تـَرينوك : كريم بلوچ _ تـَهل
مــَـــــــرد و گـــُــرك
مردے ڈگار ءَ شوم كنان ات ، آئی ءِ اپس باز نزور و آرامی ءَ
جـُنزان و جـُگ و ننگار ءَ كـَشّـان ات. مرد گـَرم گـِـپت :
_ ترا گركے به وارتيں !
اناگت ءَ ، چه كجا گركے پيداگ بيت ، آتك مرد ءِ كـَش ءَ و گوئشت ئی :
_ چون بارين ، بدئے وتی اپس _ بور _ ءَ كه من وران ئی !
مرد ءَ بــِـرّ و هـَيران بيت ، چمانی درآتك انت و پدا گوئشت ئی :
_ دل ءَ بدار ، من شوم ءَ كـُٹيناں ، گـُڑان تو آئيا ورئے .
گـُرك نـِـشت و چاران بيت . هـَنچو كه مرد ءَ شوم كنگ ءَ
كـُـٹينت ، گرك هما دمان ءَ تياربيت و مرد آئيا گوئشت :
_ چون تو اَپس ءَ پُٹاں گوں ورئے ؟ گهتر انت كه منی پـَـجّـی ءَ
برواں ، منی لوگ ءَ ، من گوں جوشيں آپ ءَ شودان ئی ، پُــٹ ئی رچنت ،
آزگيں گوشت وا وشتر انت .
گرك ، مرد ءِ هبر ءَ مـَنّ ات و مرد ءِ پجّی و هوری ءَ شُت .
مرد ، لوگ ءَ آتك و گوانك ئی جـَت :
_ منی زال ، زوتی ءَ لـَـهڑ و جوشيں آپاں بيار !
زال ءَ پر آئيا لـَهڑيں آپاں آرت انت . گرك نشت و چارت كه چون
مرد ءَ ، اپس ءِ پـُٹاں گوں جوشيں آپاں ليڑينيت . مرد ءَ لـَـهڑيں آپاں
گرك ءِ چماں سـُـلـُهت انت . گرك بال كت . شما بديستين ات !
مرد ايدگه روچيں هم ، ڈگار ءَ په شوم كنگ ءَ شُت . گرك هم ،
اودان وتا سَر كت و مرد ئی گوئشت :
_ نون ، من تئی جند ءَ وراں !
_ جوان انت __ مرد ءَ منّ ات __ تهنا من ءَ بــِـلّ و اجازت
بدئے كه مَوت ءَ چه پيش دعا اے به كنوں . تو من ءَ هَمِدان رهچار بئے ،
من درچك ءَ سركپاں و همودان دعای كناں . هُدا چه جَهلـَگ ءَ نه اشكنت .
گـُرك منّ ات . مرد درچك ءَ سَركپت و اير كـَپـَـگ ءِ هيال ئی
هم نه كت . گرك آئی ءِ ودار ءَ نشتگ ات و نشتگ ات . آهر ءَ گرك گرم
گـِپت كه مرد ءِ دعای ءَ نه كـُـٹنت ؛ و هولّايگ ءَ ايدگه گركانی توار كت
كه مرد ءِ ورگ ءَ مـَـدَت ئی كن انت .
سرجميں گرك كه آئی ءِ هولايگ ءِ توار اش اشكت ، په آئی ءِ كمك و
بـَـڑايی ءَ آتك انت . هما گرك كه مرد ءِ ورگ ءِ باڑه ات ، آتك درچك ءِ
بُن ءَ ، دومی گرك ، آئی ءِ چـَك و پُشت ءَ سركپت ، سومی ، دومی ءِ پشت
ءَ و هَنچو يكے آدگر ءِ پشت ءَ سركپاں و بُرز بياں بيت انت . يك كمے هست
ات كه مرد ءَ به رَسَنت . آهری گرك ، مرد ءِ كش و نزيك ءَ رَستگ ات .
مرد كه باز تُرستگ ات ، يكبرے كه گوانك ئی جت :
_ منی زال ، زوتی ءَ جوش و لهڑيں آپاں بيار ! پهك گركاں هنون
پيلـُشين اوں !
هما گرك كه جهل و ايدگه گرك آئی ءِ جـَـكّ ءَ اوشتاتگ اتنت ، تا
كه مرد ءِ توار ئی اشكت ، و گـِـير ئی آتك كه چون مرد ءَ آئيا لهڑيں آپاں
گوں پيلوشتگ ات ، وتی پاد ءِ وَس ئی يكجاه كت انت كه به تچ ايت . گركاں
لـَـگـُـشت و ڈگار ءَ تـُرُپ تـُـرُپ كـَپت انت . اـَهتے مُرت انت و
لهتے چه تُرس ءَ جنگل ءَ تتك انت .
چو مرد ءَ ، چه مرك ءَ رَكّ ات .