سے ہر جگہ لڑنے کی اپیل کی ہے۔ انہوں نے پانچ ہزار میزائلوں کے داغے جانے کا حوالہ دیتے ہوئے کہا کہ آج زمین کی سطح پر آخری قبضے کو ختم کرنے کی عظیم جنگ کا دن ہے۔
ایمرجنسی سروسز نے اطلاع دی ہے کہ ایک اسرائیلی خاتون ہلاک ہو گئی ہے ۔ ایمبولینس کا عملہ غزہ کی پٹی کے ارد گرد کے علاقوں میں تعینات ہے۔ اسرائیلی فوج نے کہا ہے کہ اس کی افواج غزہ کے اندر آپریشن کر رہی ہیں تاہم اس نے اس حوالے سے تفصیلات فراہم نہیں کیں۔
