نیوریار ( ہمگام نیوز ) مانیٹرنگ نیوز ڈیسک کی رپورٹ کے مطابق ’انسٹاگرام‘ ان تکنیکی وجوہات کا جائزہ لے رہا ہے جن کی وجہ سے اس کے ہزاروں صارفین کو فوٹو شیئرنگ پلیٹ فارم تک رسائی میں مشکل پیش آ رہی ہے کیونکہ ان میں سے بہت سے لوگوں نے شکایت کی کہ ان کے اکاؤنٹس معطل کر دیے گئے ہیں۔
میٹا پلیٹ فارمز کی ملکیت والے انسٹاگرام نے پیر 31 اکتوبر کو اپنے ٹویٹر اکاؤنٹ پر کہا کہ “ہم سمجھتے ہیں کہ آپ میں سے کچھ کو آپ کے انسٹاگرام اکاؤنٹ تک رسائی حاصل کرنے میں دشواری ہو رہی ہے، ہم اس کا جائزہ لے رہے ہیں اور زحمت کے لیے معذرت خواہ ہیں‘‘۔
انسٹاگرام کے ترجمان نے اکاؤنٹس کی معطلی پر کوئی تبصرہ نہیں کیا۔
پلیٹ فارم کے متعدد صارفین نے “ٹویٹر” پر لکھا کہ “انسٹا گرام” نے ان سے معطل اکاؤنٹس تک رسائی کے لیے ای میل اور فون نمبر طلب کیا۔
ڈاؤن ڈیٹکٹر ویب سائٹ کے مطابق اس بندش نے صارفین کی بہت بڑی تعداد کو متاثر کیا ہو سکتا ہے
درجنوں صارفین نے سوشل میڈیا پوسٹس میں تصدیق کی کہ وہ اپنے انسٹاگرام اکاؤنٹس استعمال کرنے سے قاصر ہیں یا انہیں ایسے پیغامات موصول ہوئے ہیں جن سے یہ ظاہر ہوتا ہے کہ ان کے اکاؤنٹس معطل کر دیے گئے ہیں۔
بائیس ستمبر کو اسی طرح کی ایک خرابی ریکارڈ کی گئی تھی اور “انسٹاگرام” نے اس کے پیش آنے پر کوئی وضاحت شائع نہیں کی تھی۔
“انسٹاگرام” سروس کی بندش “میٹا” کمپنی کی “واٹس ایپ” ایپلی کیشن کی ناکامی کے ایک ہفتے سے بھی کم وقت کے بعد آئی ہے جس نے گذشتہ منگل کو اربوں صارفین کو متاثر کیا۔
