گْوادر (ہمگام حال) گْوادر ءَ بلوچ راجی مُچّی ءَ گوں تران کنان ءَ ڈاکٹر ماہ رنگ بلوچ ءَ گشتگ کہ بلوچ راجی مُچی تہنا جلسھے نہ اِنت مراگشے نہ اِنت بلئے بلوچ راجی مچی یک جُنزے کہ ما سوگند زوریں کہ وتی راج ءَ را دوسد سال ءَ گیش ءِ گلامی ءِ ھلاپ ءَ یکجاہ کنیں۔
روکپتی بلوچستان نیست، رودرتکی بلوچستان نیست
بلوچستان تھنا یکے، ھر بلوچ ءِ لوگ اِنت ءُ ھر ھما زورآوراں کہ مارا سیمسرانی تہا بھر کتگ اے راجی مُچی ءِ جُنز ھر ھما زورآور ءِ ھلاپ ءَ پاداتکگ ءُ اے جُنز بلوچ ءَ را یک توانے جوڑ کنگ ءِ جُنزے۔ بلوچاں بچار اِت اے ریاست ءِ ءُ ایشی ءِ رھبند ءَ گوستگیں یازدہ روچ اِنت ما ادا نشتگیں گوں اے ریاست ءُ ایشی ءِ کانون ءَ یک ناں بلے دہ بر اِنت نشتگیں گپ کتگ،
شمئے ادارہ ءُ شمئے ایف سی ءَ بے گناھیں بلوچ جتگ اَنت، زالبولانی سر ءَ لٹ چست کتگ سے ورنا شھید کتگ، ایشانی ھلاپ ءَ کورکمانڈر ءِ ھلاپ ءَ ایف آئی آر درج بکن اِت ءُ آمیدگس ءَ بہ بر اِت اش ءُ برو اِت ھک بکن اِت۔
بلئے ایشاں مارا ھک نداتگ، بلکیں ھمے ایف آئی آر مئے سر ءَ جنئگ بوتگ۔ گڑا ایش اِنت ایشی ءِ رھبند ءُ ریاست،
بلئے ما اے ریاست ءَ ھمے کلوہ دیگ لوٹاں کہ ھر بلوچ ءِ پدریچ کُشی ءُ کوش ءِ ھلاپ ءَ ایف آئی آر بلوچ ءَ وتی راجدپتر ءَ شمئے لشکر ءِ ھلاپ ءَ نبشتگ ءُ بلوچ وتی انساپ ءَ وت کنت۔
اے جُنز ءُ گوں اے جنز ءَ بستگیں ھرچ مردم سوگند بزوریت کہ بلوچ راجی مچی ءِ جنز ءَ گوں ھمراھداری کنت، بلوچ راج یکجاہ کنگی اِنت۔
تا سیستان ءُ مکُران، اے درستیں بلوچ یکجاہ آرگی ءُ بلوچ سرزمین ءِ واستا جد ءُ جھد ءِ تہ ءَ ھمراھداری کنگی اِنت۔
ما اے ریاست ءَ ھمے پیشداشتگ کہ بچار اے پدی زِر کہ تو مئے میرین ڈرائیو جوڑ کتگ، اے دگ تو جوڑ کتگ، چہ اے دگ ءَ مئے ھما دریاوردانی تو روزگار پُل اِتگ، بلئے انگت ھمے دگ ءِ سر ءَ تو مارا نہ اِشتگ۔
بلئے بلوچ ھمے دگ ءِ سر ءَ نشتگ ءُ ترا ءُ تئی زوراکیں ریاست ءَ جواب لوٹگ ءَ اِنت کہ ما نندیں۔
گْوادر ھر ھما وزیر ءُ گزیراں کہ حسّاس جوڑ کتگ، گْوادر حسّاس نہ اِنت۔ گْوادر بلوچ ءِ سر زمین اِنت، سر ڈگار اِنت۔ ایشی ءَ حساس جوڑ کنوکیں ھرچ توان ءِ ھلاپ ءَ مارا اوشتگی اِنت۔
ما ءُ شما انچش کہ یکجاہ بوتگیں انچش یکجاہ بئیں، باندا سہت دہ ءَ سرجم ءَ گْوادر اد ءَ بئیت ءُ ھوار بہ بیت۔ تلار ھما جاگہ اِنت کہ سرجمیں بلوچستان ءِ مردم اود ءَ مُچ بوتگ اَنت، آیانی سر ءَ تیرگواری کنگ بوتگ، بازیں مردمے ٹپی بوتگ ءُ مردم شھید بوتگ اَنت۔ نوں بیا اِت ما ءُ شما رویں ھمے راہ ءَ ھمے چوکیاں، کیچ ءِ سرزمین ءَ تُربَت ءِ سرزمین ءَ یک جلسھے کنیں۔ ھوار بئیں اے راج ءَ کلوہ بدئیں اے ریاست ءَ کلوہ بدئیں کہ بلوچ پُشت ءَ نہ کنزیت تو پشت ءَ کنز ئے، بلے بلوچ پشت ءَ نہ کنز اِیت۔
ما شمئے درستانی سک باز منتواریں ءُ ھمے لوٹیں کہ باندا سرجمیں بلوچستان ھاس کیچ ءِ مردم وتا تُربَت ءَ سر بکن انت ءُ ھرچ بلوچ ءَ کلوہ بدنت کہ آ بلوچ راجی مُچی ءِ جنز ءَ ھمراہ اِنت ءُ اے جنز بلوچ ءِ ھما گڈی سرزمین ءِ مزاحمت ءِ مستریں جُنز بیت، اے جنز ءَ گونڈو، زالبول، کماش درست یکجاہ بنت، ءُ ھر سیمسر ءَ پْروش اَنت، بلوچ ءَ یکجاہ کنیں ءُ یکجاہ کنگی اِنت، مئے باندات ہمیش اِنت۔
